Kua ni Cegu na Vunau
1. Eda kila vakacava nira sega ni cegu na vunau na daukaulotu ena imatai ni senitiuri?
1 O ira na daukaulotu gugumatua ena imatai ni senitiuri era “sega ni cegu” na vunautaka na itukutuku vinaka ena vanua kece era tu kina na tamata. (Caka. 5:42) E macala gona nira na vosa vei ira kece era veisivi e gaunisala nira vunau e veivale. Era tu vakarau tale ga mera vunau tawalokuci nira volivoli ena makete ni oti na nodra cakacaka vakaitalatala. Me vakataki Jisu ga, era sega ni cegu na vunau.—Mari. 6:31-34.
2. Na cava e okati ena noda vakatokai meda iVakadinadina i Jiova?
2 Tu Vakarau: Na noda vakatokai meda iVakadinadina i Jiova e sega ni vakaraitaka ga na ka eda cakava; e tukuni keda sara ga. (Aisea 43:10-12) Eda na tu vakarau e veigauna meda vakamacalataka na noda inuinui, ena gauna mada ga eda sega ni vunau kina e veivale. (1 Pita 3:15) O dau vakasamataka vakailiu eso na ituvaki o rawa ni vunau tawalokuci kina kei na ka o rawa ni tukuna? O dau kauta tu eso na ivola mo solia vei ira era tataleitaki? (Vkai. 21:5) O dau vunau ga e veivale se o wasea tale ga na itukutuku vinaka ena so tale na vanua ke veiganiti?
3. Na vosa cava e rawa ni vakaibalebaletaka vinaka na vunau ena salatu, ikelekele ni motoka, vanua ni gade, yalava ni bisinisi kei na so tale?
3 Vunau e “Matanalevu”: A tukuna na yapositolo o Paula ni a vunau e “matanalevu” vaka kina e veivale. (Caka. 20:20) Koya gona, na vunau e “matanalevu” e vakaibalebaletaka vinaka na vunau ena salatu, ikelekele ni motoka, vanua ni gade, yalava ni bisinisi kei na so tale. Na vunau e veivale e iwalewale mana qai vakayagataki vakalevu duadua me vakatetei kina na itukutuku vinaka ni Matanitu ni Kalou. Ia o ira na daukaulotu ena imatai ni senitiuri era kauaitaki ira vakalevu na lewenivanua, sega ni vale. Era tu vakarau mera vunautaka na ka dina e matanalevu, vunau tawalokuci se vunau e veivale. Me tiko mada ga vei keda na rai qori me rawa nida vakacavara vinaka sara na noda itavi vakaitalatala.—2 Tim. 4:5.