LESONI 14

Vakavotui na Veitikina Bibi

Iperiu 8:1

IVAKAMACALA LEKALEKA: Mera vakamuria nomu ivunau na vakarorogo, me matata na sala e sema kina na veitikina bibi ina nomu inaki kei na usutu.

Me dua na inaki ni vunau. Dikeva ke inaki ni vunau mo veivakaroti se veiuqeti vei ira na vakarorogo, mo cakava sara. Ena rawa vinaka nomu inaki ke veisemati kei na veitikina bibi.

Tarogi iko mada: ‘Na cava era na vakataroga se ra na sega ni duavata kina na vakarorogo me baleta na ulutaga qo?’ Na cava na veitaravi ni nodra taro se na ka era sega ni duavata kina? Oti mo tuvana sara na veitikina bibi o raica me salavata kei na nodra vakatataro, me rawa nira vakamuria, kila qai ciqoma na itukutuku.
Vakabibitaka nomu usutu. Lesuva tale tiko na usutu ni nomu ivunau ni o cavuta eso na matavosa bibi se vosa veiwekani.
Matata qai kilai rawarawa. Digitaka ga na tikina bibi e veisemati kei na nomu usutu, me rawa ni maqosa nomu veivakavulici ena loma ni gauna o lesi kina. Me kua sara ni levu na tikina bibi o kauta cake mai, ia me matata ga na kena ivakamacala, cegu vakalailai, me qai veisemati vinaka na tikina bibi kece.

E rawa ni o tukuna na veitikina bibi ena ikau ni nomu vosa mera vakamuria na vakarorogo se o tokaruataka ena itinitini ni nomu vosa me rawa nira nanuma na vakarorogo.