O Dau Vakaliuca na Cava?
1 Levu na isoqosoqo lotu era dau vakabibitaka na cakacaka vinaka me vaka na tara ni koronivuli se valeniwai me yaga vei ira na lewenivanua. E dina nira sega ni guilecava na iVakadinadina i Jiova “na caka vinaka kei na dausoli ka,” era vakaliuca ga me bibi duadua na nodra vukei vakayalo na tamata.—Iper. 13:16.
2 Kena iVakarau ena iMatai ni Senitiuri: Levu na cakacaka vinaka e vakayacora o Jisu e vuravura, ia a vakabibitaka ga na vunautaki ni ka dina. (Luke 4:43; Joni 18:37; Caka. 10:38) A vakaroti ira nona imuri mera “lako, ka vakalotutaki ira na lewe ni veivanua kecega, ka . . . vakavulici ira.” (Maciu 28:19, 20) E kaya tale ga o Jisu ni o ira na vakabauti koya era na qai vakarabailevutaka sara na cakacaka a tekivutaka. (Joni 14:12) A vakaliuca o Jisu na cakacaka vakavunau nira vukei kina na tamata mera vulica na sala mera na bula kina.—Joni 17:3.
3 Na yapositolo o Paula e raica na cakacaka vakavunau me ka “sa vakacolati kina,” me itavi ena sega ni rawa ni vakalecalecava. (1 Kor. 9:16, 17) A tu vakarau me sotava na veika dredre, vakayalia e so na ka, qai vosota na rarawa ena vuku ni nona cakacaka vakaitalatala. (Caka. 20:22-24) Na yalo vata ga oya e tu vua na yapositolo o Pita kei na so tale. Dina nira vesu qai mokulaki, “era sa sega ni mudu ni vakatavuvuli ka vunautaki Jisu ni sai koya na Karisito.”—Caka. 5:40-42.
4 Vakacava o keda? Eda dau vakaliuca na vunautaki ni Matanitu ni Kalou kei na noda itavi meda vukea e so tale mera tisaipeli? Me vakataki Jisu, eda kauaitaki ira dina “sa malumalumu, ka biu wale tu, me vaka na sipi sa sega na nodrai vakatawa”? (Maciu 9:36) Na sota ni veika lelevu e yaco tu e vuravura kei na parofisai vakaivolatabu e dusia vakamatata ni sa vo lailai sara na gauna me cici tale tiko kina na vuravura makawa oqo! Ke coba dei tu ena noda vakasama na bibi ni cakacaka vakavunau, eda na vunau tiko ga ena gugumatua.
5 Dikeva na Kemu iTuvaki: Ni dau veiveisau na ituvaki ni noda bula, e vinaka meda dau dikeva se rawa nida cakava e so na veisau meda vakaitavi cake kina vakalevu ena cakacaka vakavunau. Ni sa dau tautauvimate, e mani kerea me cegu e dua na tacida yalewa a se painia tudei sara tu mai na veiyabaki ni 1950, 1960, kei na 1970. Ia, lakolako ga sa bulabula tale mai. Wale tiko ga oqo, e dikevi koya qai vakadeitaka ni rawa vua me painia tale. Dua na ka nona marau ni lai tikora tale na nodra vuli na painia ni sa yabaki 90! Vakacava o iko? Sa voleka ni o vakacegu mai na nomu cakacaka, se sa voleka ni oti nomu vuli? Ke vaka kina, ena rawa beka ni o painia?
6 Ni raica o Jisu ni “sa veidreyaki na loma i Marica e na levu ni ka me cakava,” e tukuna vakayalovinaka vua ni na kalougata vakalevu cake ke vakarautaka e vica ga na ka. (Luke 10:40-42, VV) Ena vakasama vata ga oya, e rawa ni o cakava me kua ni osooso soti nomu bula? E vakaevei, e vinakati sara mo drau cakacaka saumi ruarua vakaveiwatini? Ke caka e so na veisau, e rawa ni tauri kemudou ke dua wale ga e cakacaka? Era kalougata vakayalo e levu nira cakava na veiveisau me rawa nira vakarabailevutaka kina na nodra cakacaka vakaitalatala.
7 Meda muria mada ga na ivakarau i Jisu kei iratou na yapositolo! Ena vakalougatataki keda o Jiova nida sasaga vakaidina meda cakava na ka kece eda rawata ena itavi bibi ni kena vunautaki na itukutuku vinaka me baleta na Matanitu ni Kalou.—Luke 9:57-62.