Epereli​—Meda ‘Cakacaka ka Vosota’

¹ Na veimacawa volekata na iVakananumi e gauna bibi vei keda na tamata i Jiova. E gauna meda vakananuma kina vakatitobu na ka eda sa mai rawata ena mate i Karisito kei na noda inuinui soli vakalou e rawati ena vuku ni nona dra. Na cava o bau nanuma ni o vakasamataka lesu na ika19 ni Epereli ni yabaki sa oti? O se nanumi ira tiko o raici ira ena bogi oya? Na bibi ni veimaliwai vakayalo ena iVakananumi? Na titobu ni veivosaki vakaivolatabu kei na masu? E rairai a nomu inakinaki me titobu sara ga nomu vakaraitaka na nomu vakavinavinakataka na loloma i Jiova kei Jisu ena vukumu. Ni o vakasamataka vakabibi na inaki ni soqo oya, e tarai iko vakacava?

² E macala ni levu tu na sala eda vakaraitaka kina na tamata i Jiova na noda vakavinavinaka, sega ena noda vosa ga. (Kolo. 3:15, 17) Ena Epereli sa oti, eda vakaraitaka kina na noda vakavinavinakataka na isolisoli ni bula e solia o Jiova nida vakalevutaka kina na noda cakacaka vakaitalatala vakarisito. A 306 kina na painia veivuke e Viti, 20 tale mai Kiribati qai 11 mai Tuvalu. Na nodra sasaga kei na nodra cakacaka tale ga na vo ni dautukutuku e rawati kina na tubu. Eda reki vakalevu nida raica ni tauyavu kina e levu na vuli iVolatabu vovou kei na kena tubu tiko ga na kedra iwiliwili na tiko ena iVakananumi!

³ Io, na dei ni noda inuinui e uqeti keda meda cakacaka vagumatua. Me vaka e vola na yapositolo o Paula: “Sa i koya oqo keitou sa cakacaka kina ka vosota na veivakalialiai ni keitou sa laiva na neitou vakanuinui vua na Kalou bula, na i vakabula ni tamata kece ga, ka vakauasivi ko ira era vakabauta.”​—1 Tim. 4:10, VV.

⁴ O na vakaraitaka vakacava na nomu vakabauta na isolisoli ni bula e vakarautaka o Jiova ena vula ni iVakananumi oqo? Ena Okosita 1998 eda a yacova kina na iwiliwili levu duadua ni dautukutuku e Viti, eda le 2,021. E rawa beka nida sivita na iwiliwili oya ena Epereli oqo? E rawa. Mera vakaitavi kece ena cakacaka vakavunau na dautukutuku, o ira na papitaiso kei ira na se bera ni papitaiso. Ke ra yacova na kena ivakatagedegede e levu na ka vou, e ganiti ira tale ga mera na vakaitavi kina. O koya gona, ni o lalawataka tiko mo na vakalevutaka nomu cakacaka ena Epereli oqo, vakasamataka e so na sala o rawa ni veivakauqeti kina, mo dau salavata tale ga kei ira na dautukutuku vou, vaka kina o ira na sega soti ni se matau sara.

⁵ Vukea e So Mera Dautukutuku Tale: Ke o kila tiko e so era sa sega tu ni vunau ena dua se rua na vula, de vinaka mo uqeti ira qai sureti ira mo ni veitomani ena cakacaka vakavunau. Ke so ena ivavakoso sa ra mate tu vakayalo, era na saga na qase mera na sikovi ira qai vakayaloqaqataki ira mera tekivu tale ena Epereli.

⁶ O keda kece meda masuta tiko ga na yalo i Jiova me vakaukauataki keda ena nona cakacaka. (Luke 11:13) Na cava meda cakava meda rawata kina na yalo oya? Wilika na Vosa uqeti ni Kalou. (2 Tim. 3:16, 17) Meda “rogoca sara na ka sa tukuna na Yalo Tabu vei ira na veisoqosoqo lewe ni lotu” ena noda tiko ena lima na soqoni e veimacawa. (Vkta. 3:6) Oqo e gauna vinaka meda vukei ira kina na dautukutuku vakavudua kei ira na dautukutuku mate mera vakavinakataka na ivakarau ni nodra vuli qai wasoma tale ga nodra tiko ena soqoni. (Same 50:23) Nida cakava oqo eda yadrava tale tiko ga kina na noda bula vakayalo. Ia e gadrevi e dua tale na ka.

⁷ E vakamacalataka na yapositolo o Pita ni Kalou e solia na yalona tabu “vei ira sa talairawarawa vua.” (Caka. 5:32) Na talairawarawa oya e okati kina na noda rogoca na ivakaro ‘meda vunau vei ira na tamata, ka vakadinadina.’ (Caka. 1:8; 10:42) Dina ga nida gadreva na yalo ni Kalou me vakaukauataki keda meda vunau rawa kina, sa na qai vukei keda ga vakalevu na yalona nida sa tekivu vakaraitaka na noda gagadre meda vakamarautaki Jiova. Meda kua mada ga ni vakalailaina na bibi ni noda dau vakaliuliu meda talairawarawa!

⁸ Vukei Ira na Gone: Ra itubutubu, oni sa bau raici ira na luvemuni nira via tukuna na ka dina vei ira tale e so? Oni dau salavata ina cakacaka vakavunau? Era gone ivakaraitaki vinaka? Ke vaka kina, na cava era se sega kina ni dautukutuku? Raica e dua vei iratou na lewe ni Komiti ni Cakacaka ni iVavakoso, me rawa ni vakadeitaki kina se sa ganiti luvemu me dua na dautukutuku ena Epereli. (Raica na ivola na Cokonaki, taqana 99-100.) Nanuma tiko ni o ira na luvemuni era rawa ni vakaitavi vakalevu ena kaci ni vakavinavinaka vei Jiova ena vula ni iVakananumi oqo.​—Maciu 21:15, 16.

⁹ Dua na tina lotu Vakarisito mai Georgia, Mereke, e dau uqeti luvena goneyalewa lailai me dau tukuni Jiova. Ena yabaki sa oti, ni rau cakacaka vakaitalatala tiko vakaveitinani, a solia kina na goneyalewa lailai oqo na brochure na Loma ni Kalou vua e dua na turaga qai vakamacalataka vakalekaleka vua na lewenivola. E tarogi koya na turaga oya: “O yabaki vica?” E sauma na gone oqo: “Vitu.” E drukataka na turaga oya na qaseqase ni nona ivakamacala. E qai kilai e muri, ni se gone na turaga oya, a dau veimaliwai tu kei ira na iVakadinadina, ia a sega vakadua ni bulataka na ka dina. Sega ni dede, sa ratou vuli iVolatabu vakaveitamani.

¹⁰ E levu na gone sa ra dautukutuku tiko, eda marautaka na noda dau salavata ena cakacaka vakavunau. Era rawa ni veiuqeti ra qai vakayaloqaqataki ira tale na vo ni nodra icaba. Na vula o Epereli e gauna vinaka tale ga vei ira na vuvale yadua mera vaqaqacotaka na nodra bula vakayalo ena nodra cakacaka vata ena veiqaravi tabu. Mera liutaka sara ga na ulunivuvale.​—Vkai. 24:27.

¹¹ Vukei Ira na Ka Vou: Vakacava o ira na ka vou o vakavulici ira tiko ena iVolatabu? E rawa beka nira vakaitavi ena sasaga lavotaki ena Epereli? Era rairai vakaraitaka na nodra gagadre mera tukuna yani na veika era vulica ni sa kovuti na wase 2, parakaravu 22, se wase 11, parakaravu 14, ena ivola na Kila. Ke sa voleka ni oti na ivola, tu vakarau mo vakamacalataka vakavinaka na tikina oqo ni kovuti na wase 18, parakaravu 8, e kaya: “De o sa na vinakata mo tukuna na ka o vulica tiko vei ira na wekamu, nomu itokani, kei ira tale na so. De o sa cakava sara tiko oqo, me vakataki Jisu ga ena nona dau tukuna na itukutuku vinaka ena gauna cava ga vei ira na tani. (Luke 10:38, 39; Joni 4:6-15) O sa rairai vinakata oqo mo vakarabailevutaka na nomu cakacaka.” Era vakatale beka ga kina o ira o vakavulici ira tiko?

¹² E vakabauta na Vosa ni Kalou o nomu gonevuli? Sa bulataka tiko na ivakavuvuli vakaivolatabu? Sa veisautaka nona bula me salavata kei na ivakatagedegede vakalou? Sa dau tiko ena soqoni vakaivavakoso? E via qarava na Kalou o Jiova? Vakacava mo uqeti koya me raici iratou na qase me ratou lewa se sa ganiti koya dina me dautukutuku bera ni papitaiso, me rawa ni drau na cakacaka vata ena Epereli? (Raica na ivola na Cokonaki, taqana 97-9.) Ena sala oqo sa na tekivu vakila sara ga o koya na kena na tokoni koya na isoqosoqo i Jiova me qaravi Jiova.

¹³ E so na gonevuli e totolo nodra toso mai vei ira tale na so. O koya gona, na ivakasala e tiko ena Noda Cakacaka Vakaitalatala ni Matanitu, June 2000, taqana 4, parakaravu 5-6, e levu era sa vulica tiko na ikarua ni ivola kei ira era vakaraitaka tiko na nodra tataleitaki, ia e se gadrevi tiko ga mera vukei me wasoma nodra veimaliwai kei keda. Eda nuitaka ni o ira na lomadina oqo era na yaco tale ga mera mai tisaipeli dina i Karisito, “se gauna lekaleka se gauna balavu.” (Caka. 26:29, VV) Ia, ke sa “gauna balavu” na nomudrau vuli, e gauna vinaka vua na gonevuli na vula ni iVakananumi me sa tekivu vakaraitaka kina na titobu ni nona vakavinavinakataka na ivoli i Karisito, se vakaevei?

¹⁴ Sala Mo Vukei Ira Kina Mera Vakaitaki: Levu na ka eda vulica meda vukei ira kina na sa ganiti ira mera lako ina cakacaka vakaitalatala nida dikeva na sala ni nona veituberi o Jisu. E sega ni raica ga e dua na ilala levu o Jisu sa tukuna sara vei iratou na nona yapositolo me ratou tekivu vunau. Taumada e vakabibitaka na kena gadrevi na cakacaka vakavunau, e vakabibitaka na masu, qai dusimaki iratou ena tolu na ka: kedratou isa, yalava ni cakacaka, kei na itukutuku. (Maciu 9:35-38; 10:5-7; Mari. 6:7; Luke 9:2, 6) O rawa tale ga ni cakava oqo. Se o vukea tiko na luvemu, dua na vuli iVolatabu vou, se dua na dautukutuku mate, de vinaka mo vakamuria vinaka na ka e vakaturi tiko oqo e ra.

¹⁵ Vakabibitaka na Ka e Gadrevi: Vakabibitaka vua o vukea tiko na bibi ni cakacaka vakavunau. Talanoataka vua ena marau na bibi ni cakacaka oqo. Tukuna e so na itukutuku ni ka sa rawata tiko na ivavakoso ena cakacaka vakaitalatala. Vakaraitaka na yalo e vakaraitaka o Jisu ena Maciu 9:36-38. Uqeti koya o vukea tiko me yaco me dua na dautukutuku, se uqeti koya na dautukutuku mate me masulaka na nona sa na vakaitavi ena cakacaka vakaitalatala, me masulaka tale ga me vuavuaivinaka na cakacaka e vuravura raraba.

¹⁶ Uqeti Koya me Vakasamataka ni Levu na Gauna Veiganiti e Rawa ni Vunau Kina: Tukuna ni rawa ni sota kei ira na lewe ni iwasewase ni vulivola me tomani ira ena cakacaka vakavunau e veivale. Vakamacalataka na yaga ni vunau vei ira na wekada kei ira eda tiko veitikivi, se ena gauna ni vakasigalevu vei ira eda cakacaka vata kei ira eda vuli vata. Ni vodo basi se cava tale, e rawa ni tekivutaka na veivosaki ena nona kauaitaki ira na pasidia. Nida vakaliuliu, ena rawa kina e so na gauna vinaka ni vunau. E levu tu na gauna veiganiti meda wasea kina na noda inuinui “e na veisiga.”​—Same 96:2, 3.

¹⁷ De vinaka mo drau cakacaka vata vakavunau e veivale kei na dautukutuku vou ena gauna totolo duadua e rawa. Ke nomu isausau mo vakalevutaka na nomu cakacaka vakavunau ena Epereli, kerea na tacida e qarava na yalava ni cakacaka se rawa ni dua nomu yalava. Ke rawa, ena levu kina nomu gauna mo cakacakataka vakavinaka. Kaya mada, ke sa oti nomu cakacaka vakavunau se o lako tiko ina soqoni, se dua tale na vanua, o qai raica beka ni dua e tiko ena dua na vale a lala tu ena gauna o lai vunau kina e kea, se o a kunea kina e dua na tataleitaki, sa rawa sara ni o sikova ke veiganiti, ni se gauna vinaka mo cakava kina. O na marautaka vakalevu na nomu cakacaka vakaitalatala ni yaga na ka o cakava.

¹⁸ Vakarautaka e Dua na iTukutuku Veivakauqeti: Sa bau dua na ka me dua e taleitaka me wasea na itukutuku ni Matanitu ni Kalou, qai ka toka ni bolebole me lomadei ni vunautaka, vakabibi ni se ka vou se sa sega tu ni vunau ena dua na gauna balavu. E yaga na gauna nida vukei ira na ka vou kei ira na mate tu vakayalo. Na Soqoni ni Cakacaka kei na soqoni ni cakacaka vakavunau eda vulica kina e levu na iwalewale vinaka ni vunau, sega ni wili kina na noda vakavakarau ga vakataki keda.

¹⁹ O na vukei ira vakacava na ka vou mera vakavakarau ina cakacaka vakavunau? Tekivu ena soli ivoladraudrau, me rawarawa qai lekaleka! Kerei ira mera vakasamataka mada e so na itukutuku ena walesi se retioyaloyalo era na kauai kina vakalevu o ira ena yalava ni vunau, qai raica e dua na ulutaga ena ivoladraudrau vou e lako vata kei na itukutuku oya. Drau vakatovotovotaka vata na iwalewale oya, drau vakayagataka sara ena dua na gauna totolo ena cakacaka vakaitalatala.

²⁰ Sagai me Rawati na Tubu ena Gauna Mai Muri: Na iwiliwili ni tiko ena iVakananumi e vuravura raraba ena yabaki sa oti a sivia na 14.8 na milioni. Era sivia toka ga vakalailai na ononamilioni na dautukutuku. Kena ibalebale ni rauta ni 8.8 na milioni na tataleitaki era a tiko ena soqo lavotaki oqo mera rogoca kina na kena vakamacalataki e dua na ivakavuvuli vakaivolatabu bibi. Eda mai veikilai voleka sara kei na so vei ira, de ra vakadrukai sara ga. Levu vei ira era dau vakacaucautaki keda, ra dau cau ina noda cakacaka ni veivakavulici ena vuravura raraba, ra qai dau totaki keda ke so era vosa vakatanitaki keda. Na ilala levu oqo ena rawati kina na tubu ena gauna mai muri. Eda na vukei ira vakacava mera toso?

²¹ Levu na ka vou era tiko ena iVakananumi era a sureti mai. Kena ibalebale era sa veikilai tiko kei na so na lewenisoqo. Ke dua eda sureta e tiko ena iVakananumi, e noda itavi meda kauaitaki koya da qai vukei koya me yaga vua na soqo. Ni na oso tiko na valenisoqo, vakarautaka vua na nona idabedabe. Solia vua e dua na iVolatabu, drau vakayagataka vata na nomu ivolanisere. Sauma na taro kece e taroga. Na nomu veikauaitaki vakayalololoma ena rawa sara ga ni uqeta na nona tataleitaki. O keda kece meda cakava​—ke da raica e dua na mata vou, da kidavaki koya, da veitalanoa vakalekaleka me rawa nida veikilai.

²² E rawa ni vakavure vakasama vua e dua na nona tiko ena iVakananumi. Nona mai tiko ena soqo oqo e rairai vakaraitaka ni se sega ni kunea na ka e vaqara tiko ena so tale na lotu, mani nanuma kina me dikeva sara vakavinaka na ka e raica vei keda. Na kena vakamacalataki na isolisoli ni ivoli uasivi oqo e rairai ka vou vua e dua a sega tu ni dau vakasamataka vakabibi na loloma tawavakaiyalayala i Jiova. Rairai sa raica rawa o koya nida duidui​—eda dina, veikauaitaki, yalololoma, da qai dau veidokai. Na noda valenisoqo e sega kina na ivakatakarakara se so na iyaloyalo vakalotu e sega ni vakaibalebale me vaka e dau raica ena so tale na valenilotu. Ena lauti ira nira cavutu mai na dui ivakarau ni bula na vakarorogo, qai sega ni kau wavoki na veleti ni soli. Na ka era raica e rawa ni tarai ira mera lesu tale mai.

²³ Ni oti na iVakananumi, me qarauni sara na nodra lesuvi mera vukei na ka vou era a tiko kina. Ke o a sureti ira na ka vou, e tiko na nomu itavi vei ira. Ni bera nira lesu, tukuna vei ira na soqoni tale e so e dau caka ena Kingdom Hall. Tukuna na ulutaga ni vunau soqovi levu e tarava. Vakamacalataka vei ira na vanua kei na gauna e dau caka kina na Vulivola ni iVavakoso e voleka vei ira. Solia vei ira na ivola na Vuvale, qai vakamacalataka vei ira na ulutaga ena veivosakitaki tiko ena macawa ni 30 Epereli.

²⁴ Tuvanaka ni o na sikovi ira e nodra vale. Vakadeitaka me tiko nodra brochure na Loma ni Kalou kei na ivola na Kila, mera na kila vinaka kina na yavu ni ivakavuvuli vakaivolatabu. Ke se bera nira vuli iVolatabu, sureti ira mera vuli. Vakatura mera wilika na brochure Vakadinadina i Jiova Ena i ka Ruasagavulu ni Senitiuri, na brochure oqo e vakamacalataka vinaka na cicivaki ni noda isoqosoqo. Sureti ira mera sarava na noda vidio, me vaka na Our Whole Association of Brothers. Veikilaitaki ira vei ira tale na so ena ivavakoso, vakauasivi o ira na vuvale era tiko veivolekati. Veitaratara tiko ga kei ira na ka vou; sureti ira ina soqoni ni veisiko mai na ivakatawa ni tabacakacaka, se ina soqo ni tabacakacaka se siga ni soqo lavotaki. Vukei ira e veigauna kece me rawa nira vakadinadinataka kina nira “sa vakarau tu me vinakata na bula tawa mudu”!​—Caka. 13:48.

²⁵ Ka Mera Cakava na Qase: Na levu ni ka ena rawati ena cakacaka vakaitalatala ena Epereli oqo ena vakatau vakalevu vei ira na qase. Ke o dua na qasenivuli ni vulivola, vola e dua na ituvatuva ni ka o na cakava mo vukei ira yadua kina ena nomu iwasewase lailai mera na vakaitavi ena cakacaka lavotaki oqo. E dua beka e tiko ena nomu iwasewase lailai e gone, e ka vou, dautukutuku vakavudua, se dautukutuku mate? Saga mo kila se ra sa vukei ira tiko oqo o ira na itubutubu, o ira na painia, se so tale na dautukutuku. Vukei ira ena sala cava ga o rawa ni veivuke kina. E dua na tacida yalewa a vakavudua tu nona dautukutuku ena rua na yabaki, ia e vakayagataka e 50 na aua ena cakacaka vakaitalatala ena Epereli sa oti. Na cava e qai veisautaki koya? E kaya ni yaga na nodra dau sikovi koya ra qai vakayaloqaqataki koya na qase ena nodra cakacaka ni veivakatawani.

²⁶ Mera raica na qase kei ira na dauveiqaravi vakaitalatala ni veirauti na yalava, ivoladraudrau kei na ivola ena vula mai oqo. E rawa beka ni tuvanaki e so tale na gauna ni cakacaka vakavunau? Ke vaka kina, mera kila kece na mataveitacini na gauna oya. Kena ilutua, ena nomu masu lo kei na nomu masu e matanalevu, kerea kina na veivakalougatataki i Jiova ena noda na vakarabailevutaka na cakacaka e vauca na nona Matanitu ena vula mai oqo.​—Roma 15:30, 31; 2 Ces. 3:1.

²⁷ Ena dua na ivavakoso mai Mereke, ena Epereli ni yabaki sa oti, eratou a veivakauqeti na qase ina kena tubu na cakacaka vakaitalatala. Ena soqoni e veimacawa, eratou sureti ira kina na dautukutuku mera vakasamataka vakabibi, ra qai masulaka se rawa nira painia veivuke. E dau lewe ni nodratou veivosaki e veigauna na ilawalawa dauveiqaravi na kena sagai me vula vinaka duadua vei ira na Epereli. Na ka e qai yaco, e 58 na pasede ni dautukutuku, o iratou kece na qase, kei na dauveiqaravi vakaitalatala, era painia ena vula oya!

²⁸ Reki Eda Sotava Nida Vakaitavi Vakalevu: Na cava soti na vinaka ni noda ‘cakacaka ka vosota’ ena cakacaka vakaitalatala? (1 Tim. 4:10) Ena gumatua ni nodratou ivavakoso ena Epereli ni yabaki sa oti, e vaka oqo na ka eratou vola na qase eratou sa cavuti oti: “Era dau veitalanoataka na mataveitacini na levu ni nodra veilomani kei na nodra veivolekati nira vakalevutaka na nodra cakacaka vakaitalatala.”

²⁹ E loma i koya e dua na tacida tagane tautauvimate me vakaitavi tale ga ena cakacaka lavotaki ena Epereli sa oti. Ena lalawa vinaka kei na veivuke i tinana kei ira na mataveitacini, a marautaka kina na vuavuaivinaka ni nona painia veivuke ena vula oya. E raica vakacava na ka e sotava? E kaya: “Se qai vakadua ena noqu bula meu vakila na noqu bulabula vinaka.”

³⁰ Sega ni vakabekataki ni vakalougatataki ira vakalevu na vakamareqeta na nodra itavi o Jiova ena nodra veivosakitaka na nona Matanitu. (Same 145:11, 12) Nida vakananuma na mate ni noda Turaga, eda kila ni na levu sara na veivakalougatataki ni sokalou dina ena gauna mai muri. E vinakata sara ga na yapositolo o Paula na icovi ni bula tawamudu. Ia, e kila ni oqo e sega ni ka me vakaweleweletaki qai tatadrataki tu ga. E vola: “Oqo na ka ka’u sa daucakacaka talega kina, ka’u sa gumatua talega me vaka na nona cakacaka sa mana e na lomaqu.” (Kolo. 1:29) E vakaukauataki Paula o Jiova ena vuku i Jisu me vakayacora vinaka kina na nona cakacaka vakaitalatala e veivakabulai, e rawa tale ga ni cakava vei keda o Jiova edaidai. Ena vakatale beka ga oya na ka o na cakava ena Epereli oqo?

[Kato ena tabana e 3]

O na Uqeti Cei me Dautukutuku Ena Epereli?

Na luvemu?

Dua na vuli iVolatabu?

Dua sa malumalumu tu vakayalo?