O Vakavinavinakataka Beka na Yalovosovoso i Jiova?
1 Ke sega na yalovosovoso i Jiova ena loma ni 10, se 20 oqo na yabaki se sivia me rawa ni toso tale kina na cakacaka vakavunau, o na mai kila beka na ka dina? Eda vakamuduotaka na nona vakatara mera “veivutuni” e levu tale. Ia, na siga levu ni veilewai i Jiova “ena lako mai me vaka na daubutako.” (2 Pita 3:9, 10) O koya gona, me kua ni tauri cala na nona yalovosovoso na Kalou me nanumi ni sa rui berabera na nona kauta mai na icavacava ni ituvaki ni veika oqo.—Apak. 2:3.
2 Lomani Ira na Tamata: E dredre meda kila se vakacava sara tu mada na levu ni vosota vakadede i Jiova. Me kua tale ga nida lecava na vuna. (Jona 4:1-4, 11) E raica na kawatamata o Jiova, qai lomani ira ena ituvaki vakaloloma era tu kina. E vaka tale ga kina o Jisu. Ena nona lomani ira na lewe vuqa a vunau vei ira, a vinakata o koya me vakarabailevutaki na cakacaka ni veivakatisaipelitaki mera rawata kina e levu na bula tawamudu.—Maciu 9:35-38.
3 Ni yaco e dua na ka rarawa se leqa tubukoso, e sega li ni dau tubu na noda lomani ira era sega tu ni kila na ka dina? Era sa vaka tu na “sipi sa sega na nodrai vakatawa” na tamata edaidai, sega wale ga ena nodra saga mera vosota na veilecayaki ni bula ena vuravura oqo, ena nodra via kila tale ga se cava na kena ibalebale. (Mari. 6:34) Nida yalogu ena noda vunautaka na itukutuku vinaka, e sega wale ga nida vakacegui ira era sa vakarautaka tu na lomadra, eda vakaraitaka tale ga nida vakavinavinakataka na yalovosovoso i Jiova.—Caka. 13:48.
4 E Bibi na Noda Cakacaka: Era a papitaiso ena yabaki sa oti e lewe 323,439, ra tiko ena iVakananumi e sivia na lewe 14,000,000. E kena ibalebale oqo ni se vo e levu tale mera na bulata na kena vakarusai na ituvaki ni veika ca oqo! Se na vakacava sara mada na iwiliwili ni “[i]soqosoqo levu sara,” eda sega ni kila. (Vkta. 7:9) Se na vakacava sara mada na dede ni gauna meda vakayacora tiko kina na noda ilesilesi ni vunau, eda sega ni kila. E kila ga o Jiova. Ena vunautaki tiko na itukutuku vinaka me yacova na kena iyacoyaco e vinakata o koya, “sa na qai yaco mai na i vakataotioti.”—Maciu 24:14, VV.
5 Sa lekaleka sara na gauna, sa voleka sara na siga ni Kalou. (1 Kor. 7:29a, VV; Iper. 10:37) E sega ni vakabekataki “ni sa voleka sara oqo na gauna meda vakabulai kina mai na gauna eda a sa qai vakabauta kina.” (Roma 13:11, VV) Kua nida lecava na vu ni nona yalovosovoso na Kalou. Meda vunau ga vagumatua me rawa nira mai vakila tale ga na levu ni yalololoma i Jiova o ira sa lomana na yalododonu.