Qarauna Matua Nomu Dau Vakayagataki Gauna
1. Na leqa cava era sotava e levu?
1 E so era vakila ni vaka me sega ni veirauti na gauna mera cakava kina na levu ni ka e tu me caka, dina ga ni sa buli e levu na misini e dodonu me vakabula gauna. Vakaevei, e dau dredre vei iko mo muria dei e dua na ituvatuva ni veika vakayalo? O diva me levu cake nomu gauna ena cakacaka vakavunau? Cava meda cakava me kua kina ni maumau noda gauna?—Same 90:12; Fpai. 1:9-11.
2, 3. Na leqa cava e rawa ni basika mai na veiyaya vakalivaliva sa tu nikua, ia na taro cava soti meda dui dikevi keda kina?
2 Qarauna na Veika e Dau Vakaoti Gauna: E vinaka meda dau vakalewa na sala eda vakayagataki gauna kina. E kaya na iVolatabu: “Mo ni qarauna matua sara kina na nomuni i valavala me kakua ni vakataki ira na lialia, ia me vakataki ira ga na vuku. Vakayagataka vinaka na gauna ka ni sa gauna ca na veisiga oqo.” (Efeso 5:15, 16, VV) Vakasamataka mada na leqa e rawa ni basika mai na levu ni iyaya vakalivaliva sa tu nikua. Sa dina sara ni yaga vakalevu na kompiuta kei na misini vakalivaliva tale e so, ia ke da sega ni qarauna, sa rawa ni coriti keda tale ena kena vakamaumautaki na gauna.—1 Kor. 7:29, 31, VV.
3 De vinaka meda dui tarogi keda: ‘Au dau dabe beka e veisiga ena mata ni kompiuta meu wilika se sauma na ivola (e-mail) kece ga e lako mai, dina ga nira sega soti ni bibi? Au dau veitalanoa beka vakalevu ena talevoni se vakauitukutuku kina (text message), ena veika e sega na betena? (1 Tim. 5:13) Au dau dabe beka ena kompiuta meu vakadidike wale tu ena Internet, se vakaoti gauna ena sara vidio? Sa sega beka ni rawa meu vulica na Vosa ni Kalou baleta ni levu ga na gauna, au qitora kina na video game?’ Ke sega ni qarauni, na veika vaka oqo e rawa ni vakavuna meda malumu yani vakayalo.—Vkai. 12:11.
4. Na veiveisau cava e cakava e dua na itabagone? Baleta na cava?
4 Vakayagataka Vakavuku na Gauna: Dau vesuka vakalevu noda gauna kei na noda vakasama na veiyaya vakalivaliva era tu. E kaya oqo e dua na itabagone e nona cakacaka e veisiga na qitora e so na qito ena kompiuta: “Keu qitora niu se bera ni lako ena cakacaka vakavunau se soqoni, au vakila ni dau veiciriyaki noqu vakanananu. Na noqu vakasama ena tiko ga vakalevu ena ka meu cakava keu sa na baci dabeca na qito oya niu lesu ga yani i vale. Sega sara ga ni toso vinaka kina na noqu wilika kei na noqu vulica na iVolatabu. Lakolako sa vaka meu sega ni marautaka noqu sokalou.” A kidava o koya na leqa sa tiko, mani bokoca laivi na qito kece a dau qitora ena nona kompiuta. “Sa bau dredre dina noqu cakava,” e kaya. “E vesuka sara ga na yaloqu na qito oya. Ia e tuburi au na marau levu niu kila ni ka au cakava oya, e ka ga meu vinaka kina.”—Maciu 5:29, 30.
5. Eda na volia vakacava na gauna me yaga ena veika vakayalo, ia ena yaga vakacava vei keda?
5 De dua ena vinakati mo cakava tale ga e so na veiveisau vaka oya. Vakacava, o rawa ni vagalalataka e veimama wale ga na aua e veisiga? Ke o cakava tiko oqori ena dua na yabaki, o sa na wilika kina na iVolatabu taucoko. O na vakila dina na kena vinaka vakayalo vei iko! (Same 19:7-11; 119:97-100) Me dau tiko sara ga na gauna mo wili iVolatabu kina, vakavakarau ena soqoni, kei na nomu lakova na cakacaka vakavunau. (1 Kor. 15:58) Ke o cakava oqori, o na sega ni vakamaumau gauna wale tu ga ena veika e sega na betena, ia o na ‘vaqara kina na ka e vinakata o Jiova.’—Efeso 5:17.