Taro na Dauwiliwili
Na cava e kaya kina na dauvunau ni kunea ga “e dua na tagane vei ira na udolu,” ia e sega ni kunea “e dua na yalewa vei ira kecega oqo”?—Dauvunau 7:28.
Me rawa ni donu noda kila na veivosa uqeti vakalou oqo, ena vinaka meda kila na rai ni Kalou me baleti ira na yalewa. Kena ivakaraitaki na ka e kaya na iVolatabu me baleti Ruci, na vugona na yada o Neomai. E “yalewa yalododonu [“vinaka sara,” NW].” (Ruci 3:11) Na Vosa Vakaibalebale 31:10, e kaya ni yalewa vakawati e vinaka e “yau levu . . . kai yau lailai na rupi.” Na cava gona e vakaibalebaletaka o Tui Solomoni e Isireli makawa ni kaya: “Au sa kunea . . . e dua na tagane uasivi vei ira na le udolu, ia e sega ni dua na yalewa uasivi”?—Moffatt.
Na veitikina wavolita e dusia ni a rairai takalevu na itovo lolovira ena kedra maliwa na yalewa ena gauna i Solomoni. (Dauvunau 7:26) Kena irairai ni vu vakalevu oqo ena nodra veivakamuai na yalewa vulagi era qaravi Peali. O Tui Solomoni mada ga a rawai ena nodra veivakamuai na ilawalawa watina, era yalewa vulagi. “Sa le vitu na drau na watina, era marama, ka le tolu na drau na watina lalai,” e kaya na iVolatabu, “ra sa vukica vakatani na lomana ko ira na watina” me sokaloutaki ira na kalou lasu. (1 Tui 11:1-4) A lolovira tale ga nodra itovo na tagane—a bau dredre dina me kune e dua na tagane yalodina ena kedra maliwa e duanaudolu. E tinia o Solomoni: “Na ka ga oqo ka’u sa kunea, ni sa bulia na tamata na Kalou me yalododonu; ia era sa vakasaqara nai tovo vou e vuqa.” (Dauvunau 7:29) A cavuta tiko vakararaba na ka e kunea me baleta na kawatamata—na kena cavuti na tagane e dusia na tamata kece, erau sega ni vakatauvatani tiko kina na tagane kei na yalewa. O koya gona, me raici na vosa ena Dauvunau 7:28 ni tukuna tiko ga nodra itovo raraba na tamata ena gauna i Solomoni.
Ia, e rawa ni dua tale na ibalebale ni tikinivolatabu oqori. E rawa tale ga ni vosa ni parofisai, ni se sega ni dua na yalewa e taucoko vakaoti na nona talairawarawa vei Jiova. Ia, e dua ga na tagane sa cakava oya—o Jisu Karisito.—Roma 5:15-17.
[iYaloyalo ena tabana e 31]
“E dua na tagane vei ira na udolu”