iMatai ni Cakamana i Jisu

Qo sa ikatolu ni siga ni nona dua na isevu ni tisaipeli i Jisu o Nacanieli. Eratou gole vata kei Jisu eso na isevu ni tisaipeli ina vualiku ni yasayasa o Kalili, na vanua eratou cavutu mai kina. Eratou lako tiko ina tauni o Kena, na koro i Nacanieli. E toka o Kena ena veidelana ena vualiku kei Nasareci, na vanua a susu kina o Jisu. Eratou sureti ina magiti ni vakamau mai Kena.

E lako tale ga na tinai Jisu ina vakamau. Ni veikilai vinaka o Meri kei na vuvale eratou caka vakamau, e rairai veivuke kina ena nodra qaravi na vulagi. E kidava totolo ni dua na leqa, e lai tukuna sara vei Jisu: “Sa oti na waini.”​—Joni 2:3.

E vaka me tukuna tiko o Meri me cakava e dua na ka o Jisu ni sa oti na waini. Ni vakayagataka o Jisu e dua na ivosavosa me vakaraitaka ni sega ni via cakava e dua na ka, e kaya: “Tinaqu, na cava me daru leqataka kina qori?” (Joni 2:4) O Jisu e Tui lumuti ni Kalou, na Tamana ga vakalomalagi e dodonu me lewa nona cakacaka, sega ni vuvale se itokani. Sa mani biuta ga o Meri me vakatulewa o luvena, ia e tukuna vei ira na veiqaravi: “Na ka ga e tukuna, ni cakava.”​—Joni 2:5.

E ono na saqa vatu ni wai, e dua e rawa ni tawa kina e sivia e vasagavulu na lita wai. E tukuna o Jisu vei ira na veiqaravi: “Ni tawana na wai ena saqa.” Era cakava sara na dauveiqaravi. Sa qai kaya o Jisu: “Ni takiva eso me kau vua na iliuliu ni soqo.”​—Joni 2:7, 8.

E kurabuitaka na iliuliu ni soqo na totoka ni waini, ia e sega ni kila ni a yaco e dua na cakamana. E kaciva na tagane vou, qai kaya: “Na tamata kece e dau biuta mai liu na waini vinaka, nira sa mateni na tamata, e dau qai biuta mai muri na waini e sega soti ni vinaka. O maroroya tu na waini vinaka me yacova mai qo.”​—Joni 2:10.

Qo na imatai ni cakamana i Jisu. E vakaukauataka sara ga nodratou vakabauta nona tisaipeli vou na cakamana ratou raica qori. Oti e gole sara o Jisu, o tinana, kei ratou na tacina vakacabecabe ina korolevu o Kapenaumi ena vuaira ni baravi ni Wasa o Kalili.