Duatani Dina na iVukevuke ni Vuli iVolatabu Qo

Ena Janueri 2021, e vakarogoya na iLawalawa Dauvakatulewa na sevutaki ni dua na ivukevuke ena iVolatabu, e kena ulutaga Marau me Tawamudu!a Cava o vakila ni o rogoca qori? E kaya o Matthew, mai Kenada: “Dua na ka noqu marau! Ia au sa qai marau ga vakalevu niu rogoca na kena ivunau qai sarava na kena vidio. E vakamacalataki kina na kena vakarautaki kei na kena vakatovolei ena yalava. Au vinakata sara ga me dua na noqu ilavelave, meu vakayagataka tale ga.”

E vakayagataki ena ivola vou Marau me Tawamudu! e dua na iwalewale vou ni vuli iVolatabu. Ia e tiko eso tale na ka e duidui kina na ivola vou qo kei na so tale na ivola e dau vakayagataki tu i liu ena vuli ivolatabu. O na qai kila ni duatani na ivola Marau me Tawamudu! ni o vakayagataka. Dikeva mada e vica na vuna.

Duatani na iVola Vou Qo

Vavaku na Draunipepa. Na cava e caka kina qori? E tu ena ivola Marau Me Tawamudu! e sivia e 600 na iyaloyalo duiroka, qori e vakatinitaki na iwiliwili ni iyaloyalo e tiko ena ivola Vulica ena iVolatabu! E tu tale ga ena ivola vou qo e levu na vanua meda volavola kina, e sega ni volai kina e dua na ka se me tu kina na iyaloyalo. Qori e rawa ni basika kina e rua na leqa: Ke mamare na draunipepa, o na rawa ni raica na iyaloyalo ena tabana e tarava. Era vakatovolea na tacida tagane ena Tabana ni Tabaivola e Wallkill, Niu Yoka Merika, e va na mataqali pepa. Ratou qai lai dikeva na kena sabolo na Komiti ni Volavola ni iLawalawa Dauvakatulewa qai digitaka na kena e vinaka duadua. E saulevu na pepa qori ni vakatauvatani na kena e dau vakayagataki ena noda ivola. Ia nira wilika na vuli iVolatabu na ivola Marau Me Tawamudu! era na sega ni raica na iyaloyalo e tiko ena tabana tarava.

Duatani na Waqana. Ni vakatauvatani kei na vo ni noda ivola, e duatani na waqana baleta na iubi (laminate) e vakayagataki kina. E sega ni vakayagataki na iubi e caliva, e laurai vinaka gona na iyaloyalo. E taqomaki vinaka na ivola, ena dredre ni vakacacani ni vakayagataki vakalevu. Ia e vakalimataki na kena isau ni vakatauvatani kei na kena e caliva. Era cakacaka vata gona e vica na valenivolavola ni tabana me digitaki na kena e saulailai

Na cava e vakayagataki kina na iyaya saulevu ena ivola vou qo? E kaya e dua na tacida tagane e veiqaravi ena Tabana ni Tabaivola: “Keitou namaka ni na vakayagataki vakalevu na ivola qo. Keitou vinakata gona me vinaka tu ga na kena ituvaki ena gauna mada ga e vakayagataki kina vakalevu.” E kaya o Eduardo, e veiqaravi tiko ena Ofisi ni Tabaivola ena valenivolavola ni tabana e Brazil: “Eda marau nida raica ni vakayagataka na isoqosoqo na iyaya vinaka duadua me vakarautaki kina e dua na ivola totoka qai kaukaua vinaka. Eda na marau tale ga na vakayagataka. Ia se raica tiko ga na isoqosoqo me vakayagataki vakavuku na cau.”

Tabaivola ena Gauna ni Matedewa

E tekivu tabaki na ivola Marau Me Tawamudu! ena Maji 2021. E sega ni rawarawa ni donuya tiko na tete ni matedewa na COVID-19. Ni caka tiko e Peceli na vakatatabu, era sega ni rawa ni lai veivuke yani na tacida era dau gole mai tuba mera bolecakacaka. Era sega tale ga ni rawa nira sureti na tacida mera lai lewenivuvale vou e Peceli. Koya gona, era lewe lailai ga na tacida era veiqaravi ena so na vanua ni noda tabaivola. Eso tale era sogo ena vuku ni veidusimaki ni matanitu.

E wali vakacava na ituvaki qori? Na gauna e vakatarai kina me dola na vanua ni tabaivola, era gole kina eso na tacida ena so tale na tabana e Peceli mera veivuke ena tabaki ni ivola qo. E kaya o Joel mai na Tabana ni Tabaivola mai Wallkill, Merika: “E vakaoti vinaka na cakacaka ena nodra vakuai ira kei na nodra tu vakarau mera vulica eso na cakacaka vou.”

E dina ni dredre na ituvaki, ia sa tabaki rawa e vicavata na milioni na ilavelave ni ivola Marau Me Tawamudu! Levu na ka e vinakati kina: me vaka na peleti ni tabaivola, na kena iubi, na pepa, iqi kei na ka me vakabiri vata kina. Ena imatai ga ni lima na vula ni kena tabaki, e vakayagataki e sivia ni $2.3 na milioni na ilavo ni Merika. Me kua ni vakalusi na ilavo, e laurai me tabaki ga na iwiliwili ni ivola era na lai vakayagataka na ivavakoso yadua.

“Dua Dina na iVola Totoka”

Cava na nodra rai na tacida era dau veivakavulici ena iVolatabu kei na nodra gonevuli me baleta na ivola vou qo. E kaya o Paul mai Ositerelia: “Na levu ni noqu marautaka na ivola qo, au sa dau nanamaki tu ga meu caka vuli iVolatabu. E vakarautaki mai vakamaqosa me rawa nida veivosaki vakalevu kei gonevuli. E matata na kena itukutuku, e tu kina na taro ena uqeta na lomadra na gonevuli, na vidio, na iyaloyalo, na chart kei na isausau mera sasagataka na gonevuli. E dua dina na ivola totoka, ena vakavinakataka sara ga na iwalewale ni noqu veivakavulici.”

E kaya e dua na vuli iVolatabu mai Merika: “Au marautaka dina na ivola vou qo. E vukei au na kena iyaloyalo meu kila kina na veitikina bibi. E tara sara ga na lomaqu na kena vidio qai uqeti au ena ka meu bulataka.” E sa dau tiko wasoma ena soqoni na gonevuli qori, qai dau vuli vakarua ena veimacawa.

E se bera tiko ni tabaki na vicavata na milioni na ilavelave ni ivola Marau Me Tawamudu! ena levu tale na vosa. Ena gauna qo, e sa vakadonuya na iLawalawa Dauvakatulewa me tabaki na ivola qo ena 710 na vosa. Ni vakatauvatani kei na ivola Vulica ena iVolatabu! e levu cake na iwiliwili ni vosa qori ena 340!

E vakailavotaki vakacava na kena tabaki? Qori ena cau ina cakacaka e vuravura raraba, levu vei kemuni oni cakava qori ni oni muria na iwalewale ena donate.jw.org. Oni vakavinavinakataki vakalevu ena nomuni lomasavu, e vakarautaki kina na ivukevuke ni vuli iVolatabu ena vukei ira eso tale mera vulica na veika me baleti Jiova kei na nodra “marautaka na bula tawamudu.”—Same 22:26.