Kua ni Yalana na ka o Cakava —Ni o Nanuma ni Sega ni Ganiti Iko na iTavi
1. Na cava era dau tu suka kina eso mera veisureti ina vuli iVolatabu?
1 O dau tu suka mo veisureti ina vuli iVolatabu ni o nanuma ni na sega ni rawa mo vakavulica vinaka e dua? Ena so na gauna, era nanuma na dausokalou yalodina ena gauna makawa me vakataki Mosese kei Jeremaia ni sega ni ganiti ira na nodra itavi. (Lako 3:10, 11; 4:10; Jere. 1:4-6) Koya gona, e sega ni ka vou na rai va qori. Eda na valuta vakacava na rai qori?
2. Na cava meda kua ni nanuma kina ni sa rauti keda ga na vunau e veivale qai nodra itavi eso tale na veivakavulici ena iVolatabu?
2 Meda nanuma tiko ni o Jiova ena sega ni kerei keda meda cakava e dua na ka eda na sega ni rawata. (Same 103:14) Kena ibalebale ni rawa nida cakava na noda itavi meda ‘veivakatisaipelitaki’ da qai ‘veivakavulici.’ (Maciu 28:19, 20) O Jiova e sega ni lesia ga na itavi qori vei ira e levu na nodra kila se tu vei ira na taledi. (1 Kor. 1:26, 27) Meda kua gona ni nanuma ni sa rauti keda ga na vunau e veivale me qai nodra itavi eso tale na veivakavulici ena iVolatabu.
3. E vakarautaki keda vakacava o Jiova meda veivakavulici ena iVolatabu?
3 Vakarautaki Keda o Jiova: E vakarautaki keda o Jiova meda rawa ni veivakatisaipelitaki. (2 Kor. 3:5) E vakayagataka na nona isoqosoqo me vakavulici keda ena ka dina ena iVolatabu, era sega mada ga ni kila qori e levu era vuli vinaka ena vuravura qo. (1 Kor. 2:7, 8) E volatukutukutaka na iwalewale ni nona veivakavulici na Qasenivuli Levu o Jisu me rawa nida vakatotomuria. E sega ni cegu tale ga na nona vakavulici keda ena ivavakoso. Kena ikuri, e vakarautaka vei keda o Jiova na ivola meda veivakavulici kina ena iVolatabu. E vakarautaka na ivukevuke me vaka na Kaya na iVolatabu, e vakamacalataki kina vakamatata na ka dina qai rawarawa na kena kilai. Ena rairai sega ni dredre sara na noda veivakavulici ena iVolatabu me vaka eda nanuma tu.
4. Na cava eda nuidei kina ni na vukei keda o Jiova?
4 Ena veivuke i Jiova, erau qarava vinaka kina na nodrau itavi o Mosese kei Jeremaia. (Lako 4:11, 12; Jere. 1:7, 8) Eda rawa tale ga ni kerei Jiova me vukei keda. Meda kila tiko, nida vakavulica e dua ena iVolatabu eda sa vakavulici koya tiko ena ka dina me baleti Jiova, qori e vakamarautaki koya. (1 Joni 3:22) Koya gona, me nomu isausau mo vakaitavi ena cakacaka ni veivakavulici ena iVolatabu, qo e dua na basoga ni cakacaka vakaitalatala eda vakalougatataki kina qai marautaki vakalevu.