Na Cava O na Solia Mo Rawa Kina ni Bula Tawamudu?

“Na cava e na solia na tamata me i sau ni nona bula?”​—MACIU 16:​26, VV.

1. Na cava e sega ni ciqoma kina o Jisu na veivunauci i Pita?

A SEGA sara ga ni vakabauta na yapositolo o Pita na vosa i Jisu Karisito. A kaya “vakamatata” na nona iLiuliu daulomani ni sa voleka ni vakararawataki, ena mate tale ga! Sega ni vakabekataki ni a vinaka na inaki i Pita ena nona vunauci Jisu: “Me kakua sara, Turaga. E na sega sara ni yacovi kemuni na ka oqo.” A vakanadakui Pita o Jisu qai raici ratou na vo ni tisaipeli. Kena irairai ni ratou duavata kei na rai cala i Pita. Sa qai tukuna vei Pita: “Lako tani ki dakuqu, Setani! Ko sa ka ni veivakatarabetaki vei au, ni sa vakatamata ga na nomu vakasama ka sega ni vaka na vakasama ni Kalou.”​—Mari. 8:​32, 33, VV; Maciu 16:​21-​23, VV.

2. Na cava a tukuna o Jisu ni namaki vei ira kece na tisaipeli dina?

² Na vosa tarava i Jisu a rairai liaca kina o Pita na vuna a cata kina o Jisu nona veivunauci. A “kacivi ira mai na lewe vuqa kei ira talega na nona tisaipeli” o Jisu qai kaya: “O koya yadua sa via muri au, me kakua ni muria na lomana, me colata ga na nona kauveilatai [“kaunirarawa,” NW], ka muri au. Ia ko koya yadua sa via maroroya na nona bula ena vakayalia; ia ko koya yadua ena vakayalia na nona bula e na vukuqu kei nai tukutuku-vinaka, ena maroroya.” (Mari. 8:​34, 35) E macala ena vosa qo ni sa vakarau solia nona bula me mate, ia e vinakati ira tale ga na nona imuri mera na solia nodra bula ina qaravi Kalou. Era na vakalougatataki vakalevu ke ra cakava qo.​—Wilika Maciu 16:27.

3. (a) Na taro cava e tarogi ira kina na vakarorogo o Jisu? (b) Na cava era na rairai vakasamataka na vakarorogo me baleta na ikarua ni taro i Jisu?

³ A taroga tale ga o Jisu e rua na taro vakavure vakasama: “Cava na kena yaga vua na tamata, kevaka e rawati vuravura kece, ka vakayalia na yalona [“nona bula,” NW]? se cava ena solia na tamata mei sau ni yalona [“nona bula,” NW]?” (Mari. 8:​36, 37) Sa macala tu ga na ka eda na tukuna me baleta na imatai ni taro. Ena sega ni yaga vua e dua na tamata nona rawaka e vuravura ke mani mate. Ena yaga ga qai marautaka nona iyau ke se bula tiko. Na ikarua ni taro i Jisu: “Se cava ena solia na tamata mei sau ni yalona [“nona bula,” NW]?” era na rairai vakasamataka o ira na vakarorogo tiko na veibeitaki i Setani ena gauna i Jope: “Na nona ka kecega ena solia na tamata me bula kina.” (Jope 2:4) Ena rairai dina na vosa i Setani vei ira na sega ni qaravi Jiova. Levu era na cakava na ka mera bula kina, ra na tu vakarau mada ga mera cakitaka na ivakavuvuli era tuberi kina. Ia, e duatani sara nodra rai na lotu vaKarisito.

4. Na cava e vakaibalebale kina vakalevu vei ira na lotu vaKarisito na taro i Jisu?

⁴ Eda kila ni sega ni lako mai vuravura o Jisu me vakabulabulataki keda vakayago, me vakavutuniyautaki keda, se me vakabalavutaka na noda bula. Ia, e mai vakarautaka ga na sala meda na bula tawamudu kina ena vuravura vou, eda raica gona vakabibi na inuinui qori. (Joni 3:​16) Rawa ni nanuma e dua na lotu vaKarisito ni qo na ibalebale ni imatai ni taro i Jisu, “Na cava na kena yaga vua na tamata, ke rawaka e vuravura, oti qai sega ni rawata na nona inuinui ni bula tawamudu?” Na kena isau ni sega sara ga na kena yaga. (1 Joni 2:​15-​17) Meda sauma na ikarua ni taro i Jisu, meda taroga mada, ‘Na cava au sa na vakarau solia meu vakadeitaka kina noqu inuinui ena vuravura vou?’ Na isaunitaro qo ena laurai ena ivakarau ni noda bula, ena vakavotuya tale ga na qaqaco ni inuinui qori e lomada.​—Vakatauvatana Joni 12:25.

5. Eda na rawata vakacava na isolisoli ni bula tawamudu?

⁵ O koya gona, a sega ni tukuna tiko o Jisu nida na rawa ni volia na bula tawamudu. Ni qori e isolisoli ga, okati mada ga kina na noda bula lekaleka ena ituvaki qo. Eda sega ni volia rawa se meda cakava kina e dua na ka meda kaya ni dodonu me noda. Na sala duadua ga meda rawata kina na isolisoli ni bula tawamudu oya noda “vakabauti Karisito Jisu,” kei Jiova, ni dau ‘saumi ira era sa dauvakasaqarai koya.’ (Kala. 2:​16; Iper. 11:6) Ia, me laurai na vakabauta ena ka eda cakava, baleta ni “mate . . . na vakabauta ni sa takali na cakacaka.” (Jeme. 2:​26) O koya gona, nida vakasamataka tiko vakatitobu na taro i Jisu, meda vakasamataka tale ga na ka eda tu vakarau ni solia ena ituvaki kei vuravura qo, kei na ka eda tu vakarau ni cakava meda qaravi Jiova kina. Ena vakaraitaka qo na qaqaco vinaka ni noda vakabauta.

“Na Karisito . . . sa Sega ni Kitaka na ka sa Vinakata ga ko Koya”

6. Na cava a dau vakaliuca o Jisu?

⁶ A sega ni raica vakabibi o Jisu na veika e dulaka tu o vuravura ena gauna ya, a vakaliuca ga na veika e bibi cake, qai vorata na idre ni vaqara iyau me vinaka kina na ituvaki ni nona bula. E laurai ena nona bula ni vakuai koya qai talairawarawa vua na Kalou. Ni sega ni cakava na ka me marau kina, e kaya: “Ni’u sa kitaka tikoga na ka sa vinakata ko koya [Kalou].” (Joni 8:​29) Na cava a bolea o Jisu me cakava me na vakamarautaka tiko ga kina na Kalou?

7, 8. (a) Na sala cava a vakuai koya kina o Jisu, a vakalougatataki vakacava? (b) Na taro cava meda vakasamataka?

⁷ A kaya o Jisu vei ratou nona tisaipeli ena dua na gauna: “Sa sega ni lako mai na Luve ni tamata me qaravi, ka me dauveiqaravi ga, ka me solia na nona bula me kedrai voli e lewe vuqa.” (Maciu 20:28) Ni bera vakalailai oya, a tekivu vakadreti ratou nona imuri ni sa voleka “me solia na nona bula,” a qai vunauci koya kina o Pita me kua ni vakasama va ya. Ia, a dei toka ga o Jisu. A solia vakarawarawa na nona bula uasivi ena vuku ni kawatamata. Nona vakuai koya va qori o Jisu, a vakataudeitaka kina na nona bula ena veigauna se bera mai. A vakaturi qai “kau cake e na liga i matau ni Kalou.” (Caka. 2:​32, 33) Sa dua dina na ivakaraitaki vinaka meda muria.

⁸ E vakasalataki ira na lotu vaKarisito e Roma na yapositolo o Paula mera ‘kua ni kitaka na ka sa vinaka ga’ vei ira, qai kaya ni o “Karisito talega sa sega ni kitaka na ka sa vinakata ga ko koya.” (Roma 15:​1-3) O koya gona, eda na bulataka vakacava na ivakasala qo kei na cava eda na vakuai keda mai kina meda vakatotomuri Karisito?

Vinakata o Jiova Meda Qaravi Koya ena Noda Vinaka Taucoko

9. Na cava na ibalebale ni nona yalataki koya vua na Kalou e dua na lotu vaKarisito?

⁹ E dusia vakamatata na Lawa a soli vei Mosese vei ira na Isireli makawa, nira na sereki na bobula Iperiu ena ikavitu ni yabaki ni nodra veiqaravi se ena yabaki ni Jupeli. Ia, e dua tale na ka era a rawa ni cakava na bobula. Ke lomani ira na nodra itaukei, a rawa ni lewa me bobula tiko ga me yacova ni mate. (Wilika Vakarua 15:​12, 16, 17.) Eda vakayacora tale ga na digidigi va qori nida yalataki keda vua na Kalou. Eda soli keda vakarawarawa meda cakava na lomana, eda sa sega ni muri lomada. Noda cakava qori, eda vakaraitaka kina na noda lomani Jiova mai vu ni lomada kei na noda vinakata meda qaravi koya me tawamudu.

10. Na sala cava e taukeni keda kina na Kalou, ena yaga vakacava qo ena noda vakasama kei na ka eda cakava?

¹⁰ Oni vakacaucautaki ke oni sa vulica tiko na iVolatabu kei ira na iVakadinadina i Jiova, oni sa vunautaka tiko na itukutuku vinaka, kei na nomuni dau tiko ena soqoni vaKarisito. Keimami nuitaka ni na yaco totolo mai na gauna oni na yalataki kemuni kina vei Jiova, ni qai taroga na taro vata ga a taroga na turaga ni Iciopea vei Filipe: “A cava sa tarovi au me’u kua ni papitaisotaki?” (Caka. 8:​35, 36) Na nomuni veiwekani kei na Kalou ena tautauvata kei na ka a vola o Paula vei ira na lotu vaKarisito: “Dou sa sega ni nomudou? ni dou sa voli e nai voli.” (1 Kor. 6:​19, 20) Se da nuitaka na bula e lomalagi se i vuravura, nida sa yalataki keda vei Jiova, e sa taukeni keda o koya. Bibi kina meda cavuraka laivi na kocokoco, meda kua tale ga ni “nodra bobula na tamata”! (1 Kor. 7:​23) Eda kalougata dina nida qaravi Jiova ena yalodina, ni na vakayagataki keda ena sala e vinakata kina!

11. Na isoro cava eda uqeti kina na lotu vaKarisito meda cabora? Na cava e okati kina me vaka e vakaroti ena Lawa a soli vei Mosese?

¹¹ E uqeti ira nona itokani vakabauta o Paula: “Mo dou solia na yagomudou mei madrali bula, me savasava, me vinaka vua na Kalou, me nomudoui soro vakayalo.” (Roma 12:1) Era na rairai nanuma kina na lotu vaKarisito Jiu na vakacaboisoro a dau tiki ni nodra sokalou ni bera nira imuri Jisu. Era kila ni a vakarota na Lawa a soli vei Mosese me vakacabori na manumanu vinaka duadua vei Jiova. Ena sega ni ciqomi ke sega ni manumanu vinaka. (Mala. 1:​8, 13) E tautauvata tale ga na noda cabora na yagoda me “[i]madrali bula.” Eda solia vei Jiova na noda vinaka taucoko, sega ni ivovo ni ka, ni oti noda vakaliuca na lomada. Nida sa yalataki keda vua na Kalou, eda na sega ni tu suka meda solia na ‘yaloda’ se na noda bula​—okati kina noda kaukaua, na ka eda taukena, kei na taledi eda sucukaya mai. (Kolo. 3:​23) Eda na vakaraitaka vakacava qo ena noda bula?

Vakayagataka Vakavuku na Gauna

12, 13. Na cava e dua na sala eda na solia kina vei Jiova noda vinaka taucoko?

¹² Dua na sala eda solia kina vei Jiova noda vinaka oya noda vakayagataka vakavuku na gauna. (Wilika Efeso 5:​15, 16.) Ena gadrevi kina na lewa matau. Na veitemaki ni vuravura kei na noda sucukaya mai na ivalavala ca ena uqeti keda meda vakayagataka noda gauna meda marau ga kina se me yaga ga vei keda. Io, “sa dui vagauna na ka kecega,” okati kina na ka ni veivakamarautaki kei na noda cakacaka saumi meda rawa ni vakayacora kina noda itavi vaKarisito. (Dauv. 3:1) Ia, e uqeti na lotu vaKarisito yalayala oti me dau veiraurau na ka e cakava, me vakayagataka vakavuku tale ga na nona gauna.

¹³ Ni sikovi Aceni o Paula a dikeva ni “sega na ka tani era sa daukitaka ko ira kecega na kai Aceni, kei ira na vulagi era sa tiko kina, me ra veitukutukunitaka ga se rogoca, e dua na ka vou.” (Caka. 17:21) Levu tale ga nikua era dau vakalusi gauna. Nikua sa vakalusi gauna vakalevu noda sara retioyaloyalo, qito ena vidio kei na Internet. E levu tale na veika va qori e dau vakalusi gauna. Ke da vakamalumalumu ena veika qo, ena rawa nida vakawaletaka na noda veika vakayalo. Sa rawa nida lai tukuna nida sa rui osooso meda qarava kina na veika “e vinaka cake.”​—Fpai. 1:​9, 10, VV.

14. Na taro cava meda vakasamataka vakabibi?

¹⁴ O koya gona, nida dauveiqaravi yalayala i Jiova, meda taroga, ‘E okati tiko beka ena noqu ituvatuva ni veisiga na wili iVolatabu, meu vakasamataka vakatitobu na ka, kei na masu?’ (Same 77:12; 119:97; 1 Ces. 5:​17) ‘Dau tiko beka na gauna meu vakavakarau kina ina soqoni? E dau veivakauqeti na noqu saumi taro ena soqoni?’ (Same 122:1; Iper. 2:​12) E kaya na Vosa ni Kalou ni o Paula kei Panapasa erau ‘tiko vakadede qai vosa doudou ena vuku ni Turaga [o Jiova].’ (Caka. 14:3) Rawa beka ni o veisautaka na kemu ituvaki me levu kina na gauna, se me bau ‘dede’ na gauna o vakayagataka ena cakacaka vakavunau, de dua mo painia?​—Wilika Iperiu 13:15.

15. Sala cava era vakayagataka kina vakavuku na qase na nodra gauna?

¹⁵ Ni veisiko yani ina ivavakoso e Anitioki o Paula kei Panapasa, erau “tiko vata vakadede kei ira sa lotu [“tisaipeli,” NW]” me rau vakayaloqaqataki ira kina. (Caka. 14:28) E tautauvata tale ga ena gauna qo, nira vakayagataka e levu na gauna na qase ni ivavakoso dau loloma mera dau veivakaukauataki kina. Era dau cakacaka vakavunau, era dau cakacaka tale ga vakaukaua mera vakatawana na qelenisipi, ra lai vaqarai ira na sipi era sa yali, vukei ira na tauvimate, ra qai qarava e levu na itavi ena ivavakoso. Ke o tagane papitaiso oti, ena rawa beka ni o sauva na itavi dokai qo ke veiganiti na kemu ituvaki?

16. Vakamacalataka e so na sala “me da caka vinaka [kina] vei . . . ira era veitokani e na vakabauta.”

¹⁶ Levu era marautaka nodra vukei ira e so tale era vakaleqai ena leqa tubukoso se na leqa eda vakavuna ga na tamata. Me kena ivakaraitaki, e dua na tacida yalewa sa yabaki 60 vakacaca e veiqaravi tiko e Peceli, a lako sara vakayawa ena vica na gauna me lai veivuke vei ira na vakaleqai. Cava e vakayagataka kina va qori nona siga ni gade? E kaya: “Dina niu sega ni kenadau ena dua na taba ni cakacaka, ia e ka dokai meu cakava na itavi a lesi mai. E vakayaloqaqataki au niu raica na dei ni nodra vakabauta na mataveitacini era vakayalia na ka era taukena.” Kena ikuri, e vica na udolu e veiyasa i vuravura era veitokoni ena tara ni Kingdom Hall kei na Assembly Hall. Nida vakaitavi ena cakacaka va qo, eda sega kina ni tu suka “me da caka vinaka vei . . . ira era veitokani e na vakabauta.”​—Kala. 6:​10.

“Au sa Tiko Vata kei Kemudou e na Veisiga Kecega”

17. Na cava o sa tu vakarau mo solia mo rawata kina na bula tawamudu?

¹⁷ Sa vakarau takali yani o ira na sega ni kila na Kalou. Eda sega ni kila na gauna ena yaco kina qori. Ia, eda kila ni “sa vakalekalekataki na gauna sa vo,” vaka kina ni sa “lako tani yani nai valavala ni vuravura oqo.” (Wilika 1 Korinica 7:​29-​31.) E vakaibalebale kina vakalevu na taro i Jisu: “Cava e na solia na tamata me i sau ni nona bula?” Macala nida na tu vakarau meda cakava na ka e vinakata o Jiova meda rawata kina “na bula dina.” (1 Tim. 6:​19) Io, meda kua ni taura vakamamada na veivakadreti i Jisu, oya meda ‘muri koya tiko ga,’ da qai ‘vakasaqara taumada na Matanitu ni Kalou.’​—Maciu 6:​31-​33; 24:13.

18. Na cava eda nuitaka? Na vuna?

¹⁸ E dina ni sega ni ka rawarawa na noda muri Jisu, qai so mada ga era sa vakayalia na nodra bula ena ituvaki qo me vaka a tukuna o koya. Ia, me vakataki Jisu, eda na saga sara me kua ni rawai keda na rai cala a tu vei Pita ena nona kaya: “Me kakua sara, Turaga.” Eda vakabauta na vosa a tauca o Jisu vei ira na nona imuri lumuti ena imatai ni senitiuri: “Au sa tiko vata kei kemudou e na veisiga kecega, ka yacova nai vakataotioti kei vuravura.” (Maciu 28:20) O koya gona, meda cakacaka sara ena kena levu eda rawata, nida vakayagataka noda gauna kei na taledi eda sucukaya mai meda veiqaravi tabu kina. Noda cakava qori, eda sa vakaraitaka kina nida nuitaki Jiova ni na taqomaki keda ena gauna ni veivakararawataki levu se me vakaturi keda ena vuravura vou. (Iper. 6:​10) Eda na vakaraitaka kina noda raica vakabibi na isolisoli ni bula.

O na Sauma Vakacava?

• E vakasakiti vakacava nona tu vakarau o Jisu me qarava na Kalou kei nona kauaitaki ira na tamata?

• Na cava meda kua ni muri lomada ga kina? Eda na cakava vakacava qo?

• Na isoro cava a vakadonuya o Jiova e Isireli makawa? Na cava eda vulica kina ena gauna qo?

• Sala cava soti eda na vakayagataka kina vakavuku na noda gauna?

[iYaloyalo ena tabana e 26]

A dau vakayacora o Jisu na ka e vakamarautaka na Kalou

[iYaloyalo ena tabana e 28]

Era solia nodra vinaka kece o ira na Isireli yalodina mera tokona na sokalou dina

[iYaloyalo ena tabana e 29]

Eda vakamarautaka na Kalou nida vakayagataka vakavuku noda gauna