Kidavaki Ira!

1. Gauna cava eda rawa ni vunau vinaka sara kina, na vuna?

¹ Na iVakananumi e dua na gauna vinaka eda rawa ni vunau kina. Vakasamataka mada qo: E namaki mera tiko ena iVakananumi ena yabaki qo e sivia na tini na milioni na vulagi, mera mai rogoca na ivakamacala ni rua na ivakaraitaki levu duadua ni loloma e vakavotui ena ivoli. (Joni 3:16; 15:13) Era na kila kina na veivakalougatataki era rawa ni marautaka ena vuku ni loloma i Jiova. (Aisea 65:​21-23) Ia ena sega ni vunau duadua ga ena gauna qori o koya e lesi me vunau. Eda rawa ni vunau vinaka kece na tiko ena soqo ena noda kidavaki ira na vulagi.​—⁠Roma 15:⁠7.

2. Eda na rawa vakacava ni kidavaki ira na vulagi?

² E sega ni vinaka meda vaqara na noda idabedabe da qai dabe galugalu toka me yacova ni tekivu na porokaramu, ia meda vakaliuliu sara ga meda veikilai kei ira era dabe tikivi keda. Era na rairai madua na vulagi ra qai sega ni kila na cava mera cakava. Noda matadredredre kei na noda vakabula vei ira ena vakacegui ira dina qai vakarawarawataka nodra veimaliwai. O rawa ni kila e dua e gole yani ena vuku ni veisureti ke o taroga se imatai ni gauna ya me tiko kina ena noda soqo, se kila e dua ena ivavakoso. De dua o rawa ni sureti koya mo drau dabe vata, drau vakayagataka vata na nomu iVolatabu kei na ivolanisere. Ke caka na iVakananumi ena Vale ni Soqoni, o rawa ni vakasarasarataki koya vakatotolo. Ni oti na ivunau, tu vakarau mo sauma na nona taro. Ke vakayagataka na vanua ni soqo e dua tale na ivavakoso qai vinakati moni biubiu totolo, o rawa ni kaya: “Au na via kila sara ga na ka o nanuma me baleta na soqo. Dua na sala daru rawa ni veivosaki tale kina?” Oti mo tuvanaka mo sikovi koya. Era na yadrava sara ga na qase mera vakayaloqaqataki ira na sa sega tu ni dautukutuku era tiko ena soqo.

3. Na cava e bibi kina meda vakaliuliu ni kidavaki ira na vulagi ena iVakananumi?

³ E levu na vulagi era na mai raica ena imatai ni gauna na marau, vakacegu, kei na duavata eda vakila tu na tamata i Jiova ena noda parataisi vakayalo. (Same 29:11; Aisea 11:6-9; 65:13, 14) Na cava era na vakasamataka na vulagi nira lesu i vale? Qori ena vakatau vakalevu ena noda vakaliuliu meda kidavaki ira.