Na Cava na Kena iTuvaki e Dua sa Mate?

“E tawamate kece na tamata, oka kina o ira na daucaka ca . . . Ke ra totogitaki mera cudruvi tawamudu ena buka e sega ni boko rawa, ra qai sega ni mate, sa na sega ga ni [oti] nodra rarawa.”—Clement mai Alexandria, na dauvolaivola ena ikarua kei na ikatolu ni senitiuri S.K.

ME VAKATAKI Clement, o ira na tokona na ivakavuvuli ni vanua ni veivakararawataki o eli era vakabauta ni tawamate na tamata. E tokona beka na ivakavuvuli qori na iVolatabu? Vakasamataka mada na isau vakaivolatabu ni vica na taro qo.

A tawamate beka na imatai ni tamata o Atama? Ni buli oti ga o Atama, a vakaroti koya na Kalou: “E tara mo kana mai na kau kecega sa tu e na were: ia mai na kau sa kilai kina na ka vinaka kei na ka ca, mo kakua ga ni kana kina: ni ko na mate vakaidina e na siga ko sa kana kina.” (Vakatekivu 2:16, 17) A mate dina o Atama.

Na cava a yaco ni valavala ca oti o Atama? A sega ni totogitaki rau na Kalou me rau vakararawataki tawamudu e eli. Ia a tukuna: “E na buno ni matamu ko na kania kina na kemu kakana, ka yacova na siga ko na suka tale kina ki na qele; ni ko a buli maikina eliu: ni ko sa kuvu ni qele ga, ia ko na suka tale mo kuvu ni qele.” (Vakatekivu 3:19) Sega ni vakaibalebaletaki ena ka e tukuna qori na Kalou ni dua na tiki Atama a bula tale tiko ena gauna a mate kina.

E tiko beka e dua na tamata e tawamate rawa? Sega. E kaya na iVolatabu ena Dauvunau 3:20: “Era sa lako kece ki na dua bauga na tikina; era sa kuvu-ni-soso kecega, ka ra sa suka tale kecega me kuvu-ni-soso.” A vola na yapositolo o Paula: “Sa curu ki vuravura nai valavala ca e na vuku ni tamata e lewe dua, kei na mate e na vuku ni valavala ca; a sa yaco vakakina na mate ki na tamata kecega, ni sa cala na tamata kecega.” (Roma 5:12) Eda ivalavala ca kece, koya gona eda na mate kece tale ga.

Era kila se vakila beka na mate e dua na ka? E tukuna na Vosa ni Kalou: “Ni ra sa kila ko ira sa bula ni ra na mate: ia ko ira na mate era sa sega ni kila e dua na ka.” (Dauvunau 9:5) Me baleta na ituvaki ni mate, e kaya na iVolatabu: “A sa suka ko koya ki na kena qele; e na siga dina ko ya sa oti na ka e vakanananu kina.” (Same 146:4) Era na vakila vakacava na mate na veivakararawataki e eli ke ra “sega ni kila e dua na ka” qai ‘oti na ka era vakanananu kina’?

E vakatauvatana o Jisu na mate kei na moce, ni sega kina na vakasama, rai se rogo..a (Joni 11:11-14) E so era na vakacala qori, era kaya ni vakavuvulitaka dina o Jisu ni vanua katakata o eli ra qai kolotaki kina na tamata ca. Meda raica mada se cava a tukuna o Jisu me baleti eli.

[iVakamacala e ra]