Sala me Vunautaki Kina na iTukutuku Vinaka

E IVAKARAITAKI vinaka o Jisu vei ira na nona imuri ni gumatua ni kacivaka na itukutuku vinaka. E sega ni waraki ira na tamata mera lako yani vua, ia e lakovi ira sara ga me vakavulici ira ena nodra vale kei na vanua cava ga era tu kina. (Maciu 9:35; 13:36; Luke 8:1) E vosa vei ira na le vica o Jisu, e vakavulici ratou yadua nona tisaipeli, e vosa tale ga vei ira na ilala levu e vica vata na udolu na kedra iwiliwili. (Mari. 4:10-13; 6:35-44; Joni 3:2-21) E vakayagataka na gauna veiganiti kece me veiuqeti qai veivakacegui kina. (Luke 4:16-19) E vakayacora qo ena gauna mada ga e dodonu me vakacegu kina ena levu ni nona oca. (Mari. 6:30-34; Joni 4:4-34) Nida wilika na itukutuku ni cakacaka vakaitalatala i Jisu ena iVolatabu, ena uqeti keda meda vakatotomuri koya me vakataki ratou ga na yapositolo.—Maciu 4:19, 20; Luke 5:27, 28; Joni 1:43-45.

² Dikeva mada na ka eda rawa ni cakava na lotu vaKarisito nikua meda vakaitavi ena cakacaka a tauyavutaka o Jisu Karisito rauta na 2,000 na yabaki sa oti.

VUNAU E VEIVALE

³ Nida iVakadinadina i Jiova, eda raica vakabibi na vunautaki ni itukutuku vinaka ni Matanitu ni Kalou e veivale. Na rabailevu ni noda vakaitavi ena cakacaka qo, sa keda ivakatakilakila kina nikua. E vuavuaivinaka na iwalewale qo ni rawa ni tarai kina e vica vata na milioni ena dua ga na gauna lekaleka. (Maciu 11:19; 24:14) Na cakacaka vakavunau e veivale e dua na sala vinaka meda vakaraitaka kina nida lomani Jiova kei ira na kainoda.—Maciu 22:34-40.

⁴ Eda sega ni bulia ga na iVakadinadina i Jiova nikua na vunau e veivale. Na yapositolo sara mada ga o Paula e dau vola na nona vunau e veivale. Ni vakamacalataka tiko na nona cakacaka vakaitalatala vei ira na ivakatawa e Efeso, e kaya: “Na imatai ni siga au butuka kina na yasana o Esia . . . au sega ni vunia vei kemuni e dua na ka ena yaga vei kemuni . . . na cakacaka vakavunau e veivale.” Ena iwalewale ni vunau qo kei na levu tale, e “vunautaka sara vakavinaka vei ira na Jiu kei ira na kai Kirisi ni dodonu mera veivutuni vua na Kalou, mera vakabauta tale ga na noda Turaga o Jisu.” (Caka. 20:18, 20, 21) Ena gauna ya, era uqeta na empara ni Roma mera qaravi na matakau, levu era “gumatuataka na sokalou” qori. E bibi gona vei ira na lewenivanua mera vakasaqara na “Kalou e buli vuravura kei na ka kece e tu kina,” e vakarota tale ga “vei ira kece ena veivanua mera veivutuni.”—Caka. 17:22-31.

⁵ Nikua, e bibi meda vunautaka na itukutuku vinaka. Sa voleka ni cava na ituvaki ca qo kei vuravura. Noda kila na bibi ni gauna qo, ena uqeti keda meda vakaitavi vakalevu. Sega tale ni dua na iwalewale ni vunau me tautauvata kei na iwalewale qo ni sa vakadinadinataki na yaga ni nodra vakasaqarai o ira era via kila na ka dina. Na vuavuaivinaka ni cakacaka ena gauna qo e tautauvata ga kei na gauna i Jisu kei ratou nona yapositolo.—Mari. 13:10.

⁶ Vakacava, o vakaitavi tiko vakalevu ena cakacaka vakavunau e veivale? Ke vaka kina, mo nuidei ni marautaka qori o Jiova. (Isik. 9:11; Caka. 20:35) De dua e sega ni rawarawa mo vunau e veivale. E vakaiyalayala ga na ka o rawa ni cakava, se o vunau ena yalava era sega ni dau vakarorogo kina e levu na itaukeinivale. De dua e vakatabuya na cakacaka na matanitu. O rairai mamadua qai dredre mo tekivuna na veivosaki kei ira o sega ni kila, se o rere ena gauna o vunau kina. Ia kua ni yalolailai. (Lako 4:10-12) Era va tale ga qori na tacimu ena levu na vanua.

⁷ E yalataka vei ratou nona tisaipeli o Jisu: “Raica, au tiko vata kei kemuni ena veisiga kece me yacova na ivakataotioti ni veika vakavuravura.” (Maciu 28:20) E uqeti keda na vosa ni yalayala qori meda veivakatisaipelitaki. Eda nanuma kina na ka e tukuna na yapositolo o Paula: “Au rawata na ka kece ena vuku i koya e vakaukauataki au.” (Fpai. 4:13) Mo vakayagataka vinaka na ituvatuva ni ivavakoso me baleta na vunau e veivale. O na vukei qai vakayaloqaqataki ni o tomani ira na tacimu. Masuti Jiova mo vosota na ituvaki dredre qai solia nomu vinaka kece ni o vunautaka na itukutuku vinaka.—1 Joni 5:14.

⁸ Ni o vunautaka na itukutuku vinaka, o sa vakamacalataka tiko ‘nomu inuinui.’ (1 Pita 3:15) Sa na qai matata tiko ga vei iko na kedra duidui o ira era nuitaka na Matanitu ni Kalou kei ira e sega na nodra inuinui. (Aisea 65:13, 14) O na lomavakacegu ni o talairawarawa ena ivakaro i Jisu mo “rarama e matadra na tamata,” o rawa ni vakalougatataki mo vukea eso tale mera kilai Jiova kei na ka dina e rawati kina na bula tawamudu.—Maciu 5:16; Joni 17:3; 1 Tim. 4:16.

⁹ E dau tuvanaki na cakacaka vakavunau e veivale ena muanimacawa kei na lomanimacawa. So na yalava e sega nira dau tiko e vale na itaukeinivale ena siga, era tuvanaka kina na ivavakoso na vunau ena yakavi. E rawarawa vei ira na itaukeinivale mera ciqomi ira na vulagi ena yakavi se na bogi ni vakatauvatani kei na mataka.

VAKASAQARAI IRA ERA VIA KILA NA KA DINA

¹⁰ A vakaroti ratou nona tisaipeli o Jisu me ratou “vakasaqarai” ira era via kila na ka dina. (Maciu 10:11) A sega ni vunau ga e veivale o Jisu. E vunau ena vanua kei na gauna veiganiti kece ga, ena gauna lokuci kei na gauna tawalokuci. (Luke 8:1; Joni 4:7-15) Eratou dau vunau tale ga na yapositolo ena levu na vanua.—Caka. 17:17; 28:16, 23, 30, 31.

¹¹ E noda inaki tale ga nikua meda vunautaka na itukutuku ni Matanitu ni Kalou vei ira kece ga na lewenivanua. Bibi gona meda vakatotomuria na iwalewale ni veivakatisaipelitaki i Jisu kei ratou nona tisaipeli, meda kila vinaka tale ga na veika sa yaco tiko kei na kedra ituvaki na tiko ena yalava. (1 Kor. 7:31) Me kena ivakaraitaki eda kenadau ena vunau ena vanua ni bisinisi. Levu na vanua e vuavuaivinaka na vunau ena vanua ni gade, ikelekele ni motoka, se vanua era tu kina na lewenivanua. Eso na ivavakoso era vakayagataka na teveli se qiqi ena nodra yalava. Kena ikuri, e rawa ni tuvanaka na valenivolavola ni tabana na vunau e matanalevu ena vanua era tavali kina vakalevu na lewenivanua ena korolevu, nira vakaitavi kina na dautukutuku ena vica na ivavakoso. Ena sala qo era na kila kina na itukutuku vinaka o ira era sega ni tiko e vale.

¹² Ni o sotavi ira na tataleitaki ena vunau e matanalevu, o rawa ni solia na ivola veiganiti. Me uqeti tiko ga nona tataleitaki, o rawa ni tukuna vua na sala mo drau veitaratara kina, tuvanaka sara mo sikovi koya lesu, dusimaki koya ena jw.org se vakaraitaka vua na vanua ni soqoni e voleka kina. De dua o na marautaka na vunau e matanalevu, e dua tale ga na sala o vakarabailevutaka kina nomu cakacaka vakaitalatala.

¹³ Ia eda na sega ni vunautaka ga na itukutuku vinaka. Ke o via vukea eso mera kila na ka dina e basika ina bula, o na sikovi ira wasoma na tataleitaki me rawa nira toso mera lotu vaKarisito matua.

VEISIKOVI LESU

¹⁴ A kaya o Jisu vei ratou na nona imuri: ‘Dou na qai tukuni au ena veivanua yawa sara kei vuravura.’ (Caka. 1:8) Ia a kaya tale ga: “Ni lako moni vakavulici ira na lewe ni veivanua kece ga mera tisaipeli, . . . vakavulici ira mera muria na ka kece au vakarota vei kemuni.” (Maciu 28:19, 20) Ena marautaki noda qaravi Jiova nida veisikovi lesu. Era na marautaka tale ga na tataleitaki ni o lesuvi ira. Ni o vakamacalataka na iVolatabu, ena vaqaqacotaka nodra vakabauta na Kalou, era na kauaitaka tale ga nodra bula vakayalo. (Maciu 5:3) Ke o vakavakarau vinaka qai lesuvi ira ena gauna veiganiti, sa rawa ni tekivu vuli iVolatabu. Qo sara ga me nomu isausau ni o veisikovi lesu. E sega ni noda itavi ga meda tea na sore ni ka dina, meda vakasuasuataka tale ga.—1 Kor. 3:6.

¹⁵ E sega ni rawarawa vei ira eso na veisikovi lesu. De dua o dau maqosa ni vakamacalataka vakalekaleka na itukutuku vinaka, o taleitaka tale ga. Ia ni o vakasamataka mo lesu mo drau veivosakitaka na iVolatabu kei itaukeinivale, de dua o na taqaya. O na nuidei ni o vakavakarau vinaka. Vakayagataka vinaka na vakatutu e dau vakarautaki ena lomanimacawa. O rawa ni kerea e dua na dautukutuku matua me tomani iko.

VEIVAKAVULICI ENA IVOLATABU

¹⁶ A wilika tiko na Vosa ni Kalou e dua na turaga e tavuki ena lotu vakaJiu, mani tarogi koya na dauvunau o Filipi: “O kila na ka o wilika tiko?” E sauma na turaga ya: “Meu kila vakacava ke sega ni dua e vakavulici au?” E tukuni ena Cakacaka wase 8 ni a vakayagataka o Filipi na tikinivolatabu e wilika tiko na turaga ya me tekivu “tukuna vua na itukutuku vinaka me baleti Jisu.” (Caka. 8:26-36) Eda sega ni kila na balavu ni gauna erau veivosaki kina, ia e vakamacalataka vua o Filipi na itukutuku vinaka me yacova ni sa vakabauta, mani kerea me papitaiso me tisaipeli i Jisu Karisito.

¹⁷ Levu nikua era sega ni kila vinaka na iVolatabu, ena vinakati kina meda lesu vakavica, me vakavulici tale ga vakamalua ena vica vata na macawa, vula, se mani yabaki, me rawa ni vakabauta na ka e vulica, me papitaiso. Ia o na vakalougatataki ena nomu vosota kei na loloma mo vukei ira na yalomalumalumu mera tisaipeli, ni kaya o Jisu: “E marau vakalevu o koya e solia na ka, vakalailai o koya e taura na ka.”—Caka. 20:35.

¹⁸ O na vakayagataka na noda ivola ni vuli mo vakavulica kina e dua ena iVolatabu. Ni o muria na vakatutu e vakarautaki ena soqoni ena lomanimacawa, qai cakacaka kei ira na qasenivuli maqosa ena ivavakoso, ena vuavuaivinaka nomu veivakavulici ni o vukea eso mera tisaipeli i Jisu Karisito.

¹⁹ Ke o vinakata na veivuke mo tauyavutaka na vuli iVolatabu se veivakavulici, mo raica e dua na qase ni ivavakoso se dua na tacida e kenadau kina. Ena yaga tale ga na vakatutu ena iVola ni Soqoni ni Bula vaKarisito kei na Cakacaka Vakaitalatala, kei na vakatasuasua. Mo vakararavi vei Jiova, mo masulaka tale ga na ka o vinakata. (1 Joni 3:22) Saga me nomu isausau me dua nomu vuli iVolatabu me ikuri ni vuli vakavuvale, se vuli cava tale o vakayacora tiko e vale. O na marautaka vakalevu nomu cakacaka vakaitalatala ke o dau veivakavulici ena iVolatabu.

TUBERI IRA NA TATALEITAKI MERA KILA NA ISOQOSOQO I JIOVA

²⁰ Nida vukei ira na gonevuli mera kilai Jiova mera tisaipeli tale ga i Jisu Karisito, era sa lewe ni ivavakoso. Era na toso mera matua ke da vukei ira mera raica vakabibi na isoqosoqo i Jiova, mera tokona tale ga na kena veidusimaki. E bibi mera vulica na sala mera vakayacora kina qo. E vakarautaki gona eso na vidio kei na brochure O Cei Era Cakava Tiko Nikua na Loma i Jiova? mera tuberi kina na gonevuli. Ena yaga tale ga eso na itukutuku ena Wase 4 ni ivola qo.

²¹ Ena itekitekivu ni noda veivosaki kei gonevuli, vukei koya me raica ni vakayagataka tiko o Jiova e dua na isoqosoqo nikua me vakayacori kina na cakacaka vakaitalatala e vuravura. Vakamacalataka na yaga ni ivola vakaivolatabu eda vakayagataka tiko, na kena vakarautaki kei na nodra veisoliyaka e veiyasa i vuravura na bolecakacaka, era solia vakatabakidua na nodra bula vua na Kalou. Sureti ira na vuli iVolatabu mera tomani iko ina soqoni. Vakamacalataka na ka e dau vakayacori ena soqoni, veikilaitaki koya vei ira na mataveitacini. Uqeti koya tale ga me veimaliwai kei ira na mataveitacini ena soqo ni tabacakacaka kei na soqo ni veiwasewase. Ena soqo va qo, ena raica vakataki koya na nodra bulataka na dauveiqaravi i Jiova na itovo era kilai kina na lotu vaKarisito dina, oya na loloma. (Joni 13:35) Ena volekati Jiova ni qoroya vakalevu na nona isoqosoqo.

VAKAYAGATAKA NA IVOLA VAKAIVOLATABU

²² Era dautukutuku gugumatua ni Vosa ni Kalou na lotu vaKarisito ena imatai ni senitiuri. Era lavetaka eso na nodra ilavelave ni iVolatabu, kei na ilavelave me vakayagataki ena vuli vakaivavakoso. Era uqeta eso tale mera wilika na Vosa ni Kalou. E lailai sara na ilavelave ni iVolatabu era vola, ia era dau vakamareqeta. (Kolo. 4:16; 2 Tim. 2:15; 3:14-17; 4:13; 1 Pita 1:1) Eda vakayagataka nikua na misini ni tabaivola vovou, me tabaki kina e drau na milioni na iVolatabu kei na ivola vakaivolatabu me vaka na tikidua, brochure, ivola, kei na mekesini ena vica na drau na vosa.

²³ Ni o vunau, vakayagataka vinaka na ivola vakaivolatabu e tabaka na isoqosoqo i Jiova. Ni o raica ni yaga vakalevu nomu wilika kei na nomu vulica na ivola e dau tabaka na iVakadinadina i Jiova, ena uqeti iko mo wasea na veika o sa kila.—Iper. 13:15, 16.

²⁴ Levu na lewenivanua era dau vakayagataka na Internet. Koya gona, e yaga vakalevu na noda website vakadonui na jw.org, me vakatetei kina na itukutuku vinaka. Rawa nira wilika se rogoca kina na katokatoni ni iVolatabu kei na ivola vakaivolatabu ena vica na drau na vosa mai na veiyasa i vuravura. O ira era lomalomarua mera vosa vei keda se ra tiko ena vanua e dredre mera vosa vei ira na tacida, e rawa nira dikeva noda vakabauta ena jw.org ena nodra vale.

²⁵ Meda tukuna yani na jw.org ena gauna veiganiti kece. Ke taroga noda vakabauta o itaukeinivale, eda rawa ni vakayagataka noda talevoni se kompiuta meda vakaraitaka vua na kena isau. Ke da sotava e dua e duatani nona vosa se vosa vagalu, meda vakaraitaka vua na noda website me raica na iVolatabu kei na ivola vakaivolatabu ena nona vosa. Levu na dautukutuku era vakayagataka na vidio ena website me tekivutaki kina na veivosaki.

VUNAU TAWALOKUCI

²⁶ E tukuna o Jisu vei ira na vakarorogo: “Oni rarama kei vuravura. . . . Me serau tale ga na nomuni rarama e matadra na tamata, mera raica na nomuni cakacaka vinaka, mera vakalagilagia kina na Tamamuni mai lomalagi.” (Maciu 5:14-16) O ira na tisaipeli qo era bulataka na veika e vinakata vei ira na Kalou ena nodra vakatotomuri Jisu. E kaya: “O yau na rarama kei vuravura.” E ivakaraitaki vinaka o Jisu vei keda ni vakacila na “rarama e veivakabulai” vei ira kece era via rogoca.—Joni 8:12.

²⁷ E ivakaraitaki vinaka tale ga na yapositolo o Paula. (1 Kor. 4:16; 11:1) Ni tiko mai Aceni, e vunau e veisiga ena makete. (Caka. 17:17) Era muria na nona ivakaraitaki na lotu vaKarisito mai Filipai. Oya na vuna e vola kina nira bula maliwai ira “na itabatamata takelo qai talaidredre.” Era na “rarama tiko yani me vaka na cina” ena vuravura qo. (Fpai. 2:15) Nikua eda rawa ni vakacila na rarama ni ka dina ena noda vosa kei na noda ivalavala nida donuya eso na ituvaki meda tukuna kina na itukutuku vinaka. Na noda ivakaraitaki vinaka kei na noda dau dina ena laurai kina nida duatani. Ia nida vunautaka na itukutuku vinaka, era na qai kila na vuna eda duatani kina.

²⁸ Levu na dauveiqaravi i Jiova era tukuna na itukutuku vinaka e vanua ni cakacaka, koronivuli, ena basi, kei na so tale na vanua. Nida vodo basi se dua tale na sala ni veilakoyaki, eda rawa ni vunau vei ira eda vodo vata. Dodonu meda tu vakarau ni vagolea na veivosaki me vunautaki kina na itukutuku vinaka. Meda saga mada ga meda vunau ena gauna veiganiti kece.

²⁹ Eda na vakayacora qo ke da nanuma tiko nida vakacaucautaka na Dauveibuli, eda doka tale ga na yacana. Kena ikuri, eda sa vukei ira tiko na yalomalumalumu mera kilai Jiova, me rawa nira qaravi koya, mera nuitaka tale ga na bula ena rawati ena nodra vakabauti Jisu Karisito. E marautaka qori o Jiova, e okata me veiqaravi tabu.—Iper. 12:28; Vkta. 7:9, 10.

YALAVA

³⁰ E inaki i Jiova me vunautaki na itukutuku vinaka ni nona Matanitu ena veikoro lelevu kei na veikoro lalai. Me vakayacori qo, e dau lesia na valenivolavola ni tabana na yalava mera cakacaka kina na ivavakoso kei na dautukutuku era tu vakayawa. (1 Kor. 14:40) E salavata qo kei na ituvatuva e vakarautaka na Kalou ena imatai ni senitiuri. (2 Kor. 10:13; Kala. 2:9) Me vaka ni sa tete sara tiko na vunautaki ni Matanitu ni Kalou ena gauna ni ivakataotioti qo, e levu sara na ka e rawati ni tuvanaki vinaka na tarai ni yalava.

³¹ E qarava na itavi qori na ivakatawa ni cakacaka. E rawa ni nona itavi na dauveiqaravi ni ivavakoso me lesia na mape ni cakacaka.

E rua na mataqali yalava, na yalava ni iwasewase lalai kei na yalava eda rawa ni tara ena noda gauna galala. Ena vanua e lailai na kena yalava, sa na tiko vua na ivakatawa ni iwasewase lalai na mape mera vunau kina na nona iwasewase. Ia ke levu na yalava, e rawa nira kerea na dautukutuku me dua nodra mape.

³² Ni sega ni tuvanaki na soqoni ni cakacaka vakavunau se dredre vua na dautukutuku e tiko nona mape me sota kei ira na iwasewase lailai, sa rawa ni tara ga na yalava e soli vua. Kena ivakaraitaki, eso na dautukutuku era kerea na mape e voleka ena nodra vanua ni cakacaka mera vunau kina ena gauna ni vakasigalevu se suka na cakacaka. Eso na vuvale era kerea na mape ni yalava era tiko kina mera vunau ena so na yakavi. Ni dua nomu mape, ena levu na gauna mo vunau kina. De dua o na via sureta tale ga eso na dautukutuku mo dou vunau ena nomu yalava. Ke o vinakata mo cakacaka ena dua na yalava, mo kerea vua na tacida e qarava tiko qori.

³³ Se mani yalava e qarava na ivakatawa ni iwasewase lailai se na yalava e kerea na dautukutuku, me vakadeitaka ni sa tarai kece na vale. Na kena tarai na yalava me salavata kei na lawa ni vanua o tiko kina. Me tarai ena loma ni va na vula na yalava ni iwasewase lailai se nona na dautukutuku. Ni sa tarai oti na yalava, me tukuna vua e qarava tiko na mape. Me vakatau, e rawa ni maroroya na mape na ivakatawa ni iwasewase se dautukutuku me qai tara tale se vakasuka vua e qarava tiko.

³⁴ Ena tarai vinaka na yalava nida cakacaka vata na lewe ni ivavakoso. Era na sega ni cakacaka tiko ga ena dua na yalava e rua se vica na dautukutuku, ni na vakasosani ira na itaukeinivale. Ena sala qo eda vakaraitaka kina nida kauaitaki ira na tacida kei ira ena yalava.

VUNAU VEI IRA E DUATANI NODRA VOSA

³⁵ Na tamata kece e dodonu mera kila na Kalou o Jiova, na Luvena, kei na nona Matanitu. (Vkta. 14:6, 7) Eda vinakata meda vukei ira e duidui nodra vosa mera masuta na yaca i Jiova mera bula kina, mera bulataka tale ga na itovo vaKarisito. (Roma 10:12, 13; Kolo. 3:10, 11) Na cava e dredre kina meda vunau vei ira eda sega ni veikilai vosa? Sala cava gona eda na vukea kina e levu mera rogoca na itukutuku vinaka ena nodra vosa?—Roma 10:14.

³⁶ Na lesi ni mape ena ivavakoso yadua ena vakatau tiko ena vosa era vosataka. Ia ena yalava era duikaikai, era vunau kina na dautukutuku ena vica na ivavakoso. Ena vinaka gona mera vunau ga vei ira e tautauvata nodra vosa. Qo e okati kina na kena soli na ivola ni veisureti. Nida vunau e matanalevu se tawalokuci, eda rawa ni vosa vei ira na duikaikai qai solia na ivola ena nodra vosa.

³⁷ Ena so na gauna, e dredre mera tara wasoma na nodra yalava tu yawa na ivavakoso e duatani na kena vosa. Mera veivosaki na ivakatawa ni cakacaka ena ivavakoso kece qori, me tuvanaki vakamatata tale ga na kena tarai na yalava. Ena sala qo, era na rogoca kece kina na itukutuku vinaka, ena sega ni tarai vakarua na yalava ena dua na gauna.—Vkai. 15:22.

³⁸ Na cava eda na cakava ke da sotava ena yalava e dua eda sega ni kila nona vosa? Meda kua ni nanuma ni na sikovi koya yani e dua e vosataka nona vosa. So na dautukutuku era vulica eso na ivakamacala rawarawa ni so tale na vosa mera vunau kina. Eda rawa ni vakaraitaka vua me wilika se download na ivola ena nona vosa mai na noda website vakadonui na jw.org, se tukuna vua nida na kauta yani na nona ivola ena nona vosa.

³⁹ Ke tataleitaki, meda raica e dua e kila vinaka nona vosa. Meda tukuna tale ga na vanua ni soqoni e voleka vua ena nona vosa. Ke vinakata me sikovi koya e dua e kila nona vosa, meda vakaraitaka vua na vanua me vola kina na kena itukutuku ena jw.org. Ena qai saga na valenivolavola ni tabana me raica e dua na dautukutuku, iwasewase, se ivavakoso voleka me vukei koya.

⁴⁰ Meda sikova tiko ga na tataleitaki qori me yacova ni tukuna ni sa lako yani e dua e kila nona vosa. Ena so na gauna, ena vakaraitaka na valenivolavola ni tabana vei ira na qase ni sega ni tiko e dua e kila nona vosa. Ke dina qori, meda gumatua tiko ga ni vakabulabulataka na nona tataleitaki. Ke rawa, meda vulica vata na iVolatabu ni vakayagataki na ivola ena nona vosa. Ena kila eso na ivakavuvuli vakaivolatabu nida vakayagataka na iyaloyalo, me wilika tale ga na tikinivolatabu e lavetaki. De tiko e dua na wekana e kila vakalailai na nomu vosa kei na nona vosa, me mai vakadewa vei kemudrau.

⁴¹ Meda sureta na tataleitaki ena soqoni me rawa ni kila na isoqosoqo i Jiova, ke sega mada ga ni kila vinaka na ka e vakayacori kina. Ke tiko na iVolatabu ena nona vosa, meda vakaraitaka vua na tikinivolatabu e wiliki. Ena vakayaloqaqataki koya nona veimaliwai ena ivavakoso, ena uqeti koya tale ga me toso vakayalo.

⁴² iWasewase vou: Na iwasewase qori era tiko kina e vica na dautukutuku era vunau ena duatani na vosa, ia e sega na kena qase se dauveiqaravi ni ivavakoso me liutaka na soqoni e veimacawa ena vosa qori. Ena tuvanaka na valenivolavola ni tabana na ivavakoso me sema kina na iwasewase vou ena yavu e toka qo:

1. (1) Ke laurai ni levu era vosataka e dua tale na vosa.

2. (2) Era tiko na dautukutuku era kila vinaka na vosa qo se ra tu vakarau mera vulica.

3. (3) Eratou tu vakarau na ilawalawa qase me ratou liutaka na cakacaka vakavunau ena vosa ya.

Ke ratou vinakata na ilawalawa qase me sema yani ina ivavakoso na iwasewase vou, eratou na taro ivakasala vua na ivakatawa ni tabacakacaka. De na kila tiko na ivakatawa ni tabacakacaka na ivavakoso era sa vunau tiko ena yalava ya, ena kila tale ga na ivavakoso e ganita me sema kina na iwasewase vou. Ni sa vakadeitaki na tikina qori, eratou na volavola na qase ina valenivolavola ni tabana ni ratou kerea na veivakadonui me ratou qarava na iwasewase vou.

⁴³ iWasewase lalai: Ena vakadonuya na valenivolavola ni tabana na ivavakoso e qarava tiko e dua na iwasewase lailai ena yavu e volai toka qo:

1. (1) Sa vica toka na tataleitaki ena yalava era vosataka e dua na vosa.

2. (2) Era tiko eso na dautukutuku era vosataka na vosa qo se ra sa vulica tiko.

3. (3) Sa tiko e dua na qase se dauveiqaravi e rawata na kena ivakatagedegede me liutaka na soqoni ni dua na macawa se dua na wase ni soqoni me vaka na vunau se vulici ni Vale ni Vakatawa ena vosa ya.

Ke laurai ni sa rawati na veika e vinakati, ena qai vola na ilawalawa qase ina valenivolavola ni tabana na veika matailalai me baleta na iwasewase qori, me kerea tale ga ni sa rawa ni ratou qarava na iwasewase lailai. Na qase se dauveiqaravi ni ivavakoso e liutaka tiko na cakacaka ena vakatokai me ivakatawa se dauveiqaravi ni iwasewase lailai.

⁴⁴ Ni sa tauyavu na iwasewase lailai, eratou na vakatulewataka na ilawalawa qase ena ivavakoso e sema kina ke sa rawa ni caka na vo ni itavi ena soqoni, me caka tale ga vakavica na soqoni ena dua na vula. Rawa ni vakayacori tale ga na soqoni ni cakacaka vakavunau. O ira kece na lewe ni iwasewase qo era na vakarorogo ena veidusimaki ni ilawalawa qase e qarava tiko na nodra iwasewase. Eratou na vakarautaka na ilawalawa qase eso na idusidusi yaga, eratou na vakaliuliu tale ga ni raica na veika e vinakati ena iwasewase. Ni veisiko na ivakatawa ni tabacakacaka ena ivavakoso e tokona tiko na iwasewase ya, ena vakauta ina valenivolavola ni tabana e dua na ivakamacala lekaleka me baleta na toso ni iwasewase kei na veika e vinakati. Lakolako sa rawa ni dua sara ga na ivavakoso. Ena marau o Jiova ke ra muria na veidusimaki vakalou o ira kece era cakacaka ena yalava.—1 Kor. 1:10; 3:5, 6.

CAKACAKA VAKAVUNAU VAKAIVAVAKOSO

⁴⁵ E itavi ni lotu vaKarisito yalayala me tukuna na itukutuku vinaka. Levu na sala e rawa nida vakayacora kina qo, ia e levu vei keda eda dau taleitaka meda veitomani ena cakacaka vakavunau. (Luke 10:1) Oya na vuna era dau sota kina na lewe ni ivavakoso ena muanimacawa kei na lomanimacawa ena cakacaka vakavunau. E gauna vinaka tale ga ni vunau na olodei, nira dau cegu kina ena cakacaka e levu na tacida. Ena tuvanaka na Komiti ni Cakacaka ni iVavakoso na gauna kei na vanua veiganiti me caka kina na sota ena mataka kei na yakavi.

⁴⁶ Na vunau vakaivavakoso e gauna vinaka mera cakacaka vata kina na dautukutuku, mera “veivakayaloqaqataki.” (Roma 1:12) Rawa nira cakacaka vata na dautukutuku vou kei ira na dautukutuku matua mera vuli kina. Ena vuku ni qaqarauni ena so na yalava, ena daumaka me le rua se le vica mera cakacaka vata. Ke o nanuma mada ga mo cakacaka taudua, ena veiuqeti ni o tiko ena soqoni ni cakacaka vakavunau. O na yalodei ni o kila nira cakacaka tale tiko ga ena yalava voleka na tacimu. Ke vakayacori e veisiga na soqoni ni cakacaka vakavunau ni ivavakoso, mera kua ni nanuma na painia kei na so tale ni bibi mera tiko ena gauna kece qori. Ia e rawa nira tokona e vica na gauna ni soqoni ni cakacaka vakavunau.

⁴⁷ Meda muria mada ga na ivakaraitaki i Jisu kei ratou na nona yapositolo! Eda nuidei ni na vakalougatataki keda o Jiova nida saga meda vunautaka na itukutuku vinaka ni nona Matanitu ena kena levu eda rawata.—Luke 9:57-62.