iVakavakayagataki ni Brochure O Cei Era Cakava Tiko Nikua na Loma i Jiova?
Vakarautaki na Brochure Vou me Vagolei Ira Mai na Vuli iVolatabu ena iSoqosoqo
1. Na cava na tolu na inaki ni brochure Cakava na Loma i Jiova?
1 O sa tekivu vakayagataka na brochure vou O Cei Era Cakava Tiko Nikua na Loma i Jiova? Na kena inaki me (1) vukei ira na vuli iVolatabu mera kilai keda vinaka na iVakadinadina i Jiova, (2) mera kila na noda cakacaka, (3) mera kila tale ga na veika e dau vakayacori ena noda isoqosoqo. Na brochure Cakava na Loma i Jiova e tiko ena tabana yadua e dua na lesoni, e rawa ni veivosakitaki ena lima ga ina tini na miniti ni oti na vuli.
2. Vakamacalataka na kena vakarautaki na brochure kei na veika e rawa ni raici kina.
2 Kena Vakarautaki: E wasei vakatolu na brochure, qai dui vakamacalataki kina na tolu na tikina sa cavuti oti mai me baleta na isoqosoqo i Jiova. E biu vaka na taro na ulutaga kece ni 28 na lesoni, qai saumi na taro qori ena ulutaga lalai ena matanivola kata. E laurai ena brochure taucoko na itaba ni sivia na 50 na vanua me vakaraitaka na rabailevu ni noda cakacaka. E tiko ena so na lesoni na kato “Kila Eso Tale na Ka,” qai vakamacalataki e keri na vakatutu o rawa ni uqeti nomu gonevuli kina me muria.
3. E rawa ni vakayagataki vakacava na brochure Cakava na Loma i Jiova?
3 Kena iVakavakayagataki: Me vakaraitaki sara ga e liu na taro e ulutaga ni lesoni. Ni drau wilika vata e dua na lesoni, vakabibitaka na ulutaga lalai ena matanivola kata. Oti me qai veivosakitaki na taro ni railesuvi e toka sara e ra. E rawa ni wiliki taucoko na lesoni qai veivosakitaki se wasei vakalalai. Vakalewa vinaka na tikinivolatabu e sega ni lavetaki me wiliki. Nanuma tiko me veivosakitaki tale ga na iyaloyalo kei na kato “Kila Eso Tale na Ka.” Ena levu na gauna, ena muri ga na veitaravi ni lesoni. Ia e rawa ni veisau qori ke vinakati me veivosakitaki vakatotolo e dua na lesoni. Kena ivakaraitaki, ke roro tiko mai e dua na noda soqo cokovata, e rawa ni lai veivosakitaki sara na lesoni 11.
4. Na cava o marautaka kina na kena vakarautaki na brochure vou?
4 Nida vakavulica e dua ena iVolatabu, eda sa vukei koya tiko me kila na Tamada vakalomalagi. Ia e bibi tale ga meda vakavulici koya me kila na isoqosoqo i Jiova. (Vkai. 6:20) Eda marautaka dina na kena vakarautaki na brochure vou qo me vakarawarawataka na noda cakava qori!