Yaga na Vosa ni Kalou ena Veivakavulici
1. Na cava na usutu ni soqo ni tabacakacaka ni 2014, na taro cava ena saumi tiko ena porokaramu?
1 O Jiova na noda ‘Qasenivuli Lagilagi,’ e dauniveivakavulici vinaka duadua ena lomalagi kei vuravura. (Aisea 30:20, 21) Ia na sala cava e dau vakavulici keda kina o Jiova? E vakarautaka e dua na ivola e uasivi ira kece na ivola—nona Vosa uqeti, na iVolatabu. Ena yaga vakacava na ivakavuvuli vakalou ena noda bula vakayago, ivakarau ni noda vakasama, lomada kei na noda bula vakayalo? Ena saumi tiko na taro qori ena porokaramu ni soqo ni tabacakacaka ena yabaki vakacakacaka ni 2014. Na usutu ni porokaramu, “Yaga na Vosa ni Kalou ena Veivakavulici,” e yavutaki ena 2 Timoci 3:16.
2. Ena vakavotui vakacava na veitikina bibi ena porokaramu?
2 Vaqara na Tikina Bibi Qo: Ni o sauma na taro era tarogi toka e ra, ena vakavotui kina na veitikina bibi ni porokaramu:
• Ena yaga vakacava ina noda bula na ivakavuvuli vakalou? (Aisea 48:17, 18)
• Nida cakava na veiveisau me rawa nida qaravi Jiova vakatabakidua, cava eda rawa ni vakadeitaka? (Mala. 3:10)
• Na cava meda cakava nida rogoca na ‘ivakavuvuli eda vulagi kina’? (Iper. 13:9)
• Eda na vakatotomuria vakacava na “veivakavulici” i Jisu? (Maciu 7:28, 29)
• Na cava e bibi kina vei ira na dauniveivakavulici ena ivavakoso mera vakavulici ira? (Roma 2:21)
• E yaga vakacava na Vosa ni Kalou? (2 Tim. 3:16)
• Ena tarai ira vakacava na lewenivanua na kedra “vakayavalataki” na veimatanitu? (Akeai 2:6, 7)
• Na cava e nuitaka o Jiova ni rawa nida cakava? (Efeso 5:1)
• Na cava meda sasaga kina meda muria tiko ga na veivakavulici i Jiova? (Luke 13:24)
3. Na cava e bibi kina meda tiko da qai vakarorogo vinaka ena porokaramu e vakarautaki mai ena kena gauna?
3 Ena 2 Timoci wase 3, ni bera ni vola o Paula na vosa e yavutaki kina na porokaramu qo, a vakamacalataka na ituvaki dredre ena vakilai ena iotioti ni veisiga. E vola: “Na tamata ca kei ira na dauveidabui era sa na qai torosobu ga, era na veivakacalai, era na vakacalai tale ga.” (2 Tim. 3:13) Meda kua ni vakacalai, e bibi meda vakarorogo da qai muria na veivakavulici vakalou! Koya gona, meda saga mada ga meda tiko da qai vakarorogo vinaka ena porokaramu e vakarautaki mai ena kena gauna.