O tu Vakarau mo Vunau Tawalokuci?
1. Na ivakaraitaki cava eda kila kina ni vuavuaivinaka na vunau tawalokuci?
1 Na vunau tawalokuci e rawa ni yaga vakalevu. E volai ena iVolatabu nodra ivakaraitaki e levu, a vuavuaivinaka nodra vunau tawalokuci. (Joni 4:7-15) Na cava eda rawa ni cakava meda vunau tawalokuci kina?
2. Ena yaga vakacava na noda isulusulu kei na sasauni ena noda doudou na vunau?
2 iSuluwulu kei na Sasauni: Eda na doudou ni tukuna na ka eda vakabauta ke da dau kauaitaka na noda isulusulu kei na sasauni. (1 Tim. 2:9, 10) Ke sega ni rakorako na keda irairai, eda na sega ni doudou na vunau. Ena yasana adua ni maqosa na keda irairai, eso era rawa sara ga ni vaqaqa na vuna e va kina ya. Kena ivakaraitaki, ena dua na nodrau igolegole e dua na veiwatini iVakadinadina, eratou a dabe veitikivi kei na dua na turaga e lotu Musilimi. E kauai na turaga ya ena maqosa ni kedrau irairai na veiwatini, a tarogi rau sara ke rau lotu vaKarisito. Ratou mani veitalanoa ena iVolatabu me tolu na aua.
3. Me vakataki Jisu ga, o a tekivuna vakacava na nomudrau veitalanoa kei na dua?
3 Tekivu ni Veitalanoa: Ena nona kere wai wale ga o Jisu vua na yalewa ni Samaria rau sota ena ikeli wai i Jekope, a tekivu rawa kina na veitalanoa. Eda rawa tale ga ni tekivuna na veitalanoa ena dua na itukutuku lekaleka se na taro rawarawa ga. De da tu vakasuka ena so na gauna meda vunau, ia ke da nuitaki Jiova eda na “doudou” ni tekivuna na veitalanoa.—1 Ces. 2:2.
4. Na cava eda rawa ni cakava meda vunau tawalokuci kina?
4 Ka me Caka: Levu na dautukutuku era kila vinaka na gauna mera vunau tawalokuci kina. Meda vakasamataka tale mada na keda ituvaki kei ira eda na rairai sotava e veisiga. Nida gole ina dua na vanua, meda kauta toka na ivola veiganiti, kei na dua na iVolatabu e veikauyaki rawarawa. Kauaitaka na ka eda raica, da kauaitaki ira tale ga era tu yavoliti keda. Eda na tu vakarau meda vunau sara vakavinaka ke da vakasamataka rawa toka na gauna eda rawa ni vunau kina.—Fpai. 1:12-14; 1 Pita 3:15.
5. Na cava meda saga kina meda vunau tawalokuci?
5 Noda lomani Jiova kei ira na wekada e rua na vuna vinaka meda kua ni vakawalena kina na vunau tawalokuci. (Maciu 22:37-39) E bibi na cakacaka vakavunau, e vakatotolotaki tale ga, meda saga gona meda vunau tawalokuci. Ni se vo tiko na gauna, meda tu vakarau mada ga ni vunautaka ena gauna veiganiti kece vei ira eso tale na itukutuku vinaka ni Matanitu ni Kalou.—Roma 10:13, 14; 2 Tim. 4:2.