Taro na Dauwiliwili

A tukuna vei ira na vakarorogo o Jisu: “Moni uasivi, ni uasivi na Tamamuni vakalomalagi.” Eda na “uasivi” vakacava nikua?—Maciu 5:48.

Me kilai na isaunitaro qo, e bibi meda raica na vakayagataki ni vosa “uasivi” se “vinaka vakaoti” ena iVolatabu. E sega ni taucoko na ka kece e tukuna na iVolatabu ni “uasivi.” O Jiova ga e vinaka vakaoti. O keda kei na so tale na ka e vakaiyalayala ga na ka eda uasivi kina. Na vosa vakaIperiu kei na vaKirisi e vakadewataki ena iVolatabu me “uasivi” e kena ibalebale na “taucoko,” “matua,” se “tawacala,” qori ena vakatau ena nona ivakatagedegede o koya e tu vua na lewa. Ia e sega ni dau vakayagataki vakalevu qori ena vosa ni veisiga.

Erau buli o Atama kei Ivi me uasivi na nodrau itovo, na kedrau ituvaki vakayalo kei na yagodrau. Na nodrau uasivi e salasalavata kei na nona ivakatagedegede na Dauveibuli. Ni rau talaidredre, erau sa sega ni yacova na ivakatagedegede qo, rau sega ni vakayalia ga o rau na bula uasivi, ia o keda tale ga na nodrau kawa. Ena vuku gona ni valavala ca i Atama, a dewa kina vei keda kece na ivalavala ca kei na mate.—Roma 5:12.

Ena nona iVunau ena Ulunivanua, a vakaraitaka kina o Jisu ni o ira mada ga na ivalavala ca e rawa nira uasivi, ia e vakaiyalayala ga. Ena ivunau qori a vakaraitaka kina na ivakatagedegede ni loloma e uasivi se taucoko. Qo na loloma e tautauvata ga kei na loloma a vakaraitaka vei keda na Kalou. A tukuna o Jisu: “Lomani ira tiko ga na kemuni meca, masulaki ira tale ga era vakacacani kemuni; me kilai kina ni oni luvei Tamamuni e tiko mai lomalagi, ni dau vakacabea na matanisiga vei ira na tamata ca kei na tamata vinaka, e vakatauca tale ga na uca vei ira na yalododonu kei ira na sega ni yalododonu.” (Maciu 5:44, 45) Ni va qori na levu ni nodra loloma na tisaipeli i Jisu, era sa vakatotomuria sara tiko ga na ivakaraitaki uasivi ni Kalou.

Era saga tiko na iVakadinadina i Jiova e vuravura raraba nikua, mera muria tiko ga na ivakatagedegede uasivi ni veilomani. Era vinakata mera veivuke ena nodra vakavulici ena dina me baleta na Kalou o ira e duidui na nodra isususu, matatamata era cavutu mai kina kei na lotu era lewena. Era sa vuli iVolatabu tiko kei ira na iVakadinadina e sivia na 7,000,000 na tataleitaki ena 236 na vanua.

A taroga o Jisu: “Ke oni lomani ira ga era lomani kemuni, na cava na betena? Era sega beka ni cakava tale ga qo na daukumuni ivakacavacava? Ke oni dau kidavaki ira ga na wekamuni, oni uasivi vakacava? Era sega beka ni cakava tale ga qo na lewe ni veimatanitu?” (Maciu 5:46, 47) O ira na lotu vaKarisito dina era sega ni vakaduiduitaki ira e duidui na nodra ivakatagedegede ni vuli se matatamata era cavutu mai kina; era sega ni dau lomani ira ga era rawa ni dolea lesu na nodra loloma. Ia era vukei ira na dravudravua, na tauvimate, na gone kei na qase. Ena sala qo era sa vakatotomuria sara tiko ga kina na lotu vaKarisito na loloma i Jiova, era bau uasivi toka kina qori.

Eda na rawata tale na bula uasivi a vakayalia o Atama? Io, ni vakabauti na isoro ni veivoli i Jisu, era na yacova na bula uasivi o ira na talairawarawa ni sa na ‘vaqeavutaka na cakacaka ni Tevoro na Luve ni Kalou’ ena Dua na Udolu na Yabaki ni Veiliutaki i Karisito.—1 Joni 3:8.