Nodra Vakacegui na Gone Era Lolosi

E sega ni dau rawarawa meda tukuna vua e dua na uabula ni sa takali e dua na wekana lomani. Ia sa na qai wacava meda tukuna vua e dua na gonelailai.

E LEVU vei ira na gone era dau veilecayaki qai rere ena gauna e takali kina e dua na nodra lewenivuvale se itokani. E sega ni rawarawa me vakacegui e dua na gone ena gauna va qori, vakabibi me veivakacegui e dua na itubutubu e lolosi tale tiko ga, ni o ira mada ga era vinakata na veivakacegui.

Eso na itubutubu era tukuna vei ira na gone ni o koya e sa takali e sa biuti ratou se sa biubiu, me rawarawa kina na nodra ciqoma. Ia na itukutuku va qori e veivakacalai qai sega ni vakabauti. O na vakamacalataka vakacava vua e dua na gone na veika e baleta na mate?

Qori sara ga na ka erau sotava o Renato kei Isabelle. Ena gauna e takali kina o Nicolle na luvedrau yalewa e yabaki tolu veimama, a vinakati me rau vakaceguya na nona lolosi o Felipe, na luvedrau tagane e se yabaki lima ena gauna oya.

Yadra!: Drau vakamacalataka vakacava vei Felipe na nona takali o Nicolle?

Isabelle: Keirau saga sara ga me keirau tukuna vei Felipe na ka dina, me kua ni vunitaki vua e dua na ka. Keirau uqeti koya me taro, keirau qai saga me keirau sauma na nona taro ena kena ibiubiu me ganita na nona yabaki. E mate o Nicolle ni vagagai koya e dua na manumanu somidi ni mate, keirau mani tukuna vua ni dua na manumanu somidi e curuma na yagona ra qai sega ni vakamatea rawa na vuniwai.

Yadra!: Drau vakamacalataka vei Felipe na nomudrau vakabauta me baleti ira na mate?

Renato: Keirau dua na iVakadinadina i Jiova, keirau kila tale ga ni na vakacegui Felipe na neirau vakamacalataka vua na neirau vakabauta yavutaki vakaivolatabu me baleti ira na mate. E matata vinaka na ka e tukuna na iVolatabu, e vakavuvulitaka nira sa sega ni kila e dua na ka na mate. (Dauvunau 9:5) Keirau wasea qori vei Felipe, keirau kila ni na seavu kina na nona rere. Kena ivakaraitaki, na nona dau rere ni tiko taudua ena bogi.

Isabelle: E vakavuvulitaka tale ga na iVolatabu ni o ira na mate era na vakaturi tale ena vuravura parataisi. Qori na ka keirau vakabauta, keirau kila tale ga ni na veivakacegui qori vei Felipe. Keirau veivosakitaka gona vata kei koya na ka e vakavuvulitaka na iVolatabu. Keirau tukuna vua na italanoa ena iVolatabu me baleti Jisu ena nona vakaturi luvei Jairo yalewa, e yabaki 12. Oti keirau qai vakamacalataka vei Felipe ni na vakaturi tale ga o Nicolle baleta qori sara ga na ka e tukuna na iVolatabu.​—Marika 5:​22-24, 35-42; Joni 5:​28, 29.

Yadra!: Drau nanuma ni na taura rawa o Felipe na itukutuku kece qori?

Renato: Io keirau vakabauta ni na taura rawa. Era na kila rawa na gone na kedra ituvaki na mate ra qai sega ni lolosi vakalevu ke da vakamacalataka na ka e yaco dina, me rawarawa, matata, qai sega ni dua na ka e vunitaki. E dau yaco dina na mate. E ka ni rarawa nida na mate kece. E bibi gona vei ira na itubutubu mera vakavulici luvedra mera kila na kedra ituvaki na mate kei na sala mera kua kina ni lolosi vakalevu. Keirau a qai cakava tale ga qori vei Vinicius na luvei keirau tagane e gone vei Felipe.a

Yadra!: Drau kauti Felipe ena veibulu?

Renato: Ni keirau vakalewa vinaka na ituvaki kece, keirau mani nanuma me sa kua ni lako. E dau rawarawa mera vakamuai na gone ena yabaki ni bula va qo. Eso na itubutubu era vakatulewataka mera kauti luvedra, ia era duidui na gone, eso na gone ena tarai ira na ka era raica eso e sega. Ke kau na gone ina veibulu, e bibi me tukuni vua na ka sara ga ena vakayacori kina.

Yadra!: E gauna rarawataki mada ga vei kemudrau na nona takali o Nicolle. Vakacava drau leqataka ni na raica o Felipe ni drau tagi?

Isabelle: Keirau sega vakadua ni via vunitaka vei Felipe na neirau rarawa. Ke “tagi” mada ga o Jisu ni takali e dua na wekana lomani, na cava me keirau kua ni tagi kina? (Joni 11:​35, 36) Keirau raica ni sega ni dua na kena leqa me raica o Felipe na neirau tagi. Neirau vakaraitaka na neirau lolosi e raica kina o Felipe ni sega ni cala ke da tagi. Qori e dua na sala eda vakaraitaka kina na lomada. Keirau vinakata vei Felipe me kila ni rawa tale ga vua me vakaraitaka na lomana, me kua ga ni dau kinoca.

Renato: Ni yaco e dua na leqa ena vuvale, era nanuma na gone nira sega ni kauaitaki. Koya gona, ke da dau dina na itubutubu da qai vakaraitaka na lomada era na cakava tale ga qori na gone. Nida vakarogoca vinaka na ka era lomaleqataka, eda na kila kina na ka meda cakava meda vakacegui ira da qai vakalailaitaka na nodra rere.

Yadra!: Eso era bau vukei kemudrau?

Renato: Io, era vukei keirau sara vakalevu na lewe ni neirau ivavakoso. Na nodra veisiko, qiri, kei na nodra vakau kad mai, e raica kina o Felipe na levu ni nodra loloma kei na nodra veikauaitaki.

Isabelle: Era veivuke tale ga vakalevu na wekai keirau. Ena gauna a takali kina o Nicolle, e vakatulewataka o tamaqu me mai katalau vata kei keitou ena veimataka. Qori e vakaraitaka nona nanumi keitou. E vukei Felipe tale ga na nona dau gole mai o tamaqu.

Renato: E yaga sara vakalevu na veiuqeti vakayalo keitou rogoca ena soqoni vaKarisito. Keitou dau saga me keitou kua ni calata na soqoni, dina ni keitou dau luluvu ena so na gauna. Keitou dau nanumi Nicolle vakalevu ena gauna keitou dau gole kina ena soqoni vaKarisito. Ia keirau kila ni vinakati me keirau dei tiko ga, vakabibi ena vuku i Felipe.

[iVakamacala e ra]

[Kato/iYaloyalo ena tabana e 27]

Na ivola era toka qo e ra, tabaka na iVakadinadina i Jiova, e rawa ni veivakacegui vei ira e takali e dua na wekadra lomani.

VEI IRA NA UABULA:

Na Cava Sara Mada e Kaya na iVolatabu?

Wase 6: Era Tu e Vei na Mate?

Wase 7: Na iNuinui Totoka me Baleti Ira na Wekada Era sa Takali

VEI IRA NA GONE:

iTalanoa mai na iVolatabu

iTalanoa naba 92: Vakaturi Ira na Mate o Jisu

O IRA NA GONE YABAKI 9 INA 13:

Vuli Vua na Qasenivuli Levu

Wase 34: Na Cava ena Yaco Nida Mate?

Wase 35: Rawa Meda Bula Mai na Mate!

Wase 36: O Cei ena Vakaturi? Era na Bula e Vei?

VEI IRA NA ITABAGONE:

Questions Young people ask answers that work, Volume 1

Wase 16: Is It Normal to Grieve the Way I Do?

[Kato/iYaloyalo ena tabana e 28]

SALA MO VEIVUKE KINA

● Uqeta me dau taro. Ke vinakata o luvemu mo drau veitalanoataka na ka me baleta na mate, tu vakarau qai yalorawarawa mo veivosakitaka na kena ibalebale.

● Kua ni vakayagataka na ivosavosa e sega ni matata​—kena ivakaraitaki, noda tukuna ni sa “biuti keda” se “gole” o koya e mate.

● Vakamacalataka vakavinaka na ibalebale ni mate, ena kena ivakamacala rawarawa. Eso era dau tukuna ni yagoi koya sa takali e sa “sega ni yavala” qai “sega ni vakavinakataki rawa.”

● Tukuna vua na gone na ka me namaka ena gauna ni veibulu; vakamacalataka tale ga ni o koya sa mate e sega ni raica se rogoca na ka e caka tiko.

● Kua ni kinoca na lomamu. Ni o cakava qori ena raica o luvemu ni sega ni cala na lolosi.

● Mo nanuma tiko ni sega ni dua ga na “ivakarau” ni lolosi. Era duidui na gone, e duidui tale ga na ituvaki e dau yaco.

[Credit Line]

Vakarautaka: www.kidshealth.org

[iYaloyalo ena tabana 28]

Mai na imawi ina imatau: Felipe, Renato, Isabelle, kei Vinicius