Vakamurimuria na Daukaulotu Levu

“Dou vakadamurimuri au, me vaka ka’u sa muri Karisito.”​—1 KOR. 11:1.

1. Na cava meda vakadamurimuri Jisu Karisito kina?

A VAKAMURIMURIA na yapositolo o Paula na ivakaraitaki ni Daukaulotu levu, o Jisu Karisito. Uqeti ira tale ga na tacina lotu Vakarisito: “Dou vakadamurimuri au, me vaka ka’u sa muri Karisito.” (1 Kor. 11:1) A vakavulici ratou na nona yapositolo o Jisu me baleta na yalomalumalumu ena nona vuya na yavadratou, qai kaya: “Ni’u sa solia e dua nai vakarau vei kemudou, mo dou kitaka me vaka ka’u sa kitaka oti vei kemudou.” (Joni 13:​12-​15) Nida lotu Vakarisito ena gauna oqo, e kilikili ga meda vakadamurimuri Jisu Karisito ena noda ivosavosa, ka eda cakava, kei na noda itovo.​—1 Pita 2:​21.

2. Dina ni sega beka ni lesi iko na iLawalawa Dauvakatulewa mo daukaulotu, ia na itovo cava mo bucina?

² Ena ulutaga sa oti, eda vulica ni o koya e lesi me daukaulotu e talai yani me dauveivakalotutaki​—e dua e tukuna na itukutuku vinaka vei ira tale e so. Ena vuku ni ka oqo, a taroga kina o Paula e so na taro vakavure vakasama. (Wilika Roma 10:​11-​15.) Dikeva nona taro na yapositolo: “A ra na rogoca vakacava, kevaka e sega e dua me tukuna?” Mani cavuta na vosa ni parofisai i Aisea: “Sa lagilagi sara na yavadra era sa tukuna nai tukutuku vinaka ni veika vinaka!” (Aisea 52:7) E dina ni o sega beka ni lesi mo lai veiqaravi e vanuatani vakadaukaulotu, ia o rawa ni bucina na itovo ena uqeti iko mo dauveivakalotutaki, mo vakatotomuri Jisu kina ni a dau gugumatua na vunautaka na itukutuku vinaka. Ena yabaki sa oti, era le 6,957,852 na dautukutuku ni Matanitu ni Kalou era ‘vakayacora na cakacaka ni dauveivakalotutaki’ ena 236 na vanua.​—2 Tim. 4:​5, VV.

“Keitou sa Biuta na Ka Kece, ka Muri Kemuni”

3, 4. Na cava a laiva tu yani i lomalagi o Jisu, na cava meda cakava meda nona imuri?

³ Me vakayacora vinaka nona itavi e vuravura o Jisu, a “laiva tu mada yani na veika kece e a tu vua, ka mai taura na i vakarau ni bula vakatamata bobula,” a biuta tu yani nona ivakarau ni bula mai lomalagi kei na nona lagilagi. (Fpai. 2:​7, VV) Ena sega ni tautauvata na ka eda cakava meda vakatotomuri Karisito kina ni vakatauvatani kei na ka a mai vakayacora o koya e vuravura. Ia eda na yalodina tiko ga na muri koya kevaka eda sega ni veivutunitaka na ka eda biuta tu yani ena vuravura e lewa tu o Setani.​—1 Joni 5:​19.

⁴ Dua na gauna, e kaya na yapositolo o Pita vei Jisu: “Raica, keitou sa biuta na ka kece, ka muri kemuni.” (Maciu 19:27) Totolo ga nodratou biuta nodratou lawa o Pita, Adriu, Jemesa, kei Joni ni sureti ratou o Jisu me ratou muri koya. Eratou biuta nodratou bisinisi ni qoli, me ratou sa cakacaka vakavunau ga. E volai ena Kosipeli i Luke na ka e tukuna o Pita: “Ni raica, keitou sa biuta na veika kece ga e neitou ka muri kemuni.” (Luke 18:​28, VV) Levu vei keda e sega ni biuta na ‘noda’ ka kece meda muri Jisu kina. Ia, eda a ‘sega ga ni muri lomada’ nida imuri i Karisito da qai qaravi Jiova mai vu ni lomada. (Maciu 16:24) Eda vakalougatataki sara vakalevu nida cakava oqo. (Wilika Maciu 19:29.) Eda na marau nida gumatua ena cakacaka ni dauveivakalotutaki me vakataki Jisu, vakauasivi ke da a bau veivuke toka ena nona tuberi e dua me toro voleka vua na Kalou kei na Luvena lomani.

5. Tukuna e dua na ivakaraitaki e dusia na ka ena rairai vakatulewataka e dua na curuvanua ni sa vulica na ka dina ena iVolatabu.

⁵ O Valmir e turaga ni Brazil, a vakaitikotiko ena colo kei Suriname. E nona cakacaka tudei na keli koula. E daugunu alakaolo qai torosobu nona ivakarau ni bula. Dua na gauna ni tiko ena korolevu, a tekivu vulica na iVolatabu kei ira na iVakadinadina i Jiova. A vuli iVolatabu e veisiga, qai levu na veiveisau e cakava, oti a papitaiso sara. Ni raica ni dredre me bulataka na ivakavuvuli ena iVolatabu ena vuku ni nona cakacaka, a volitaka sara nona bisinisi qai lesu tale e Brazil me lai tuberi ratou nona vuvale ena ka dina. Era kere vakacegu mai na nodra cakacaka e levu na curuvanua nira sa vulica na ka dina ena iVolatabu, ra qai lesu ina nodra vanua mera vakavulici ira na wekadra mera toro voleka vei Jiova. Laurai vei ira na dautukutuku ni Matanitu ni Kalou oqo nira dauveivakalotutaki dina.

6. Cava meda cakava kevaka eda sega ni rawa ni toki ina vanua e gadrevi kina vakalevu na dautukutuku ni Matanitu ni Kalou?

⁶ Levu na iVakadinadina era sa toki ina vanua e gadrevi vakalevu kina na dautukutuku ni Matanitu ni Kalou. So mada ga era lako e vanuatani mera lai vunau kina. De dua, eda na sega ni rawa ni cakava oqori ena vuku ni keda ituvaki, ia meda vakatotomuri Jisu tiko ga ena noda gugumatua ena cakacaka vakavunau.

Vakarautaka o Jiova na Veivakavulici e Veiganiti

7. Na koronivuli cava e vakarautaki mera vakavulici kina o ira na saga tiko mera vakavinakataka na nodra kacivaka na itukutuku ni Matanitu ni Kalou?

⁷ A vakavulici Jisu o Tamana. Meda vakayagataka vinaka sara na ituvatuva ni vuli e sa vakarautaka tale ga o Jiova ena gauna oqo. E kaya o Jisu: “Sa vola na parofita eso, Ena vakavulici ira kecega na Kalou.” (Joni 6:​45; Aisea 54:13) Nikua, era vakarautaki e so na koronivuli mera vakavulici keda meda dautukutuku ni Matanitu ni Kalou. Sega ni vakabekataki nida sa vakila tiko na yaga ni Koronivuli ni Vuli Vunau ena ivavakoso eda lewena. Era marautaka na painia mera vuli ena Koronivuli ni Cakacaka Vakapainia. Levu era painia tu vakadede era marau nira curu vakarua ena koronivuli oqo. Era vuli ena Koronivuli ni Cakacaka Vakaitalatala ni Matanitu na qase ni ivavakoso kei ira na dauveiqaravi, mera vakavinakataka kina nodra veivakavulici kei na nodra qaravi ira na tacidra vakayalo. Levu na qase kei na dauveiqaravi dawai era sa vuli ena Koronivuli ni Vuli Veiqaravi Vakaitalatala, era vakavulici kina mera tuberi ira e so tale ena cakacaka vakavunau. Levu vei ira na mataveitacini era veiqaravi vakadaukaulotu e vanuatani era sa vuli oti ena Watchtower Bible School of Gilead.

8. Laurai vakacava ena ka era cakava e so na mataveitacini ni bibi vei ira na veivakavulici e vakarautaka o Jiova?

⁸ Levu na iVakadinadina i Jiova era cakava e so na veisau mera lai vuli kina ena koronivuli vaka oqo. Me lai vuli ena Koronivuli ni Vuli Veiqaravi Vakaitalatala e caka mai Kenada, a kere vakacegu mai na nona cakacaka o Yugu baleta ni sega ni vakadonuya nona boso me gade mada vakalekaleka. “Au sega ni veivutunitaka,” e kaya o Yugu. “Kena irairai, ni kevaka ratou vakadonuya noqu kerekere meu gade vakalekaleka, ratou na vinakata meu na tiko dei ga ena kabani. Ia, ena gauna oqo, au sa tu vakarau meu colata na ilesilesi ena solia mai o Jiova.” E levu era sa vakuai ira mai na ka era dau vakabibitaka tu e liu mera vakayagataka vinaka na veivakavulici e vakarautaka na Kalou.​—Luke 5:​28.

9. Tukuna e dua na ivakaraitaki e dusia na laulau ni veivakavulici vakaivolatabu kei na gugumatua.

⁹ E laulau sara na veivakavulici vakaivolatabu kei na gugumatua. (2 Tim. 3:​16, 17) Dikeva na ka a yaco vei Saulo mai Guatemala. Ni sucu mai a tauvi koya na matenivakasama, qai kaya e dua nona qasenivuli vei tinana me kua ni vakasaurarataki Saulo me vulica na wilivola, ni na vuturi kina. Mani sega tu ga ni kila na wilivola o Saulo ni sa vuli oti. Ia, e dua na iVakadinadina a vakavulici Saulo me wilivola ni vakayagataka na ivola Apply Yourself to Reading and Writing. Toso sara nona vuli o Saulo, yaco na gauna me vakaitavi ena Koronivuli ni Vuli Vunau. A qai sotava na qasenivuli nei Saulo o tinana ena cakacaka vakavunau e veivale. Ni rogoca ni sa kila na wilivola o Saulo, e kerea o qasenivuli me rau gole vata mai ena macawa tarava. Ni rau sa sota, e tarogi Saulo sara o qasenivuli: “Na cava o na wilika vei au?” Tekivu wilika o Saulo e dua na parakaravu mai na ivola Na Cava Sara Mada e Kaya na iVolatabu? “Au sega sara ga ni vakabauta ni o sa vakavulici au tiko,” e kaya na qasenivuli. A tekivu tagi ena levu ni nona marau qai mokoti Saulo.

Na Veivakavulici e Veivakauqeti

10. Na ivola totoka cava e sa vakarautaki me vakavulici kina na ka dina ena iVolatabu?

¹⁰ E yavutaka o Jisu na nona veivakavulici ena ka e vakavulici koya kina o Jiova kei na veidusimaki ena Vosa volai ni Kalou. (Luke 4:​16-​21; Joni 8:​28) Eda vakatotomuri Jisu nida muria nona ivakasala kei na ivakavuvuli e yavutaki ena iVolatabu. E vu ni noda duavata ni sega ni dau veisaqasaqa na ka eda kaya kei na ivakarau ni noda vakasama. (1 Kor. 1:​10) Eda marau ni vakarautaka na “dauveiqaravi yalo dina ka vuku” na ivola vakaivolatabu me vaqaqacotaka tiko ga na noda duavata ena ka eda vakavulica, meda cakava vinaka tale ga kina na noda itavi ni veivakalotutaki! (Maciu 24:​45, VV; 28:​19, 20) Dua na ivola e vakarautaka mai oya na Kaya na iVolatabu, e sa tabaki ena 179 na vosa.

11. E vakamalumutaka vakacava na veitusaqati e dua na tacida mai Iciopea ni vakayagataka na ivola Kaya na iVolatabu?

¹¹ E veisautaka sara mada ga na lomadra na dauveitusaqati na vulici ni iVolatabu ni vakayagataki na ivola Kaya na iVolatabu. O Lula, e dua na painia mai Iciopea, a vakavulica tiko e dua nona gonevuli ena iVolatabu ni vakasosani rau yani na weka i gonevuli, e kaya ni sega ni gadrevi na vuli vaka oya. A vosa vakamalua o Lula, qai cavuta na ivakatautauvata me baleta na ilavo lasutaki e volai ena wase 15 ni ivola na Kaya na iVolatabu. Mani malumu sara na marama oya qai laiva me toso tale na vuli. Ena vuli tarava, sa dabe tale ga o koya qai kerea me vulica na iVolatabu, kaya sara ga ni na bolea me sauma nona vuli! Toso na gauna sa vuli vakatolu ena dua na macawa, sa toso vinaka tale tiko ga vakayalo.

12. Tukuna e dua na ivakaraitaki e dusia ni na laulau na nodra vakavulica na ka dina ena iVolatabu na itabagone.

¹² E laulau tale ga nodra vakayagataka na itabagone na ivola Kaya na iVolatabu. Ni wilika tiko na ivola oqo o Keanu, e itabagone yabaki 11 mai Hawaii, e tarogi koya sara e dua rau kalasi vata: “Na cava o sega ni dau solevutaka kina na olodei?” E wilika sara ga o Keanu na isaunitaro ena ulutaga “Meda Soqova Beka na Veiolodei?” e tiko ena ikuri. Sa qai cega na tabana e tabaki tiko kina na lewenivola qai taroga se ulutaga cava e taleitaka vakalevu. Tekivu sara ga e kea na vuli iVolatabu. Na yabaki vakacakacaka sa oti, era veivakavulici na iVakadinadina i Jiova ena iVolatabu vei ira na le 6,561,426, levu era vakayagataka na ivola Kaya na iVolatabu. O sa vakayagataka tiko beka na ivola oqo mo veivakavulici kina ena iVolatabu?

13. E kaukaua vakacava na veivakauqeti ni vuli iVolatabu?

¹³ Na vulici ni ivola Kaya na iVolatabu ena uqeti ira vakalevu na saga tiko mera cakava na loma ni Kalou. Dua na veiwatini rau painia lavotaki tiko e Norway, rau vakavulica ena iVolatabu e dua na vuvale mai Zambia. E tolu na luvedrau yalewa na veiwatini rau vuli iVolatabu tiko, rau sega ni via vakaluveni tale. Ni sa bukete o yalewa, rau vakatulewataka me vakalutu. Ni bera e vica na siga me rau lai raici vuniwai, rau vulica na ulutaga “Rai ni Kalou me Baleta na Bula.” E tarai rau vakabibi na iyaloyalo ni gone e se tiko ena kete i tinana, rau mani vakatulewataka me sa kua ni vakalutu. Rau toso vinaka vakayalo qai vakayacani na luvedrau tagane sucuvou vua na tacida a vakavulici rau tiko.

14. Vakamacalataka na yaga ni noda bulataka na ka eda vakatavulica.

¹⁴ Dua na tiki bibi ni nona veivakavulici o Jisu oya ni bulataka na ka a vakatavulica. Levu era qoroya na nodra itovo vinaka na iVakadinadina i Jiova, nira dau vakatotomuri Jisu. Dua na turaga daunibisinisi mai Niusiladi a butakoci na iyaya e tu ena loma ni nona motoka, okati kina nona kato. Lai tukuna sara vei ira na ovisa, qai tukuni vua: “Kevaka ga e kunea e dua na iVakadinadina i Jiova nomu iyaya ena suka mai vei iko.” A kunea na kato e dua na iVakadinadina yalewa. Ni tukuni vua na daunibisinisi ni sa kune, a gole sara ina nona vale na iVakadinadina. E lutu sara ga nona icegu ni kunea ni tiko e loma ni kato e dua na tikinipepa bibi. A kaya na tacida vua: “E veiganiti ga meu vakalesuya na iyaya, vakauasivi niu dua na iVakadinadina i Jiova.” Kurabui sara ga na turaga oya, qai nanuma na vosa a cavuta vua na ovisa ena matakalailai oya. Matata e ke, nira dau bulataka na lotu Vakarisito dina na ivakavuvuli vakaivolatabu, era vakamurimuri Jisu tale ga.​—Iper. 13:18.

Vakamurimuria na iVakarau i Jisu

15, 16. Eda na uqeti ira vakacava e so mera rogoca na itukutuku eda vunautaka?

¹⁵ Era taleitaka na vakarorogo na itukutuku i Jisu baleta na nona ivakarau. Me kena ivakaraitaki, a rawarawa nodra torovi koya na yalomalumalumu baleta ni dau loloma qai yalomalumalumu. E kauaitaki ira vakayalololoma na gole mai vua qai vakacegui ira ena vosa e tauca, a vakabula tale ga e levu e vakaleqai tu na ituvaki ni yagodra. (Wilika Marika 2:​1-5.) E sega noda kaukaua meda cakamana, ia e rawa nida vakaraitaka na loloma, yalomalumalumu, kei na veikauaitaki vakayalololoma​—na itovo ena uqeti ira e so mera mai vulica na ka dina.

¹⁶ Na veikauaitaki vakayalololoma e uqeti Tariua e dua na painia lavotaki. A lai vosa ena vale ni dua e sa kena turaga, na yacana o Beere, e tiko ena dua na yanuyanu ribayawa mai Kiribati. E tukuna na turaga oqo ni sega ni via vakarorogo, ia e raica o Tariua ni paralasi tu e dua na wase ni yagona qai lomani koya. “O kila na vosa ni yalayala ni Kalou me baleti ira na tauvimate kei ira na qase?” a taroga. Sa qai wilika e dua na tikinivolatabu mai na parofisai i Aisea. (Wilika Aisea 35:​5, 6.) E kauai na turaga oqo qai kaya: “Sa vakayabaki noqu wili iVolatabu qai dau sikovi au e dua na daukaulotu mai na lotu au lewena, ia au se sega mada ni bau wilika oqori ena iVolatabu.” Vuli iVolatabu sara o Beere, qai toso vinaka vakayalo. Dina ni a paralasi tu, ia sa papitaiso ena gauna oqo, e liutaka tiko e dua na iwasewase ribayawa qai vunautaka na itukutuku vinaka ena nona taubaletaka na yanuyanu e tiko kina.

Vakamurimuri Karisito Tiko Ga

17, 18. (a) E rawa vakacava ni vuavuaivinaka nomu dauveivakalotutaki? (b) Na cava era na sotava o ira na gumatua ena nodra cakacaka vakaitalatala?

¹⁷ Eda sa raica mai na ka marautaki e sotavi ena cakacaka vakavunau, ni na vuavuaivinaka noda veivakalotutaki kevaka eda bucina qai vakaraitaka na itovo i Jisu. E veiganiti gona meda vakamurimuri Karisito meda dauveivakalotutaki gugumatua!

¹⁸ Nira sa tisaipeli e so ena imatai ni senitiuri, a taroga o Pita: “A cava ena qai neitou?” E sauma o Jisu: “Ko koya yadua sa biuta na vale, se na veitacini, se na ganena, se na tamana, se na tinana se na luvena, se na vanua, e na vuku ni yacaqu, ena yadrau ena rawata; ena taukena talega na bula tawa mudu.” (Maciu 19:​27-​29) Eda na sotava oqo kevaka eda vakamurimuri Jisu Karisito, na Daukaulotu levu.

O na Sauma Vakacava?

• E vakavulici keda vakacava o Jiova meda dauveivakalotutaki?

• Na cava e laulau kina na ivola Kaya na iVolatabu ena noda cakacaka vakaitalatala?

• Eda na vakamurimuria vakacava na ivakarau i Jisu vei ira na rogoci koya?

[iYaloyalo ena tabana e 17]

Eratou sega ni tu suka o Pita, Adriu, Jemesa, kei Joni ni sureti ratou o Jisu me ratou muri koya

[iYaloyalo ena tabana e 19]

Laurai na duavata ena noda veivakavulici nida vakayagataka na ivola me vaka na “Kaya na iVolatabu”