Keirau Sega ni Suka Tale ena Veivuke ni Kalou

Qori na vuna era vakatitiqataka kina na tacida na noqu painia. E sega ni vu mai lomaqu noqu qaravi Jiova. Au sega ni taleitaka na cakacaka vakavunau, au dau masulaka tale ga me tau na uca ena Sigatabu meu kua ni vakaitavi kina ena cakacaka vakavunau. Ia keu gole, au na solia ga na mekesini qai sega ni vakayagataka na iVolatabu. A vaqumi au mada ga o tinaqu me rawa niu wili iVolatabu ena ivavakoso. Au sega ni taleitaka meu vuli vakataki au, e sega tale ga noqu isausau vakayalo.

Ena dua na vulaikatakata, a caka e dua na soqo ni tikina (kilai nikua me soqo ni veiwasewase) e Cardiff, mai Welesi. Qori sara ga na gauna e veisau kina vakadua na noqu bula. E tarogi keimami na vakarorogo na tacida e vunau tiko: “O sa yalayala qai papitaiso?” Au kaya lo ga ‘Io’. “O yalataka vei Jiova ni o na qaravi koya ena lomamu taucoko, vakasama taucoko kei na nomu kaukaua taucoko?” ‘Io.’ “E vakavuna mo kua ni painia na tautauvimate se na itavi e vale?” ‘Sega.’ “E tiko e dua na ka e vakataotaka nomu via painia?” ‘Sega.’ “Ke o sauma na sega ena iotioti ni taro, na cava ga o sega ni via painia kina?”

E vaka sa qai tadola mai na noqu vakasama. Au kaya ga: ‘Au vakasabusabutaka tu na noqu bula, au sega ni dei ena noqu yalayala, qai sega niu qaravi Jiova ena lomaqu taucoko.’ Au qai vakasamataka keu vinakata me vakayacora o Jiova nona yalayala vei au, ena vinakati meu dei ena noqu yalayala vua. Au painia veivuke sara ena Okotova 1956.

Ena yabaki tarava ga, au painia tudei qai toki ena dua na ivavakoso e 19 na kena dautukutuku. Niu yaco yani, au lesi sara meu vunau e veimacawa. Ena nodra veivuke na tacida yalovosovoso, au vakavinakataka na ivakarau ni noqu vunau. Ena 1959, au painia lavotaki qai lesi i Aberdeen ena noca kei Sikoteladi. Oti e vica na vula, au sureti meu veiqaravi ena Peceli e Lodoni. Au marau niu lai veivuke ena tabana ni tabaivola me vitu na yabaki.

Au taleitaka na tiko e Peceli, ia na lomaqu se malele tiko ga ina yalava. Au se gone, bulabula, qai tu vakarau me vakayagataki au o Jiova ena vanua cava ga. Ena Epereli 1965, au vakalewena sara na fomu ni vuli ena Koronivuli e Kiliati.

Na yabaki tale ga qori keirau a gole kei na tacida keirau rumu vata, ena dua na soqo e Berlin mai Jamani. Keirau via lai raica tale ga na ilati e wasei rau na tokalau, kei na ra kei Jamani a tara ena vica na yabaki yani e liu.

Dua na siga keirau veitomani tu ena cakacaka vakavunau ena vanua ya. Au qai lesi meu cakacaka vata kei Susanne Bandrock. Keirau mani vakamau ena 1966. Oti e rua na yabaki, keirau sureti me keirau vuli ena ika47 ni kalasi e Kiliati. Qori e dua dina na ka ni veivakalougatataki! E totolo ga na lima na vula ni vuli. Keirau lesi sara i Zaire, sa kilai nikua me Democractic Republic of the Congo. Keirau sega ni namaka me keirau lako e kea! Ni keirau sega tale ga ni kila vinaka na vanua qori. Dina ni keirau lomaleqa, ia keirau ciqoma ga na ilesilesi qai nuitaki Jiova.

Keirau yaco yani ena raraniwaqavuka e kea, oti e vica vata na aua keirau sa yaco ena dua na tauni lailai ni keli koala e Kolwezi. Keirau liaca ni sega ni dua na mataveitacini e tavaki keirau. Keirau qai kila e muri ni bera na kena tukuni vei ira na mataveitacini na neirau yaco yani. A golevi keirau sara mai e dua na vakailesilesi ni raraniwaqavuka, qai vosa mai vakaVaranise ia keirau sega ni kila na ka e kaya tiko. E vuki mai na marama e toka i liu vei keirau qai kaya:“Drau na vesu.”

E vakarota sara na vakailesilesi qori e dua na tagane me kauti keirau ena nona motoka lailai makawa. Keitou veiosoosoti ga i loma, o rau na tagane kei keirau vakaveiwatini. E vaka ga na sara iyaloyalo ni sa sasakurekure na motoka ni keitou muria na gaunisala sukusukura. E voleka ni lutu kece ga mai i tuba na neirau iyaya ni sega ni sogo tu na vanua e biu kina.

Keitou gole sara ina vale ni daukaulotu. Keirau sega ni kila na vanua e tiko kina, ia e kila na vakailesilesi ya. E lala tu na vale qai loka tu na matamata. Ratou gole tu na daukaulotu ina dua na soqo ni veiwasewase, oti me ratou gade tale ga. Dua na ka na katakata ni siga, keirau sega tale ga ni kila na ka me keirau cakava. Sega ni dede e gole sara mai e dua na tacida tagane. E lutu sara ga neirau icegu ni matadredredre tu mai vei keirau. A namaka tiko na vakailesilesi ya, me keirau soli ilavo vua. Ia ni rau veikilai kei na tacida tagane qori, e vakamacalataka sara vua na vuna keirau gole mai kina. Oti e biubiu na vakailesilesi ya, keirau mani gole i vale.

Sega Tale na Suka iMuri

Totolo ga neirau veikilai kei ira na mataveitacini. Era mamarau, ra dauloloma, ra vosota tale ga e levu na ituvaki dredre. Ena 1961, a yaco na itovo kaukaua ena vanua qo ena vuku ni vakaduiduile, kei na tikoyavavala. Oti e vakatabui vakalawa na noda cakacaka ena 1971, keirau mani vakasamataka na cava keirau na cakava.

Keirau sega tale ni via suka imuri. Ia eso na tacida era rere nira vakasaurarataki mera tawaveitovaki, ya mera taura na kad ni soqosoqo vakapolitiki, ra qai dara na kena pini. Ke dua e sega ni via dara na pini, ena sega ni soli vua na veivuke ni matanitu qai vakasaurarataki vei ira na mataivalu, kei na ovisa. Eso na tacida era sega sara ga ni cakacaka, ra qai vakasukai mai koronivuli na gone. Era vesu tale ga e vica vata na drau na tacida. Sa bau gauna dredre dina. Ia era yaloqaqa tiko ga na vo ni tacida mera vunautaka na itukutuku vinaka.

Vinakati me Keirau Vosota

Na veiyabaki kece qori, keirau vakayagataka vakalevu neirau gauna ena veiqaravi vakaivakatawa ni tabacakacaka. Qori na nodra sikovi na tacida ena veikorokoro. Eso na gauna e sega ni rawarawa na bula ena koro. Kena ivakaraitaki, na bure lalai keirau dau vakaicili kina e sega mada ga na vanua me keirau davo kina. Levu gona na gauna ena lauta vakavica na uluqu na katuba ena gauna ni moce. Keirau dau sili ena wai e taki mai uciwai. Ena bogi keirau na vakayagataka na kadrala me keirau wiliwili kina, qai vakasaqa ena buka. Ia ni keirau vakasamataka lesu, qo dina na bula vakadaukaulotu. Keirau marautaka vakalevu na ka keirau cakava, e vakaibalebale tale ga na neirau qaravi Jiova.

Keirau vulica vei ira na tacida me keirau dau mareqeta eso na ka lalai mada ga me vaka na kakana, wai, isulu kei na vale. (1 Timoci 6:8) Keirau okata kece qori me iloloma, keirau na sega vakadua ni guilecava.

Dina ni duidui na dredre keirau sotava kei na ka e sotava na yapositolo o Paula. Ia eso na gauna e dau vakatovolei neirau vakabauta, kei na inaki ni neirau qaravi Jiova. Kena ivakaraitaki, keirau na lakova na gaunisala rerevaki, se bulia e dua na gaunisala vou me keirau lako kina. Ni keirau muria na gaunisala veivatuvatu, ena sasakurekure na neirau motoka. Eso na gauna e dau tao na neirau lori ena nuku, ia ke tau na uca ena tao ena vanua lolobo. Dua na siga keirau draiva me voleka ni 70 na kilomita, qai tao vakatinikarua ena vanua lolobo na neirau motoka.

Ni sotavi na ituvaki dredre ena yalava, keirau vakila ni volekati keirau tu ga o Jiova. Ke yaco e dua na ituvaki keirau sega ni lewa rawa, keirau dau vakila ni tokoni keirau o Jiova me keirau vosota tiko ena marau. E sega ni matau vei Susanne me cakava eso na ka i tuba, se me doudou. Ia e sega vakadua ni vosakudrukudru ni keirau sotava na veika dredre. Dua dina na gauna marautaki qori, e yaga vakalevu, qai levu na ka keirau vulica kina.

Levu na gauna au vesu ni keirau tiko e Zaire. Dua na gauna, au beitaki vakailasu niu volia qai volitaka tiko na daimani e vakatabui vakalawa. Keirau lomaleqa sara ga, ia keirau kaya lo ga, ke vinakata o Jiova me keirau vakacavara vinaka na neirau ilesilesi, ena vukei keirau. A qai yaco dina!

Qaravi Jiova Tiko Ga

Ena 1981, keirau sureti me keirau lai veiqaravi ena valenivolavola ni tabana e Kinshasa. Qori ni oti e dua na yabaki na kena vakadonui vakalawa na noda cakacaka. Era volia sara na tacida e dua na tikiniqele me vakalevutaki kina na valenivolavola ni tabana. Ia ena Maji 1986, a vakatabuya na peresitedi na noda cakacaka ena vanua qo. E cegu na tarataravaki, era sa lesu tale ga e levu na daukaulotu ina nodra vanua.

Ia a vakatarai me keirau tiko tale. Dina nira vakaraici keirau tiko na vakailesilesi, ia keirau cakava na ka keirau rawata me keirau vunau tiko ga. Dua na siga au vesu niu caka vuli iVolatabu tiko. Au mani biu ena dua na qara buto era tu kina e levu na kaivesu. Dua na ka na kena katakata, e boilevu, butobuto qai curuoso. E rarama tiko ga mai e dua na vanua lailai ena lalaga, qai liwa tiko mai kina na cagi. Eso na kaivesu era vesuki au, ra qai kauti au vei nodra iliuliu. E kaya vei au na iliuliu qori: “Lagata na neimami sere ni matanitu!” Au kaya vua: “Au sega ni kila.” Era kaya sara na kaivesu: “Lagata nomu sere ni matanitu!” Au kaya: “Au sega tale ga ni kila.” E qai vakarota na iliuliu meu duri tu ena yasa ni lalaga me 45 na miniti. Toso na gauna, ra qai sereki au na mataveitacini.

Sa qai ca ga na ituvaki ena vanua qo. Oti ga vakalailai keirau lesi sara i Zambia. Dua na ka neirau luluvu ni keirau sa takoso ena iyala ni vanua, ia keirau lomavakacegu tale ga. Keirau nanuma lesu tale na 18 na yabaki neirau veiqaravi tu kina kei ira na daukaulotu yalodina, wili kina o ira na mataveitacini. Dina ni dredre na bula ena so na gauna, ia keirau vakalougatataki. E sega vakadua ni biuti keirau o Jiova. Keirau sa mai kila na vosa vakaSwahili kei na vosa vakaVaranise, o Susanne sa kila tale ga eso na vosa vakaLingala. Keirau marautaka na vuavuaivinaka ni neirau cakacaka vakaitalatala, keirau sa vukei ira tale ga e sivia e le 130 mera papitaiso. Keirau marautaka vakalevu ni keirau vakavulici ira eso tale mera mai kila na dina. Keirau nuidei tale ga ni o ira qori era na vakavulici ira eso tale ena ka dina. Io, e levu era qai mai kila na dina ena vanua qo! Ena 1993, e bokoca na Mataveilewai Cecere na vakatatabu a caka ena 1986. Nikua, sa sivia e le 240,000 na dautukutuku e Congo.

Ni keirau tiko e Zambia, keirau donuya na tara ni valenivolavola ni tabana vou, kei na kena vakalevutaki eso na itikotiko. Gauna qo, sa vakatolutaki na levu ni dautukutuku ni vakatauvatani kei na gauna keirau yaco yani kina ena 1987.

Ia sa vakacava na cauravou a tukuni ni na sega ni dede nona painia? Na veivakalougatataki i Jiova kei na nona veitokoni o Susanne na watiqu, sa 65 na yabaki noqu marautaka tu na cakacaka vakatabakidua, niu sa tovolea qai raica na nona vinaka o Jiova!—Same 34:8.

Dina nida sega ni uasivi, ia eda saga ena noda vinaka kece meda dina ena noda yalayala. Eda kila ni o Jiova ena tokoni keda meda kua ni “suka tale,” ia meda vakalevutaka ga noda vakabauta “meda vakabulai kina.”—Iperiu 10:39.

Sarava na vidio vakavalagi Dayrell and Susanne Sharp: We Promised to Serve Jehovah Whole-Souled.