Mo Kila na iVolatabu
2. Me Kua ni Qiqo Nomu Rai
Sa bau tukuna vei iko e dua na nomu itokani na itukutuku rogo ca me baleta e dua drau se sega ni bau sota? Ni drau sota, o sega beka ni via kauaitaka nona itovo vinaka kei na nona taledi, ni o sa vakabauta ga na ka e tukuna o nomu itokani me baleti koya? E via va tale ga qori na iVolatabu.
E VAKASALATAKI keda na yapositolo o Paula ena ka e rawa ni yaco ke qiqo noda rai nida wili iVolatabu. Me baleti ira eso na Jiu ena nona gauna e vola o Paula: “Ni’u sa tukuni ira ni ra sa lomakatakata vua na Kalou, ia era sa sega ni yalomatua.”—Roma 10:2.
Era a sega ni ciqoma eso na Jiu ena imatai ni senitiuri na ka dina ena iVolatabu vakaIperiu e tukuni kina vakamatata se o cei na Mesaia. Na veika kece e tukuni ena iVolatabu me baleta na Mesaia e ganiti Jisu vinaka na kai Nasareci, e vakayacora tale ga na parofisai kece me baleta na ka ena mai cakava na Mesaia. Ia ena nodra lomaqa e sega kina nira kila vakamatata na Vosa ni Kalou na kainona.
Na cava eda vulica kina? E bibi dina me kua ni qiqo noda rai nida wili iVolatabu. Na veivakaduiduitaki se nanuma sa tu rawa vei keda ena rawa ni vakalatia na kena kilai na ka dina ena iVolatabu.
Me kena ivakaraitaki, e dua na parofesa ni veika vakalotu mai North Carolina, e Mereke, a vakamacalataka ni iVolatabu “e vola ga na tamata, e tiko ga kina na rai vakatamata, e duidui na nodra rai o ira na vola qai sega ni dua na idusidusi nuitaki me baleta na ivakarau ni noda bula ena veisiga.” Ke dua e raica na iVolatabu ni ivola “e vola ga na tamata,” ena cata na ivakavuvuli se idusidusi e sega ni taleitaka.
Na kena veibasai ga ni iVolatabu e uqeti keda meda vulica vagumatua. O ira mai Peria ena gauna i Paula e tukuna vei keda na iVolatabu: “Ni ra sa vakarogoca na vosa e na loma e vinakata sara, a ra sa dauvakasaqaqara e nai Vola Tabu e na veisiga, se sa vakakina na ka oqori, se segai.” (Cakacaka 17:11) Me vakataki ira qori, mo kauta laivi na rai qiqo se na vakalelewa me baleta na iVolatabu. Me kua ni qiqo na nomu rai ni o wilika na Vosa ni Kalou, saga mo kila vinaka sara na itukutuku marautaki e vinakata o koya e vakavuna na kena volai mo kila.