E “Vulica na Talairawarawa” o Jisu

E dau talairawarawa tu ga vei Jiova o Jisu. (Joni 8:29) Ia na cava ga e tukuna kina na iVolatabu, ni “vulica na talairawarawa mai na veika rarawa e sotava”?—Iper. 5:8.

Ni bula e vuravura o Jisu, e duatani na veika e sotava ni vakatauvatani mai lomalagi. Kena ivakaraitaki, rau susugi koya nona itubutubu rau lomani Jiova, ia rau sega ni uasivi. (Luke 2:51) Era vakalolomataki koya na iliuliu ni lotu dau veidabui kei ira na vakailesilesi era sega ni lewa vakadodonu. (Maciu 26:59; Mari. 15:15) Kena ikuri, e “vakamalumalumutaki koya qai talairawarawa me yacova sara na mate,” ya me mate vakaloloma.—Fpai. 2:8.

E vulica o Jisu ena ituvaki kece qori me talairawarawa, e sega ni vulica qori mai lomalagi. E rawa kina ni noda Tui uasivi, e noda Bete Levu tale ga ni nanuma noda malumalumu. (Iper. 4:15; 5:9) Ni vulica o Jisu me talairawarawa ena veika e sotava, sa qai talei ga kina ena mata i Jiova, e yaga tale ga vakalevu vua. Vakacava o keda? Nida talairawarawa tiko ga vei Jiova ni dredre na ituvaki, eda na talei vei Jiova, eda na yaga tale ga vua ena ilesilesi e lesia vei keda.—Jeme. 1:4.