Tinikarua na Vuna Meda Vunau Kina

Na cava meda vunautaka kina na itukutuku vinaka qai veivakavulici ena iVolatabu? E kena inaki beka ga meda vukei ira na yalomalumalumu mera muria na sala ina bula? (Maciu 7:14) Qori na imatai ni vuna e volai toka e ra, ia e sega ni vuna duadua ga eda vunau qai veivakavulici kina ena iVolatabu. Raica mada na 12 na vuna e toka e ra eda vakaitavi kina ena cakacaka vakaitalatala. E vei e bibi duadua?

1. E rawa nira vakabulai kina eso. —Joni 17:3.

2. Era vakasalataki kina na tamata ca. —Isik. 3:18, 19.

3. E vakayacori kina na parofisai ena iVolatabu.—Maciu 24:14.

4. E ivakaraitaki ni yalododonu ni Kalou. E sega ni rawa ni beitaki kina na Kalou ni sega ni solia na gauna mera veivutuni na tamata ca ni bera ni veivakarusai.—Caka. 17:30, 31; 1 Tim. 2:3, 4.

5. Eda na vakayacora kina noda itavi meda vukei ira vakayalo era voli ena dra i Jisu. —Roma 1:14, 15.

6. Eda na sega ni beitaki kina ena nodra dra eso tale.—Caka. 20:26, 27.

7. E bibi tale ga ena noda vakabulai.—Isik. 3:19; Roma 10:9, 10.

8. E vakaraitaka nida lomani ira na kainoda.—Maciu 22:39.

9. E vakaraitaka nida talairawarawa vei Jiova kei na Luvena.—Maciu 28:19, 20.

10. E ivakarau sara ga ni noda sokalou. —Iper. 13:15.

11. E vakaraitaka nida lomana na Kalou. —1 Joni 5:3.

12. Ena dokai kina na yaca i Jiova.—Aisea 43:10-12; Maciu 6:9.

Qori e sega ni vuna duadua ga eda vakaitavi kina ena cakacaka vakaitalatala. Kena ivakaraitaki, na vunau e vakaukauataka na noda vakabauta qai rawa ni vakayagataki keda na Kalou meda nona tamata cakacaka. (1 Kor. 3:9) Ia na ikatinikarua ni vuna e bibi duadua ena noda cakacaka vakaitalatala. Se ra mani vakarorogo na tamata se sega, e dokai na yaca ni Kalou ena cakacaka vakaitalatala, e rawa ni sauma tale ga kina o Jiova na veibeitaki e caka vua. (Vkai. 27:11) Io, e tiko na vuna vinaka me ‘kua kina ni cegu na noda vunautaka na itukutuku vinaka kei na noda veivakavulici.’—Caka. 5:42.