‘Sa Salavata kei Koya na ka Kece a Cakava’

ENA mataka ni Vukelulu, 9 June, 2010, a mai vakacavara kina na nona veiqaravi e vuravura o Theodore Jaracz, e dua na lewe ni iLawalawa Dauvakatulewa ni iVakadinadina i Jiova. A mai takali ni sa yabaki 84. E se bula tiko na watina o Melita, qai 53 na yabaki na nodrau vakawati. E se bula tale tiko ga e dua na ganena kei ratou na luvei ganena, e dua na tagane, rua na yalewa.

O Brother Jaracz a sucu ena 28 Seviteba, 1925, e Pike County, Kentucky, Merika. A yalataki koya vei Jiova ena 10 Okosita, 1941 ni se yabaki 15, qai tekivu painia tudei ni yabaki 17 ena rua na yabaki tarava. Sa itekitekivu sara ga qori ni nona cakacaka vakatabakidua voli vakadede, e voleka ni 67 na yabaki.

Ena gauna a yabaki 20 kina ena 1946, a lai vuli o Brother Jaracz ena ikavitu ni kalasi ni Watchtower Bible School of Gilead. Ni oti na tuvaitutu, a lesi me ivakatawa dauveilakoyaki ena yasayasa o Cleveland, Ohio, Merika. A qai lesi ena 1951 me lai ivakatawa ni valenitabana e Ositerelia. Ena kena ivolatukutuku ena 1983 Yearbook of Jehovah’s Witnesses, e tukuni kina “ni uqeti ira vakalevu na mataveitacini ena vanua kece oya, na nona dau guta me caka vakamaqosa na ka, kei na nona dau liutaka vinaka na cakacaka vakavunau.”

Ni lesu i Merika o Brother Jaracz, rau lai vakamau kei Melita Lasko ena 10 Tiseba, 1956. Ni tekivu ga na nodrau bula vakawati, sa tomani watina voli o Melita ena nona cakacaka vakaivakatawa dauveilakoyaki, rau qai gumatua ni veiqaravi ena levu na tabacakacaka kei na tikina e Merika. Ena icavacava ni 1974, a mai dua kina na lewe ni iLawalawa Dauvakatulewa ni iVakadinadina i Jiova o Brother Jaracz.

Ena guiguilecavi dredre na nona dau gugumatua kei na nona yalodina ni qaravi Jiova o Brother Jaracz, kei na nona dau vakaliuca mai vu ni lomana na itavi vaKarisito. E dau lomani watina e kauaitaki koya tale ga, e matua vakayalo ni sega ni dau kauaitaka ga na ka e baleti koya, ia e dau vakaliuca na ka era kauaitaka tale na so. (1 Kor. 13:4, 5) E laurai na nona veikauaitaki dina ena nona sega ni vinakata na veivakaduiduitaki, ia meda lomani kece vakatautauvata. Na nona dau gugumatua ena cakacaka vakavunau e vakaraitaka na levu ni nona lomani ira ena yalava kei na nona kauaitaki ira.

E rarawataki dina na nona takali e dua e dau gugumatua, e taleitaki vakalevu tale ga ena vuvale e Peceli kei na mataveitacini e vuravura raraba, ia eda marau ni a qaravi Jiova voli mai ena yalodina o Brother Jaracz me sagavulu vakacaca na yabaki. Eda nuidei ‘ni a yalodina me yacova na mate, sa soli tale ga vua na isala ni bula.’ (Vkta. 2:10) Eda vakabauta dei tale ga ‘ni sa salavata kei koya na ka kece a cakava.’—Vkta. 14:13.