E Mai Duavata Tale Vakacava na Neitou Matavuvale?

Talanoataka o Lars kei Judith Westergaard

NA NODRATOU vale e vaka na ituvatuva ni vuvale mamarau e Denmark. E vale vinaka, totoka na kena lomanibai, qai tiko ena dua na koro e maravu tu kina na bula. Ena lalaga e loma ni vale, e lili toka kina na kedratou itaba levu na tolu na gone matadredredre qai bulabula vinaka.

Na tamadratou na gone e qase ni ivavakoso ni iVakadinadina i Jiova. O Lars na yacana. Na watina o Judith, e painia (cakacaka vakaitalatala vakatabakidua) tiko. E dina ni rau veiwatini mamarau, ia a sega tu ni vaka oqo e liu. Erau sa sotava oti o Lars kei Judith na leqa kei na rarawa tini sara ena veisere kei na tawase ni matavuvale. Nikua, sa duavata tale na nodrau matavuvale. E rawa vakacava? Erau vakamacalataka na veika e yaco.

E sega ni dua na ka vei Lars kei Judith me rau talanoataka na veika e vakavuna na leqa ni nodrau vakamau kei na nodrau mai duavata tale. Erau nanuma ni na rawa ni vukei ira tale na so ke rau talanoataka na veika erau sotava.

Tekivu Vinaka

Lars: E marautaki dina na neirau bula vakawati ni tekivu ena Epereli 1973. Keirau namaka me na vinaka cake na bula kei na neirau cakava rawa e levu na ka mai muri. Keirau sega ni kilai ira na iVakadinadina i Jiova se kila na iVolatabu, ia keirau kila deivaki tu ni rawa ni keirau vakavinakataka na vuravura me dua na itikotiko vinaka, kevaka wale ga mera veitokoni kece na tamata. Mani keirau vakaitavi sara ena politiki. E levu sara na neirau marau ni sa tolu na luvei keirau tagane kaukaua qai bulabula vinaka​—o Martin, o Thomas, kei Jonas.

Judith: Au vakaitutu vinaka ena dua na taba ni cakacaka vakamatanitu. Ena gauna vata oya, au vakaitavi tale tiko ga ena politiki kei na unioni ni tamata cakacaka. E qai soli vei au meu veiliutaki.

Lars: Au cakacaka ena dua na unioni levu ni tamata cakacaka. E toso cake na noqu itutu. Keirau toso vinaka ruarua ena neirau cakacaka, a totoka dina na draki ni bula.

Tekivu Tawase

Lars: Ka ni rarawa ni keirau kauaitaka vakalevu na neirau cakacaka, sa lailai na gauna me keirau marau vata vakaveiwatini. Keirau cakacaka vata tiko ga ena dua na isoqosoqo vakapolitiki, ia ena duidui tabana. E so era dau raici iratou na luvei keirau tagane, se ratou lai tiko ena vale era daumei kina na gone. Ni keirau dui kauaitaka ga na veika me baleti keirau, sa sega ni tuvanaki vinaka kina na neitou matavuvale. Kevaka keirau tiko ruarua e vale, ena katuvu ga na veiba. Au tekivu gunu me vakaseavutaka na cudru.

Judith: E dina ni keitou se veilomani tiko, sa sega ga ni vaka na neitou veilomani eliu; vaka me sa malumu sobu. Sa sega ni vinaka neirau veimaliwai. Sa ratou bau vakila tale ga na kena ca na luvei keirau.

Lars: Me rawa ni keitou veimaliwai vinaka tale, au mani biuta kina na noqu cakacaka. Ena 1985 keitou biuta na korolevu me keitou gole ina koro keitou tiko kina nikua. E via vinaka vakalailai na bula, ia keirau se dui dre ga na neirau mua. Keirau sere ena Feperueri, 1989, ni yabaki 16 na neirau vakamau. Sa mai kasura na neitou matavuvale.

Judith: E rarawataki dina meu raica na tawase ni neitou matavuvale kei na kedratou ituvaki vakaloloma na gone. Na levu ni neirau veimecaki, e sega sara ga ni keirau bau lomavata rawa ena ka e baleta na nodratou taqomaki na gone, sa mani ratou tiko ga vei au.

Lars: Keirau saga ena lecaika kei Judith me keirau vakaduavatataka tale na neirau matavuvale. Keirau bau masu tale ga vua na Kalou me vukei keirau. Ia e lailai sara na ka keirau kila me baleta na Kalou.

Judith: Na neirau masu e vakavuna me keirau lai nanuma ni sega ni rogoca na Kalou. Keirau vakavinavinaka ni keirau raica rawa vakamalua ni daurogo masu na Kalou.

Lars: Keirau sega ni kila se dodonu me keirau saga e so na ka se me keirau veisautaka. E mani vakavuna na neitou rarawa ni sa yaco dina na veisere.

Veisau Tawanamaki Nei Lars

Lars: Niu tiko taudua ga, e yaco e so na ka e veisautaki au sara ga vakadua. Ena dua na siga, au taura e rua na ivoladraudrau mai vei ira na iVakadinadina i Jiova. Ni se bera oya, au dau vakatalai ira tani na iVakadinadina i Jiova. Ia niu wilika na ivoladraudrau oya, au qai kila kina nira vakabauta na Kalou kei Jisu Karisito na iVakadinadina. Dua na ka na noqu kurabui. Au sega mada ga ni kila nira lotu Vakarisito.

Ena gauna oya, keirau sa tiko kina kei na dua tale na marama. A dua tu vei ira na iVakadinadina i Jiova o koya. Niu tarogi koya ena so na taro, sa qai vakaraitaka vei au ena iVolatabu ni yaca ni Kalou o Jiova. Au sa qai raica rawa ni vosa “iVakadinadina i Jiova” e kena ibalebale “iVakadinadina ni Kalou”!

E tuvanaka sara na marama oqo meu tiko ena vunau soqovilevu ena Assembly Hall ni iVakadinadina i Jiova. Na veika au raica e kea e uqeti au sara ga. Au gole ena Kingdom Hall voleka me levu tale na ka au vulica, au mani vuli iVolatabu sara. Sega ni dede au sa kila sara ni cala na ka au cakava tiko, vakavuna me keirau veibiu kei na noqu itokani marama oqo meu lai tiko taudua ena noqu koro dina. Au via lomalomarua vakalailai, ia au mani veitaratara kei ira na na iVakadinadina i Jiova e kea meu tomana noqu vuli iVolatabu.

Au se lomatarotarotaka tiko ga e so na ka. Era tamata dina beka ni Kalou o ira na iVakadinadina i Jiova? Vakaevei na veika au vulica niu se gone? Me vaka niu tuberi mai ena lotu iKavitu, au mani veitaratara kei na dua na kena italatala. E vakadonuya me keirau vuli ena veisiga Vukelulu, ia ena siga Moniti kece au dau vuli kei ira na iVakadinadina i Jiova. Au via kila na isaunitaro matata mai na lotu ruarua oqo me baleta e va na ulutaga bibi: na lesu mai i Karisito, na veivakaturi, na ivakavuvuli ni Letoluvakalou, kei na sala cava me tuvanaki kina na ivavakoso. E vica ga na vula sa vakacegui sara ga na lomaqu. E va na ka oqo kei na vo tale ni ivakavuvuli​—e yavutaki kece vakaivolatabu na nodra vakabauta na iVakadinadina i Jiova. O koya gona, au sa tekivu vakaitavi sara ena cakacaka kece ni ivavakoso kei na noqu yalataki au vei Jiova. Au papitaiso ena Me, 1990.

Vakaevei o Judith?

Judith: Na leqa ni neirau vakamau, e vakavuna meu sa tekivu lai lotu tale. Dua na ka na noqu cata ni sa dua na iVakadinadina i Jiova o Lars. Au vakatabui Lars me kauti Jonas na luvei keirau gone duadua yabaki tini ina soqoni ni iVakadinadina i Jiova, ena gauna e dau sikovi tamana kina. E kerea na veivuke ni mataveilewai o Lars, ia era totaki au ga.

Lakolako keirau sa veibuku tiko kei na dua tale na turaga. Au vakaitavi tale ga vakalevu ena veika vakapolitiki kei na cakacaka ni lewenivanua. O koya gona sa na bau wadrega ke dua e tukuna ni rawa ni keitou duavata tale vakamatavuvale.

Niu saga e so na sala meu saqati ira kina na iVakadinadina i Jiova, au mani lako vua e dua na italatala ena neitou yasayasa. E kaya ni sega ni kila e dua na ka me baleti ira na iVakadinadina qai sega tale ga ni dua na ivola me baleti ira e tu vua. Na ka ga e tukuna oya meu qarauni au mai vei ira. E kuria tale oqo na noqu raici ira vakatani na iVakadinadina i Jiova. Ia ni toso na gauna au sotavi ira voraki ena sala au sega sara ga niu bau tadra.

Sa iVakadinadina i Jiova e dua na ganequ e tiko mai Suwiteni, au mani sureti sara ena nona vakamau e caka ena dua na Kingdom Hall! Na ka au raica kina e veisautaka sara ga na noqu rai baleti ira na iVakadinadina. Au kurabui nira sega ni tamata viavia yalododonu au dau raitayaloyalotaki ira tu kina. Era yalololoma, yaloyalovinaka, ra qai mamarau tale ga.

Ena gauna oqo sa veisau sara ga vakalevu na noqu veibiu, o Lars. Sa nuitaki vakalevu, e dau vakayagataka e levu na gauna vei iratou na gone, e yalovinaka qai qarauna na ka e kaya, kei na nona sega ni gunu vakasivia me vaka e liu. E tarai au dina na nona itovo! Au dau diva tu me dua na turaga vaka oqo o koya. Au rarawa niu vakasamataka ni keirau sa na sega ni veiwatini tale, rairai ena vakamautaki koya e dua tale na marama!

Au mani nanuma e dua na sala “qaseqase.” Ena dua na gauna ni se tiko kei tamana o Jonas, au nanuma meu lako kei na rua na taciqu me keitou lai raici koya, me via vaka toka ni dodonu me rau raici Jonas tale ga na tinana lalai. Keitou sota ena dua na rara ni gade. Ni rau raici gone tiko na tinana lalai, keirau lai dabe sara kei Lars ena dua na idabedabe.

Au kurabui ni gauna vata ga au kaya kina se na vakacava na bula ni neirau matavuvale ena gauna se bera mai, e ucuna sara mai na nona taga e dua na ivola. Na yaca ni ivola na Tauyavutaka Nomu Bula Vakamatavuvale me Mamarau.a E solia vei au na ivola qai kaya meu wilika na wase e baleta na nodra itavi na tagane vakawati kei na yalewa vakawati ena matavuvale. E vakabibitaka sara ga o koya meu raica kece na tikinivolatabu.

Ni keirau tucake, au via taura sara na ligana, ia e vakamalua ga na nona biliga tani na ligaqu. E sega sara ga ni bau via voleka vei au o Lars ni sega ni kila na noqu rai me baleta na nona vakabauta vou. E vakamosia dina na lomaqu, ia au qai kila ni vukutaki dina na ka e cakava oya, ena yaga tale ga vei au kevaka me keirau veiwatini tale.

Na veika oqo e sa qai vakavuna ga meu kauai vakalevu me baleti ira na iVakadinadina i Jiova. Ena siga tarava, au veitaratara sara kei na dua na marama au kila ni dua na iVakadinadina, au mani veivosakitaka kei rau vakaveiwatini me rau mai vakamacalataka vei au e so na ka me baleta na nodrau lotu. Erau sauma vakaivolatabu na noqu taro kece. Au raica e kea ni veika era vakatavulica na iVakadinadina i Jiova e yavutaki vinaka kece vakaivolatabu. Na veika kece keitou a veitalanoataka, au raica ni sa dodonu ga meu vakamalumalumutaki au ena ka dina.

Donuya na gauna oya au cegu mai na lotu Evangelical Lutheran kei na cakacaka vakapolitiki. Au biuta tale ga na vakatavako e dina ni a ikalawa dredre duadua. E tekivu na noqu vuli iVolatabu ena Okosita 1990, ia ena Epereli 1991, au papitaiso kina meu iVakadinadina i Jiova.

iKarua ni Nodrau Vakamau

Judith: Keirau sa iVakadinadina papitaiso oti. E dina ni keirau a dui golegole tu, keirau vulica ruarua ga na iVolatabu. Au vakavinavinakataka na kena ivakavuvuli, ni keirau sa veisau mai na ituvaki keirau a tu kina e liu. Keirau se veikauaitaki tiko ga, ia sa levu cake sara. O koya gona keirau sa galala me keirau vakamau tale​—io na ka sara ga oqo keirau qai cakava. Keirau vosa bubului ena ikarua ni gauna, ia sa caka ena Kingdom Hall ni iVakadinadina i Jiova.

Lars: Sa veivakurabutaki dina​—keitou sa mai duavata tale vakamatavuvale! Sa dua na ka na neitou marau!

Judith: Eratou tiko ena neirau vakamau o iratou na luvei keirau, na wekai keirau, na neirau itokani makawa, kei ira na neirau itokani vou. E a dua na soqo taleitaki. Era maliwai ira na tiko ena siga oya o ira era kilai keirau e liu ena imatai ni neirau vakamau; era marau mera raica na neitou duavata kei na reki dina e kune vei ira na iVakadinadina i Jiova.

O Iratou na Gone

Lars: Keirau papitaiso ruarua kei Judith, keirau marau tale ga me keirau raica na nodrau yalataki rau vei Jiova e rua na luvei keirau.

Judith: E taleitaka na ka dina mai na iVolatabu o Jonas ni se gone lailai sara ni dau sikovi tamana. Se yabaki tini o koya sa kerei au me lai tiko kei tamana, me vaka e vakamacalataka: “E vakamuria o Tamaqu na iVolatabu.” E papitaiso o Jonas ni yabaki 14. Sa otiva nona vuli. Sa dua tale tiko ga o koya e vunautaka vakatabakidua na itukutuku vinaka ni Matanitu ni Kalou.

Lars: Sa yabaki 27, o Martin, na luvei keirau tagane ulumatua. E vakasamataka sara ga vakabibi na veisau e raica vei keirau. E biubiu e vale me lai tiko ena dua tale na vanua. Ena rua na yabaki sa oti sa tekivu vulica na iVolatabu kei na ivavakoso ni iVakadinadina i Jiova voleka vua. Ni oti ga e lima na vula, sa vakarau me papitaiso. E tomana tiko ga na nona inakinaki vinaka me baleta na gauna sa tu oqo e liu me vaka ni dua na lotu Vakarisito.

Na ikarua ni luvei keirau tagane o Thomas, e se bera ni dua na iVakadinadina i Jiova. Keirau lomani koya tu ga qai vinaka tale ga na neitou veimaliwai. E marautaka na veisau e mai yaco ena neitou matavuvale. Keitou duavata kece ni keitou vakavinavinakataka na ivakavuvuli keirau vulica na itubutubu mai na iVolatabu, sa mai duavata kina na neitou matavuvale. Sa dua dina na veivakalougatataki me rawa ni keitou mai duavata vakamatavuvale kei na tolu na luvei keirau!

Neitou Bula Nikua

Lars: Keirau sega ni kaya ni keirau sa vinaka vakaoti ena gauna oqo. Sega, ia keirau vulica e dua na ka​—na loloma kei na veidokai dina erau ka bibi me tudei kina na vakamau. Na yavu e taravaki kina na neirau vakamau nikua e duidui vakalevu sara mai na kena e liu. Nikua, keirau sa ciqoma na veiliutaki e cecere cake mai vei keirau, ni keirau kila ni keirau bula tiko ena vuku i Jiova. Keirau duavata dina kei Judith qai keirau vakanamata ena nuidei ina gauna e se bera mai.

Judith: Au vakabauta ni keirau ivakadinadina vinaka ni o Jiova ga e dauniveivakasalataki vinaka duadua ni veiwatini kei na matavuvale tale ga.

[iVakamacala e ra]

[iYaloyalo ena tabana e 20]

O Lars kei Judith ena imatai ni nodrau vakamau, ena 1973

[iYaloyalo ena tabana e 21]

Eratou calata na tolu na gonetagane na nodratou duavata vakamatavuvale ia eratou sa qai kunea tale

[iYaloyalo ena tabana e 23]

O Lars kei Judith nikua, rau sa mai duavata ni rau muria na ivakavuvuli vakaivolatabu