Era Vakabauta na iVakadinadina i Jiova na Veiyalayalati Makawa?

Io. Keimami vakabauta na iVakadinadina i Jiova ni ‘vakavuna na Kalou na iVolatabu kece.’ (2 Timoci 3:​16) Qo e wili kina na Veiyalayalati Makawa kei na Veiyalayalati Vou. Keimami dau vakatoka na Veiyalayalati Makawa me iVolatabu vakaIperiu, kei na Veiyalayalati Vou me iVolatabu vaKirisi vaKarisito. Ena sala qori, e sega ni raici kina me makawa e dua na ivola ena iVolatabu.

Na cava e bibi kina na Veiyalayalati Makawa kei na Veiyalayalati Vou vei ira na lotu vaKarisito?

E vola na yapositolo o Paula ena veidusimaki ni yalo tabu: “Na ka kece e volai e liu e volai meda vakavulici kina.” (Roma 15:4) E levu sara na itukutuku e tu ena iVolatabu vakaIperiu. Era volai tu kina na itukutuku makawa kei na ivakasala yaga.

• iTukutuku makawa. Na iVolatabu vakaIperiu e volatukutukutaki kina na nona tekivu bulibuli na Kalou kei na ivalavala ca ni kawatamata. Keda sega ni kila qori, eda na sega ni lomavakacegu, eda na lomatarotarotaka: Eda vu mai vei? Cava eda mate kina? (Vakatekivu 2:7, 17) Kena ikuri, e volatukutukutaki kina na veika e cakava na Kalou ena vukudra na nona tamata nira vakila na dredre se na marau.​—Jemesa 5:​17.

• iVakasala yaga. E lewe ni iVolatabu vakaIperiu na Vosa Vakaibalebale kei na Dauvunau, e levu kina na ivakasala yaga kei na ivakavuvuli vuku. E tu kina na ivakasala me marau kina na vuvale (Vosa Vakaibalebale 15:17), na rai donu me baleta na cakacaka saumi (Vosa Vakaibalebale 10:4; Dauvunau 4:6), kei na sala mera marautaka kina na itabagone nodra bula. (Dauvunau 11:9–​12:1).

Kena ikuri, ena yaga na noda vulica na Lawa a soli vei Mosese e volai ena imatai ni lima na ivola ena iVolatabu. Eda sega ni vauci na lotu vaKarisito ena Lawa qori, ia era tu kina na ivakavuvuli yaga e rawa nida marautaka kina na bula.​—Vunau ni Soro 19:18; Vakarua 6:​5-7.