LESONI 45

Na iBalebale ni Tawaveitovaki

iLavelave e Tabaki

E vakavulici ira na nona imuri o Jisu mera kua ni “vakavuravura.” (Joni 15:19) Qori nira tawaveitovaki, mera kua ni tovaka e dua na isoqosoqo vakapolitiki se vakaitavi ena ivalu. Ia e sega ni rawarawa meda tawaveitovaki nida dau vakalialiai. Eda na tawaveitovaki qai yalodina tiko ga vakacava vua na Kalou o Jiova?

1. Era raica vakacava na veiliutaki na lotu vaKarisito?

Era doka na veiliutaki na lotu vaKarisito. Eda muria na ka e tukuna o Jisu nida “solia vei Sisa na ka e nei Sisa,” eda cakava qori nida muria na lawa ni vanua me vaka na saumi ni ivakacavacava. (Marika 12:17) E tukuni ena iVolatabu ni vakatara tiko o Jiova na nodra veiliutaki na matanitu vakatamata. (Roma 13:1) Eda kila kina ni vakaiyalayala na veiliutaki se lewa vakatamata. Eda nuitaka na Kalou kei na nona Matanitu vakalomalagi me vakaotia na noda leqa na kawatamata.

2. Eda na vakaraitaka vakacava nida tawaveitovaki?

Me vakataki Jisu, eda na sega ni vakaitavi ena veika vakapolitiki. Nira raica na tamata na nona cakamana o Jisu, era via buli koya me tui ni vuravura qo, ia e qai dro. (Joni 6:15) Na vuna? E tukuna o koya ena dua na gauna e muri, “e sega ni vakavuravura na noqu Matanitu.” (Joni 18:36) Nida tisaipeli i Jisu, eda vakaraitaka noda tawaveitovaki ena levu na sala. Kena ivakaraitaki, eda sega ni vakaitavi ena ivalu. (Wilika Maika 4:3.) Eda doka na ivakatakilakila ni matanitu—me vaka na kuila—ia eda na sega ni sokaloutaka. (1 Joni 5:21) Eda na sega ni tovaka se saqata e dua na isoqosoqo vakapolitiki se na kena mata. Qori na sala eda vakaraitaka kina ni vakatabakidua noda yalodina vua na Matanitu ni Kalou.

VAKEKELI

Dikeva eso na ituvaki e rawa ni vakatovolei kina noda tawaveitovaki, kei na sala me vakamarautaki Jiova kina nomu vakatulewa.

E tawaveitovaki e dua na turaga, e sega ni via rogoca na ka era tukuna na daunipolitiki.

3. Era tawaveitovaki na lotu vaKarisito dina

E ivakaraitaki vinaka vei keda o Jisu kei ira na nona imuri. Wilika Roma 13:1, 5-7 kei na 1 Pita 2:13, 14. Sarava na VIDIO qai veivosakitaka na taro tarava.

VIDIO: Tawaveitovaki na Lotu vaKarisito Dina—Wase 1 (4:28)

Na cava meda dokai ira kina na vakailesilesi vakamatanitu?
Na cava eso na sala eda na talairawarawa kina vei ira?

Ena gauna ni valu, eso na matanitu era kaya nira tawaveitovaki. Ia era tokona na ito ruarua. Na cava na ibalebale ni tawaveitovaki? Wilika Joni 17:16, sarava na VIDIO qai veivosakitaka na taro tarava.

VIDIO: Tawaveitovaki na Lotu vaKarisito Dina—Wase 2 (3:11)

Na cava na ibalebale ni tawaveitovaki?

Vakacava ke ra vakarota na vakailesilesi vakamatanitu meda cakava e dua na ka e veisaqasaqa kei na lawa ni Kalou? Wilika Cakacaka 5:28, 29. Sarava na VIDIO qai veivosakitaka na taro tarava.

VIDIO: Tawaveitovaki na Lotu vaKarisito Dina—Wase 3 (1:18)

Ke veisaqasaqa na lawa ni tamata kei na lawa ni Kalou, na lawa cava meda muria?
O rawa ni vakasamataka e dua na ituvaki eda na sega ni muria kina na ka era vakarota na vakailesilesi vakamatanitu?

4. Me tawaveitovaki nomu rai kei na nomu itovo

Wilika 1 Joni 5:21. Sarava na VIDIO qai veivosakitaka na taro tarava.

VIDIO: Bibi Mera Yaloqaqa na Lotu vaKarisito Dina—Mera Tawaveitovaki Tiko Ga (2:49)

Ena vidio, na cava e sega ni vakaitavi kina ena veika vakapolitiki kei na vakarokorokotaki ni kuila o Ayenge?
O nanuma ni vakatulewa vakayalomatua?

Na ituvaki cava ena rawa ni vakatovolei kina noda tawaveitovaki? Sarava na VIDIO, qai veivosakitaka na taro tarava.

VIDIO: Ka e Vulici ena Vale ni Vakatawa—Tawaveitovaki Tiko ga ena Vuravura Qo (5:16)

Eda na tawaveitovaki tiko ga vakacava ni caka na qito lelevu?
Eda na tawaveitovaki tiko ga vakacava ke ca se vinaka na ka era vakatulewataka na daunipolitiki?
Era na vakaleqa vakacava na noda tawaveitovaki na tabana ni itukutuku kei ira noda ilala?