O Bau Vakaraitaka na iCakacaka ni Vuli ena iMatai ga ni Nomu Veisiko?

Eso na itaukeinivale era sega ni taleitaka ke o sureti ira mera vuli iVolatabu, se ra na tukuna nira dau vuli iVolatabu tale ga ena nodra lotu. De dua era sega ni kila ni iwalewale ni noda vulica na iVolatabu e duidui mai na veilotu eso, era sega tale ga ni vakasamataka na levu ni ka e rawa nira vulica kei na kena vinaka. Vakacava, e rawa nida vakaraitaka vei taukeinivale ena loma ni vica na miniti na icakacaka ni kena vulici na iVolatabu ena imatai ni noda veisiko mai na noda veisureti ga? Me kena ivakatautauvata: Eda na sega ni tukuna ga vei ira nida matai ena vakasaqa, ia eda na solia sara ga vei ira na ka eda vakasaqara mera tovolea! Koya gona eda na sega ni tukuna tiko ga na vuli iVolatabu, meda vakaraitaka sara ga na kena icakacaka. Qo na ka eda rawa ni cakava ena loma ni vica na miniti, me yavutaki ena vakatutu ena Noda Cakacaka Vakaitalatala ni Janueri 2006, tabana e 6:

“Na cava nomu nanuma, ena dua beka na siga ena vakayacori kina na ka e tukuni qo? [Wilika Aisea 33:​24, waraka me sauma.] Meu vakaraitaka mada vei kemuni e dua na ka talei me baleta na tikina ya.” Solia vei taukeinivale e dua na ivola Kaya na iVolatabu, qai kerea me cega na tabana e 36, ena parakaravu 22. Wilika na kena taro, qai kerei taukeinivale me vaqara na kena isau ena gauna o wilika kina na parakaravu. Wilika tale na taro, qai vakarorogo vinaka ni vakamacala o itaukeinivale. Drau wilika e dua tale na tikinivolatabu. Taroga e dua na taro me na qai saumi ena nomu veisiko tarava. Vakadeitaka mo na lesu dina ena siga o lokuca mo lesuvi koya kina. Sa tekivu rawa e dua na vuli iVolatabu!