E Kaukaua na Vosa ni Kalou
1. Na cava na usutu ni soqo lavotaki ena yabaki vakacakacaka ni 2014?
1 Na iVolatabu e duidui sara mai na ivola eda vakarautaka na tamata sega ni uasivi. E kaukaua na iVolatabu ni rawa ni veisautaka na noda bula, me rawa ni salavata kei na inaki i Jiova na noda vakasama kei na noda ivalavala. E vakacava sara mada na kaukaua ni Vosa ni Kalou? Eda na vakayagataka vinaka vakacava ena noda bula? Eda na vakayagataka vakacava meda vukei ira kina eso tale? Eda nuidei nida na vakayaloqaqataki vakayalo ena porokaramu ni soqo lavotaki ena yabaki vakacakacaka ni 2014 ni na veivosakitaki kina e vica na tikina bibi qori. Na kena usutu “E Kaukaua na Vosa ni Kalou” yavutaki ena Iperiu 4:12.
2. Na taro cava meda vaqara na kena isau?
2 Qara na iSau ni Taro: Ni o vakarogoca tiko na porokaramu, saga mo kila na isau ni taro e volai e ra.
• Na cava meda nuitaka kina na Vosa i Jiova? (Same 29:4)
• Na cava meda cakava meda vakila kina ena noda bula na kaukaua ni Vosa ni Kalou? (Same 34:8)
• O na vakayagataka vakacava na kaukaua ni Vosa ni Kalou ena nomu cakacaka vakaitalatala? (2 Tim. 3:16, 17)
• Eda na qarauni keda vakacava mai na veibacani ni vuravura i Setani? (1 Joni 5:19)
• Ra itabagone, o na toso vinaka vakacava vakayalo? (Jere. 17:7)
• E rawa vakacava nida kaukaua ena gauna mada ga eda malumalumu kina? (2 Kor. 12:10)
• Ke vakawakana tu vei keda na itovo kei na ivakarau ca, cava e vinakati meda rawa ni vakavoui tiko ga kina? (Efeso 4:23)
3. Me ikuri ni noda vakarorogo ena porokaramu, e yaga tale ga vakacava na noda tiko ena soqo lavotaki?
3 Ena yaga vakalevu vei keda na porokaramu ni soqo qo! Kena ikuri, na siga ni soqo lavotaki qo, me vaka ga na soqo ni tabacakacaka kei na soqo ni tikina, ena vukei keda meda vakarabailevutaka qai marautaka na noda veimaliwai kei ira na tacida mai na so tale na ivavakoso. (Same 133:1-3; 2 Kor. 6:11-13) Mo vakayagataka gona na gauna qori mo veimaliwai kina kei ira na nomu itokani, saga mo veikilai tale ga kei ira na ka vou. Ke lesi na ivakatawa ni tikina se dua mai Peceli me vulagi ena noda soqo, vakacava meda vakaliuliu meda kidavaki koya kei watina? Io, e levu na vuna meda rai vakanamata kina ena soqo lavotaki sa roro tiko mai!