iVakadinadina Levu
1. Me ikuri ni ivunau, na cava tale ena rairai tarai ira na sureti ena iVakananumi? Vakamacalataka.
1 Ena gauna cava? Ena bogi ni iVakananumi. E dua na sasaga levu e caka mera sureti mai o ira na tiko kei keda ena soqo qo. Ena rairai sega wale ga ni tarai ira na ka era rogoca. Ni oti na iVakananumi, e dua na marama a tukuna na ka sara ga e raica—oya na nodra veikauaitaki na tiko kina, na totoka ni vale kei na kena savasava, vakakina na nodra qarava vinaka na vale na bolecakacaka. O koya gona, keda kece meda ivakadinadina ena soqo bibi duadua ni yabaki, sega ni o koya ga e vunau.—Efeso 4:16.
2. Eda na ivakadinadina vakacava vei ira na vulagi?
2 Kidavaki Ira na Vulagi: E ivakadinadina tale ga na noda kidavaki ira na vulagi ena matadredredre. (Joni 13:35) Ke o sega mada ga ni rawa ni vosa vei ira kece, se rawa ga ni o vakaveikilaitaki iko vei ira era dabe tikivi iko. (Iper. 13:1, 2) Meda kauaitaki ira na vulagi era sega ni kila e dua. De dua o ira qori, era taura na ivola ni veisureti ena gauna eda veisoliyaka kina. O rawa ni taroga, “Qo na imatai ni gauna o lako mai kina?” Sureti koya mo drau dabe vata qai sauma na nona vakatataro. Ke vinakati me vagalalataki totolo na vale ena caka kina na soqo me rawa ni vakayagataka e dua tale na ivavakoso, o rawa ni tukuna: “Na cava mada nomuni nanuma me baleta na porokaramu? Sala cava au rawa ni veitaratara kina kei kemuni?”
3. Eda na vakaraitaka vakacava nida ciqomi ira era sa sega tu ni dautukutuku?
3 Ciqomi Ira sa Sega Tu ni Dautukutuku: Sa macala tu ga nira na tiko ena ivakananumi o ira sa sega tu ni dautukutuku, wili kina eso era qai dau tiko ga ena iVakananumi. Meda ciqomi ira da qai vakaraitaka nida marautaka na nodra tiko. (Roma 15:7) Era rawa ni gole na qase ni ivavakoso ena nodra vale na sa sega tu ni dautukutuku ena dua na gauna totolo ni oti na iVakananumi mera vakayaloqaqataki ira mera tomana nodra sosoqoni ena ivavakoso. Meda masulaka mada ga nira na uqeti e levu tale era tiko ena iVakananumi mera vakalagilagia na Kalou, sega ena ka ga era rogoca, ia ‘nira raica tale ga na noda ivakarau vinaka.’—1 Pita 2:12.