Bula Vakaidewadewa se Buli?
Nodra Toso na Dumudumukuro
● Na yagodra na dumudumukuro e rauta ni 95 na pasede e wai qai duidui na kedra levu. Eso era lailai mai na 3 na sedimita, eso tale era sivia e 2 na mita na kedra raba. E levu na mataqali dumudumukuro e dau tosoi ira ga na nodra masela, qori na kena dau sanuki qai malumu na yagodra e vaka tu na ibulibuli ni lali kaukamea. E tautauvata ga ni dumuki qai uruci na iviu.
Vakasamataka mada qo: O ira na saenitisi era dau dikeva na veitosoyaki ni kasi kei na wai, era sa raica ni so na dumudumukuro e duatani na ivakarau ni nodra toso, dina ga nira sega ni totolo. Ena gauna kece e sanuki kina na yagodra, era bulia e dua na viko ra qai kaburaka tani. Ena gauna e malumu kina na yagodra ena suka lesu mai na viko qori me tosoi ira i liu, me vaka ga na zet. Na zet e dua tu ga na ivakarau ni kena kaburaka na cagi, ia na dumudumukuro e kaburaka vakalalai na wai. E tukuna na mekesini na New Scientist: “Nida rogoca qori, eda nanuma ni rawarawa. Ia na kena sagai me buli na viko e kaburaka na dumudumukuro e dredre me vakamacalataki vakafika.”
Era sa dikeva tiko na daunivakadidike na nodra ivakarau ni toso na dumudumukuro mera bulia kina e dua na savumarini e totolo na kena toso e lomaniwai. E sa bulia oti e dua na dauvakadidike e dua na savumarini e 1.2 na mita na kena balavu, na gauna e toso kina e kaburaka na viko e tautauvata kei na viko e bulia na dumudumukuro. E lailai mai na 30 na pasede na igu e vakayagataka na savumarini qori ni vakatauvatani kei na misini kece e vakayagataka na ivocevoce. Na veika era dikeva qori e sema tale ga ena ka e dau yaco ena noda uto. Na noda dra e bulia na viko ni veidrodroyaki tiko ena yasana imawi ni noda uto. Ke sega ni rauni vinaka na ibulibuli ni viko e bulia qori na dra, e sa ivakatakilakila ni itekitekivu ni mate ni uto.
Na cava o nanuma? E bula vakaidewadewa se buli na toso ni dumudumukuro?
[iYaloyalo ena tabana e 10]
E bulia na dumudumukuro na viko qai kaburaka tani me rawa ni toso kina i liu
[iTaba ni Credit Line ena tabana e 10]
iTaba: © JUNIORS BILDARCHIV/age fotostock; droini: Courtesy of Sean Colin