Rawa ni Vakaduavatataki Keda na Sotasota ni Qito Lelevu?—Cava e Kaya na iVolatabu?

E rauta ni le lima na bilioni era sarava na qito soka (FIFA World Cup) a caka ena ika20 ni Noveba ina ika18 ni Tiseba 2022. Levu era sarava na qito va qori era nanuma ni na vakaduavatataki ira, ena rawati tale ga kina e levu tale na ka.

• “Na qito e rawa ni veisautaka na vuravura, ena uqeta e levu, e duatani tale ga na sala e rawa ni vakaduavatataki keda kina.”—Nelson Mandela, peresitedi tu i liu e Sauca Aferika.

• “Na qito soka e vakaduavatataki keda . . . eda na nuidei, marau, eda na lomani ira tale ga eso tale ni tautauvata na ka eda taleitaka.”—Gianni Infantino, peresitedi ni FIFA.a

Vakacava ena rawati qori ena sotasota ni qito soka qo, se so tale na qito? E rawa ni vakilai kina na veiyaloni kei na duavata?

Vakacava e vakaduavatataki keda dina?

E levu tale na ka e okati ena saravi ni qito soka ena yabaki qo. E vakavu veivosaki vei ira e levu ena veika vakapolitiki, kei na leqa ni vuravura qo me vaka na dodonu ni lewenivanua, veicati vakamatatamata, kei na veivakaduiduitaki ena veika vakailavo.

Ia e levu era se taleitaka tiko ga mera sarava na qito lelevu me vaka na sotasota ni FIFA World Cup. Dina era marautaka e levu mera cakava qori, ia e vakaiyalayala ga na kena vakaduavatataki keda. E laurai kina na duiyaloyalo, kei na veisei me vaka e tukuna na iVolatabu ni na laurai ena “iotioti ni veisiga.”—2 Timoci 3:1-5.

Vakaduavatataki keda na inuinui

E tu ena iVolatabu na inuinui e vakaduavatataki keda e vuravura raraba. E yalataka nira na duavata kece na lewe i vuravura ena veiliutaki ni matanitu vakalomalagi, ya na “Matanitu ni Kalou.”—Luke 4:43; Maciu 6:10.

O Jisu Karisito na Tui ni Matanitu qori ena raica me vakilai na veiyaloni e veiyasa i vuravura. E kaya na iVolatabu:

• “Era na buroro na yalododonu.”—Same 72:7.

• “Na vakabula o koya na dravudravua e tagi ni kere veivuke. . . ena vakabulai ira mai na veivakasaurarataki kei na ivalavala kaukaua.”—Same 72:12,14.

Nikua, sa vakaduavatataki ira e vica vata na milioni ena 239 na vanua na veivakavulici i Jisu. Era vulica mera kua ni veicati. Mo kila eso tale na ka, wilika na ulutaga “Sala ena Oti Kina na Veicati.”