Ena Vakaukauataki Keda Tiko ga Vakayalo na Cakacaka Vakavunau
1. E yaga vakacava vei keda na cakacaka vakavunau?
1 Nida gumatua ena cakacaka vakavunau, ena vakaukauataki keda vakayalo, eda na marau tale ga vakalevu. Na inaki levu ni noda cakacaka vakaitalatala meda vakamarautaki Jiova. Ia nida talairawarawa ina ivakaro meda “vunautaka na vosa,” ena vakalougatataki keda o Jiova, ena yaga tale ga vei keda ena so tale na sala. (2 Tim. 4:2; Aisea 48:17, 18) Ena vakaukauataki keda vakacava na cakacaka vakavunau, ena vakamarautaki keda tale ga vakacava?
2. E vakaukauataki keda vakacava na cakacaka vakaitalatala?
2 Eda na Vakaukauataki qai Vakalougatataki: E uqeti keda na vunau meda kauaitaka ga na veivakalougatataki ni Matanitu ni Kalou, sega ni leqa e yaco tu nikua. (2 Kor. 4:18) Ena vaqaqacotaka noda vakabauta na yalayala i Jiova, eda na taleitaka tale ga vakalevu na ka dina nida vakamacalataka na ivakavuvuli vakaivolatabu. (Aisea 65:13, 14) Nida veivuke ena nodra vakaukauataki vakayalo eso tale mera “sega ni vakavuravura,” eda na vakaukauataki tale ga meda dei ena noda sega ni vakavuravura.—Joni 17:14, 16; Roma 12:2.
3. E yaga vakacava na cakacaka vakaitalatala ena noda bucina na itovo vaKarisito?
3 Na noda vakaitavi ena cakacaka vakaitalatala e vukei keda meda bucina na itovo vaKarisito. Kena ivakaraitaki, eda na qai yalomalumalumu sara vakalevu nida saga meda “ka kece ga vei ira na tamata kece ga.” (1 Kor. 9:19-23) Eda na yalololoma, eda na veikauaitaki tale ga nida veitalanoa kei ira era “sega ni kauaitaki tu me vaka na sipi e sega na kena ivakatawa.” (Maciu 9:36) Eda na bucina na vosota ke da sega ni soro koso ena gauna eda sega ni kauaitaki kina se tusaqati. Eda na marau vakalevu nida soli keda ena nodra vukei eso tale.—Caka. 20:35.
4. Na cava nomu rai me baleta na cakacaka vakaitalatala?
4 E ka dokai dina noda cakacaka vakaitalatala nida vakacaucautaki koya kina e dodonu duadua ga meda sokaloutaka! E vakaukauataki keda, eda na vakalougatataki tale ga vakalevu nida gumatua meda “vunautaka vakavinaka sara na itukutuku vinaka.”—Caka. 20:24.