Ra Taroga na iTabagone . . .

Cava e Cala Kina na Veiyacovi ni Bera na Vakamau?

“So na gauna au dau vakasamataka se ca dina se sega na veiyacovi ni bera na vakamau, vakauasivi niu lialiaci niu se sega ni veiyacovi.”​—Jonetani.a

“Kaukaua dina noqu via veiyacovi. Au kila ni dau yacovi keda kece,” e kaya o Keresi. E tomana: “Vanua cava ga o lako kina, na ka kece ga sa baleta na veiyacovi!”

E TAUTAUVATA beka nomu rai kei na nodrau rai o Jonetani kei Keresi? Meda kila tiko ni sa totolo sara na kena seavu na itovo kei na ivakarau vakavanua e dau vakatabuya na veiyacovi ni bera na vakamau. (Iperiu 13:4) Na vakatataro ena dua na vanua vakaesia e vakaraitaka ni levu vei ira na gonetagane ena maliwa ni yabaki 15 ina 24 era vakabauta ni sega wale ga ni vakadonui mera veiyacovi ni bera na vakamau, e namaki sara ga vei ira. Sa rauta mera dau veiyacovi e levu na itabagone ena veiyasa i vuravura ni bera mada ga nira yabaki 19.

Sa qai tiko o ira na itabagone era sega ni veiyacovi ia era vakayacora e so tale na kena ivalavala me kena isosomi, me vaka na nodra veiyamoci yago tabu (so na gauna e dau vakatokai me vakatavevele). E kidroataki na itukutuku e kaya na niusiveva na New York Times oya ni “sa takalevu sara na veiyacovi e vakayagataki kina na gusu ena yago tabu me idewadewa ina veiyacovi, era kaya e levu na itabagone ni kevaka erau cakava oqo e le rua erau na se sega ni veivolekati sara, e sega soti sara ni ririkotaki, ni vakatauvatani kei na veiyacovi ga vakadodonu . . . [qai] sala oqo ena sega kina na bukete ra qai taqomaka nodra savasava.”

Ia, ena raica vakacava na lotu Vakarisito na veiyacovi ni bera na vakamau? Vakacava na kena ivalavala tale e so ni veiyacovi? E vakadonuya beka na Kalou? E sega beka na kena leqa? E taqomaka dina beka na nona savasava e dua?

Veika e Wili me Veidauci

Na isau nuitaki ni veitaro oqo e lako ga mai vua na noda Dauveibuli, na Kalou o Jiova. E kaya vei keda nona Vosa meda “dro tani mai na daudara [“veidauci,” NW].” (1 Korinica 6:18) Na cava sara mada na kena ibalebale oqori? Na vosa vakirisi e vakadewataki me “veidauci” e sega ni yalani ga ena veiyacovi, e okati tale ga kina na kena ivalavala dukadukali tale e so. Koya gona, ke rua erau sega ni vakamau rau qai vakayagataka na gusu ena yago tabu se me rau veiyamoci gacagaca ni vakatubukawa, erau sa veidauci.

Ena rawa beka ni tukuni ni rau se savasava tiko ga ena mata ni Kalou? Ena iVolatabu na vosa “savasava” e vakayagataki me vakatakila na nona savavuka e dua. (2 Korinica 11:2-6) Ia e vakayagataki tale ga me dusia na savasava vakayago. Na iVolatabu e tukuni Repeka e dua na goneyalewa. E tukuni ni “goneyalewa dina [savasava], sa sega na tagane erau veiyacovi kaya.” (Vakatekivu 24:16) Ia, e vakavure vakasama ni vosa na “veiyacovi” ena vosa taumada vakaiperiu e sega ni vakaibalebaletaka ga na nodrau veiyacovi na tagane kei na yalewa, ia e okati kina e so tale na kena ivalavala. (Vakatekivu 19:5, NW) Koya gona, ena rai vakaivolatabu, ke dua na itabagone e veidauci, ni muria na kena ivalavala cava ga, e sa na sega tu ga ni vakatokai me savasava.

Na iVolatabu e vakamasuti ira na lotu Vakarisito mera drotani mai na veidauci kei na ivalavala kece e tawasavasava, e rawa ni lai tini ena veidauci.b (Kolosa 3:5) E so beka era na vakalialia iko ni o vakayacora oqori. “Na vosa, ‘O sega ni kila na levu ni ka vinaka o sa calata tiko!’ au dau rogoca ena noqu gauna ni vuli ena sekedri,” e kaya o Keresi, e dua na itabagone lotu Vakarisito. Io, na veiyacovi ni bera na vakamau e kena ibalebale ga na ‘marautaki vakalekaleka ni ivalavala ca.’ (Iperiu 11:25, VV) E rawa ni vakaleqa vakadua na noda bula, na ivakarau ni yaloda, kei na noda veika vakayalo.

Leqa Levu

Na iVolatabu e kaya ni raica ena dua na gauna o Tui Solomoni e dua na cauravou ni vecei me veiyacovi ni bera na vakamau. A vakatauvatana o Solomoni na cauravou oqo kei “na pulumokau ni sa la’ki vakamatei.” Na bulumakau e lai vakamatei e sega sara tu ga ni kila na ka ena vakarau yaco vua. E vakatale ga oya nodra ivakarau na itabagone era veiyacovi ni bera na vakamau, era taura tu ga vakamamada se ra lecava na veika ca era na sotava ena vuku ni veika era cakava! E kaya o Solomoni me baleta na cauravou oya: “Ka sa sega ni kila ni sa ka me mate kina.” (Vosa Vakaibalebale 7:22, 23) Io, e leqataki dina na nomu bula.

Kena ivakaraitaki, e veiyabaki e takavi ira e vica vata na milioni na itabagone na mate ca ni veiyacovi vakaveitalia. “Gauna au kila kina ni tauvi au na mate ni veiyacovi na herpes, au kaya ga meu dro ena dua tale na vanua,” e kaya o Litia. E osivaka, “E mate mosimosi ena sega ni oti rawa.” Vei ira se qai tauvi ira na mate na AIDS e vuravura raraba, e veimama (6,000 ena dua na siga) vei ira oqo era tiko ena maliwa ni yabaki 15 ina 24.

E rivarivabitaki vakalevu nodra bula na yalewa ni rawa ni tauvi ira e levu na mate e vu mai na veiyacovi ni bera na vakamau. Na revurevu tale ga ni mate ni veiyacovi vakaveitalia (okati kina na AIDS) e vakadeitaki ni vakaleqai ira vakalevu na yalewa ni vakatauvatani kei ira na tagane. Ke mani bukete e dua na goneyalewa, sa na leqataki na nona bula kei na bula i luvena e se kunekunetaka tiko. Na vuna? Na yago i koya na goneyalewa ena sega sara beka ni se yacova na ivakatagedegede me vakasucu vakavinaka kina.

Ia kevaka beka ena sega ni vakaleqai kina nona bula na goneyalewa e sa tinanigone oqo, ena qai sotava na tarabi ni icolacola vakatina. E levu na goneyalewa era qai liaca ni sa rui dredre na qarai ni veika me rau bula kina vakaveitinani me vaka era nanuma taumada.

Sa qai tiko na kena revurevu vakayalo kei na kena cakayaco e lomadra. Na cala nei Tui Tevita ena nona veiyacovi e vakaleqa na nona veiwekani kei na Kalou qai voleka sara ni vakacaraki koya vakayalo. (Same 51) E dina ni a qai kaukaua tale vakayalo o Tevita, ia a sotava na revurevu ni nona ivalavala ca ena vo ni nona bula.

Ena vakatale ga oya na ka era sotava na itabagone nikua. Kena ivakaraitaki, ni se yabaki 17 o Kelera, a veiyacovi kei na dua na gonetagane. A nanuma ni domoni koya o tagane. Ena veiyabaki e muri, a se rarawataka voli ga na ka e cakava. E tusanaka: “Au taura vakamamada na ka dina ena iVolatabu, au mani sotava kina na kena ca. Na kena e ca sara oya ni sega ni vakadonui au kina o Jiova.” A vakatusa tale ga na itabagone na yacana o Tirisa: “Na noqu cala levu duadua oya niu veiyacovi ni se bera na vakamau. Au na cakava na cava ga meu rawa ni savasava tale kina.” Io, e rawa ni vakayabaki na momosi ni yalo, me vakavuna na lomaocaoca kei na rarawa.

Vulica Mo Lewai Iko Vinaka

Dua na taro bibi a taroga o Susana, “Na cava e solia kina na Kalou na gagadre ni veiyacovi vei ira na itabagone, qai kaya ni dodonu mera veiyacovi ga ena gauna era sa vakamau kina?” Na gagadre ni via veiyacovi e rawa ni kaukaua sara ena “gauna ni gone.” (1 Korinica 7:36) E rawa ni tarai ira vakasauri na itabagone. Ia e sega ni cala oqo. E tiki ga ni veiveisau e dau yaco ena gacagaca ni vakatubukawa.c

O Jiova tale ga e vakarautaka me marautaki na veiyacovi. Oqo e salavata kei na nona inaki taumada me tawana na kawatamata na vuravura. (Vakatekivu 1:28) Ia, a sega ni nakita na Kalou meda vakayagataka cala na noda kaukaua ni vakatubukawa. E kaya na iVolatabu: “Mo dou dui kila yadua mo dou maroroya na yagomudou me vakasavasavataki ka me dokai.” (1 Cesalonaika 4:4) Na noda vakaceguya na gagadre ni via veiyacovi ena gauna kece ga e vure mai kina e ka vakalialia me vaka na noda roba e dua ena gauna kece eda cudru kina.

Na veiyacovi e isolisoli ni Kalou, na isolisoli me marautaki ena kena gauna veiganiti, ni oti na vakamau. E raica vakacava na Kalou na noda saga meda marautaka na veiyacovi ena taudaku ni vakamau? Vakasamataka mada ke o volia e dua na iloloma vua na nomu itokani. Ni bera ni o solia vua, sa butakoca! O na sega beka ni cudru? Qai vakasamataka se na raica vakacava na Kalou e dua e veiyacovi ni bera ni vakamau, me vakayagataka cala na isolisoli e vakarautaka na Kalou.

Na cava mo cakava ni vure mai na gagadre ni via veiyacovi? Na kena isau rawarawa ga, vulica mo lewai iko vinaka. Dau nanuma ni o Jiova “ena sega ni bureitaka e dua na ka vinaka vei ira era sa lako vakadodonu.” (Same 84:11) “Gauna ga e votu mai kina vei au ni sega ni ca na veiyacovi ni bera na vakamau,” e kaya na itabagone na yacana o Joji, “au vakasamataka sara na veika ca vakayalo ena sotavi kina kei na noqu liaca ni sega tale ni dua na ivalavala ca e tautauvata kei na tagutuvi ni noqu veiwekani kei Jiova.” E sega ni rawarawa meda lewai keda vinaka. Ia me vaka ga e kaya na cauravou o Adriu, “e savasava kina na nomu lewaeloma qai vinaka nomu veiwekani kei Jiova, o galala mo vakabibitaka na veika e yaga cake, qai sega ni vakacaraki na lomamu ena veika o vakayacora.”​​—Same 16:11.

E levu sara na vuna vinaka mo “kakua ni dauyalewa [“veidauci,” NW]” kina ena kena ivalavala cava ga. (1 Cesalonaika 4:3) Ia, e ka toka ni sasaga ena veigauna kece. Na ulutaga ena tabana e 28 ena qai vakamacalataka na veika me vakayacori mo “maroroi iko mo savasava tiko [ga].”​​—1 Timoci 5:22.

[iVakamacala e ra]

[Tikina bibi ena tabana e 17]

Ke dua na itabagone e veidauci ena kena ivalavala cava ga, e rawa beka ni tukuni ni se savasava tiko ga ena mata ni Kalou?

[iYaloyalo ena tabana e 17]

Na veiyacovi ni bera na vakamau e rawa ni vakaleqa na nona lewaeloma na itabagone e qarava na Kalou

[iYaloyalo ena tabana e 18]

E leqataki na nodra bula o ira era veiyacovi ni bera na vakamau ni rawa ni tauvi ira na mate ca ni veiyacovi vakaveitalia