E Rawa Mo Veivuke?
1 E dau tu vakarau o Jiova me vukei ira na nona dauveiqaravi yalodina. (2 Vei. 16:9; Aisea 41:10, 13) A vakatauvatani o Jiova ina dua na ivakatawanisipi yalololoma, a vola kina o Aisea: “Ena keveti ira na luve ni sipi e na ligana, ka kauti ira voli e na lomaserena; ko ira era vakasucuma tiko na luvedra ena tubera voli vakamalua ko koya.” (Aisea 40:11) Meda dikeva mada e so na sala meda vakatotomuria kina na veikauaitaki yalololoma i Jiova.
2 Vukei Ira na Tataleitaki Vou: Dua na sala eda rawa ni veivuke kina oya na noda sureti ira na tataleitaki vou meda mai marautaka vata noda veimaliwai. (Vkai. 13:20) A nanuma lesu e dua na tacida na gauna e se qai tekivu soqoni kina ena ivavakoso, qai kaya: “Vakavica na nodratou dau sureti au e dua na vuvale meu dau dabe ena nodratou vuli iVolatabu vakavuvale. Ni sa toso tiko na noqu vuli, e dua na veiwatini gone erau painia, rau dau sureti au meu tomani rau ena dua taucoko na siga ena cakacaka vakavunau. Levu na gauna keitou dau veitalanoataka na veika vakayalo.” E kuria: “Ni bera niu lotu Vakarisito, au dau lako vakalevu ena vanua ni veivakamarautaki ena bogi ni Vakaraubuka kei na Vakarauwai. Ia e sa sosomitaka oqori na noqu veimaliwai kei ira na mataveitacini.” Na nodra kauaitaki koya vakayalololoma na ivavakoso e vakaukauataki koya qai dei vinaka kina na nona vakabauta. Ena gauna oqo e sa veiqaravi tiko e Peceli.—Kolo. 2:6, 7.
3 Meda Veivakatataki Cake: Eda rairai kila na gauna meda vukei ira kina na tacida era sotava na leqa. Rawa beka nida tuvanaka kei na dua na dautukutuku e sa qase meda vunau vata ena talevoni, se sureti koya meda lako vata ina vuli iVolatabu, se da rawa sara ga ni kauta noda vuli iVolatabu ina nona vale meda lai vuli kina? Ena gadreva beka e so na veivuke ena gauna ni cakacaka vakavunau e dua na itubutubu e vica na luvena! Ena tu beka e so era mamadua era na vinakata na noda veivuke ena veisikovi lesu se so tale na basoga ni noda cakacaka vakavunau. Na noda lomani ira na tacida ena uqeti keda meda qara na sala meda veivakatataki cake kina.—Roma 14:19.
4 Na noda vakatotomuri Jiova ena nona kauaitaki ira dina nona dauveiqaravi, e vakaukauataki keda, eda veivolekati kina na lewe ni ivavakoso, eda vakacaucautaki koya tale ga kina na Tamada vakalomalagi.—Efeso 4:16.