LESONI 13

Sala e Beca Kina na Kalou o Lotu Lasu

iLavelave e Tabaki

Levu na lotu era kaya nira matataka na Kalou. Ia ke dauloloma na Kalou, na cava e cakava kina o lotu e levu na ka ca? Kena ibalebale ga nira lasu, era beca na Kalou. Era beci koya vakacava? Na cava nona rai na Kalou? Cava ena cakava kina?

**1. E beci vakacava na Kalou ena ivakavuvuli nei lotu lasu?**

O lotu lasu e “sosomitaka na dina ni Kalou ena ka lasu.” (Roma 1:25) Kena ivakaraitaki, e levu na lotu era sega ni vakavulica na yaca ni Kalou. Ia e kaya na iVolatabu me vakayagataki na yaca ni Kalou. (Roma 10:13, 14) Ni dau yaco na ka ca, eso na iliuliu ni lotu era kaya ni dau vakavuna na Kalou. Ia e lasu qori. E sega vakadua ni vakavuna na Kalou na ka ca. (Wilika Jemesa 1:13.) Ka ni rarawa, ni lasu qori e vakavuna kina e levu mera yawaka na Kalou.

2. E beca vakacava na Kalou o lotu lasu ena ka cakava?

Ni vakatauvatani kei Jiova, e duidui sara na ka e dau cakava o lotu lasu vei ira na lewena. E kaya na iVolatabu ni o lotu lasu e “bini cake na nona ivalavala ca me yacovi lomalagi.” (Vakatakila 18:5) Sa vica vata na senitiuri na nona vakaitavi ena veika vakapolitiki, e tokona na ivalu, e vakavuna nodra mate e levu na lewenivanua. Eso na iliuliu ni lotu era vutuniyau, ra qai lavaka na ilavo mera saumi kina. Na ka era cakava qori, e vakadeitaka nira sega ni kila na Kalou, se mera matataki koya.—Wilika 1 Joni 4:8.

3. Na cava na rai ni Kalou me baleti lotu lasu?

Ke o rarawataka na ka e cakava tiko o lotu lasu, sa qai wacava o Jiova! E lomani keda, ia e rarawataki ira na iliuliu ni lotu era beci koya ra qai vakalolomataki ira na lewenilotu. E yalataka ni na vakarusai o lotu lasu “ena sega ni kune tale.” (Vakatakila 18:21) Sa voleka ni oti vakadua o lotu lasu.—Vakatakila 18:8.

VAKEKELI

Dikeva eso tale na rai ni Kalou me baleti lotu lasu. Vulica e levu tale na ka e cakava o lotu lasu, ia me kua ni tarova qori na nomu via kilai Jiova.

4. Na Kalou e sega ni vakadonuya na lotu kece

Levu era vakabauta ni duidui lotu nikua, e vaka ga na duidui sala e basika kece vua na Kalou. Vakacava e dina qori? Wilika Maciu 7:13, 14, qai veivosakitaka na taro qo:

Na cava e tukuna na iVolatabu me baleta na sala e basika ina bula?

Sarava na VIDIO, qai veivosakitaka na taro qo.

VIDIO: E Vakadonuya na Kalou na Sokalou Kece?—Vidio Lekaleka (3:22)

Vakacava e tukuna na iVolatabu ni levu na lotu era na vakamarautaka na Kalou?

5. E sega ni vakavotuya o lotu lasu na loloma ni Kalou

E levu na sala e beca kina na Kalou o lotu. E laurai qori ena nona tokona na ivalu. Kena ivakaraitaki, sarava na VIDIO, qai veivosakitaka na taro qo.

VIDIO: iTavi ni Lotu ena iKarua ni iValu Levu (2:22)

Na cava era cakava e levu na lotu ena iKarua ni iValu Levu?
Na cava nomu rai?

Wilika Joni 13:34, 35 kei na 17:16, qai veivosakitaka na taro qo:

Na cava na rai i Jiova ni vakaitavi o lotu ena ivalu?
E levu na ka ca e cakava o lotu lasu. Na sala cava e sega ni vakavotuya kina o lotu na loloma ni Kalou?

iYaloyalo: Dua na valenilotu levu e dusia na nona dau tokona na lotu lasu na ivalu. 1. Na Mataivalu ni Lotu. 2. iMatai ni iValu Levu. 3. E vosa vakalougatataka tiko e dua na sotia na bete. 4. E veiuqeti tiko ena ivalu e dua na italatala e Aferika. 5. Era sokaloutaka tiko na Empra na sotia ni Japani — E sega ni vakavotuya o lotu lasu na loloma ni Kalou

6. E vinakata na Kalou meda lako tani mai vei lotu lasu

Wilika Vakatakila 18:4,a qai veivosakitaka na taro qo:

Na cava nomu rai ni vinakata na Kalou mo lako tani mai na veivakacalai nei lotu lasu?

7. Vulica tiko ga na veika me baleta na Kalou dina

Vakacava me veisautaka nomu rai me baleta na Kalou na veika e cakava o lotu lasu? Vakasamataka mada na gone e cata na ivakasala yaga nei tamana. E biubiu e vale qai cakava e levu na ka ca. E sega ni taleitaka o tamana na ka e cakava o luvena. Na cava e sega ni ka vakavuku kina me beitaki o tamana ena ka e cakava o luvena?

Vakacava e dodonu meda beitaki Jiova? Eda na sega ni via tomana noda vuli ena ka e cakava o lotu lasu?

KA ERA KAYA ESO: “Au sega ni vakabauta na Kalou ni levu na leqa e vakavuna o lotu.”

E va tale ga qori nomu rai?
Na cava me kua kina ni veisautaka noda rai me baleti Jiova na ka e cakava o lotu lasu?

KA O VULICA

O lotu lasu e beca na Kalou ena nona ivakavuvuli lasu kei na veika ca e cakava. Na Kalou ena vakarusai lotu lasu.

Railesuvi

Na cava nomu rai ena ka e vakavuvulitaka o lotu lasu kei na ka e cakava?
Na cava nona rai o Jiova me baleti lotu lasu?
Na cava ena cakava vei lotu lasu?

Vakaoti na lesoni ena:

iSausau

Ena soqoni tarava, taroga e dua, “Na cava e vakavuna mo dua na iVakadinadina i Jiova?”

Eso tale:

Dua tale nomu isausau

IKURI

Vulica e rua na sala era sega ni vakamarautaka kina na Kalou e levu na lotu.

“E Tautauvata na Lotu Kece? E Vakadonuya Kece na Kalou?” (Ulutaga ena jw.org)

Na cava e vinakata kina o Jiova meda sokaloutaki koya?

“E Bibi Meda Lewena e Dua na Lotu?” (Ulutaga ena jw.org)

A sega ni taleitaka e dua na bete na ka e cakava tiko nona lotu. Ia qori e sega ni tarova nona vulica na ka dina me baleta na Kalou.

“Vuna e Biuta Kina Nona Lotu e Dua na Bete” (Yadra!, Feperueri 2015)

Sa vakayabaki na nona tukuna tiko o lotu na lasu me baleta na Kalou, era lai nanuma kina e levu ni yawaki keda qai sega ni dauloloma. Vulica na ka dina me baleta na tolu na lasu qori.

“Lasu e Nanumi Kina ni Sega ni Dauloloma na Kalou” (Na Vale ni Vakatawa, 1 Noveba, 2013)

a Na ivola na Vakatakila e vakamacalataki lotu lasu me vaka e dua na yalewa, e vakatokai me Papiloni na Ka Levu, raica na iKuri ni iVakamacala 1.