Taro na Dauwiliwili . . .

Na cava nona rai na Kalou keu vakatavako?

▪ Ena rairai taroga na taro qori e dua na tamata vinaka, me vaka ni sega ni cavuti ena iVolatabu e dua na lawa me baleta na tavako. Kena ibalebale qori ni dredre meda kila nona rai na Kalou me baleta na tavako? Sega.

E tukuni ena iVolatabu ni “vakavuna na Kalou na volai ni iVolatabu kece.” (2 Timoci 3:16) E tu ena iVolatabu na ivakavuvuli kei na itukutuku matata me baleta na nona vinakata na Kalou meda qarauna na noda bula. Meda dikeva mada e liu na ka era raica na daunivakadidike me baleta na ka e rawa ni yacovi keda nida vakayagataka na tavako. Oti eda na qai dikeva na sala e salavata kina na ka e vakavuvulitaka na iVolatabu kei na ka era kunea qori.

O koya e vakatavako ena vakaleqa ga nona bula, e vakavuna tale ga vakalevu na mate a rawa ni wali. E Merika, e laurai ni 1 mai na 5 era mate ena vakayagataki ni tavako. Ena vanua qori, e tukuna e dua na ripote mai na National Institute on Drug Abuse, ni levu cake na iwiliwili ni tamata era mate e veiyabaki ena vakayagataki ni tavako ni laurai vata kei na iwiliwili kece ni tamata era mate ena vakayagataki ni ‘alakaolo, wainimate gaga, na laba, kuna, coqa, kei na AIDS.’

O ira na dauvakatavako era dau vakaleqai ira eso tale. Ke lailai mada ga na kubou ni tavako eda ceguva, e se rawa ga ni veivakaleqai. Ena gauna era ceguva kina na sega ni vakatavako na kubou ni tavako, e vakalevutaka ina 30 na pasede na nodra rawa ni tauvi kenisa ni yatevuso kei na mateniuto. Ena vica ga na yabaki sa oti, era sa kunea na vuniwai e dua tale na ka rerevaki e vu mai na vakatavako, era vakatoka me “third-hand smoke.” Na vosa qori e dusia na vuru ni tavako era takava na isulu, butubutu, se lutu ena so tale na ka. Na vuru ni tavako qori e poisoni, e dau vakaleqa na nodra bula na gone qai rawa ni vakaberaberataka na nodra vulica na ka.

Dauveivakabobulataki na tavako. O koya e dau vakatavako ena bobula tu ena ivakarau ca qori. Ni dua e sa bobula ena nicotine, e dua na wainimate e tiko vakalevu ena tavako, era vakabauta na daunivakadidike ni na dredre vua me biuta.

Na cava e tukuna na iVolatabu me baleta na itukutuku qori? Raica mada qo:

E vinakata na Kalou meda doka na bula. Ena Lawa a solia na Kalou vua na matanitu o Isireli, e tukuna ni bibi mera doka na bula ke ra vinakata mera vakamarautaki koya. (Vakarua 5:17) E vinakati vei ira na Isireli mera viria yavoki e dua na bai ena delavuvu ni nodra vale. Na vuna? E raraba na nodra delanivale, era dau vakayagataka me vanua ni vakacegu. Na bai qori e taqomaki ira kina na vuvale kei na so tale mera kua ni lutu ra qai mavoa se ra mate sara ga. (Vakarua 22:⁠8) Mera qarauna tale ga na Isireli me kua ni veivakamavoataki na nodra manumanu. (Lako Yani 21:28, 29) O koya e vakatavako, e beca na ivakavuvuli era vakabibitaki ena lawa oya. E via vakaleqa ga na nona bula, ena vakaleqa tale ga na nodra bula o ira na tiko volekati koya.

E vinakata na Kalou meda lomani koya kei ira na wekada. E tukuna o Jisu Karisito ni dodonu vei ira na nona imuri mera muria e rua na ivunau levu duadua. Oya mera lomana na Kalou mai na lomadra taucoko, nodra bula taucoko, nodra vakasama taucoko, kei na nodra kaukaua taucoko, mera lomani ira tale ga na kainodra me vaka ga nodra lomani ira. (Marika 12:28-31) E isolisoli ni Kalou na bula, ia ni dua e vakatavako e vakaraitaka ni beca na isolisoli qori qai sega ni lomana na Kalou. (Cakacaka 17:26-28) Nona ivakarau ni bula e rawa ni veivakaleqai sara ga vei ira tale na so. Ke tukuna mada ga ni lomani ira na wekana, na nona ivalavala ena vakalasui koya.

E vinakata na Kalou meda kua ni cakava na ivalavala dukadukali. E vakasalataki ira na lotu vaKarisito na iVolatabu mera vakasavasavataki ira mai “na dukadukali kece vakayago kei na dukadukali vakayalo.” (2 Korinica 7:1) E macala ga ni dau vakadukadukalitaka na tamata na vakatavako. Ia vei ira na via biuta na vakatavako mera vakamarautaka kina na Kalou, ena sega ni rawarawa mera cakava qori. Ena veivuke ga ni Kalou, e rawa nira galala mai na nodra bobula tu ena ivakarau dukadukali qori.