Veivuke ni Dausiga​—Sa Voleka!

O NA rairai taroga, ‘Na dausiga vakacava?’ Na dausiga vakayalo! A tukuna tu mai vakailiu e dua na parofita makawa ni Iperiu na dausiga oqo: “Raica, sa kaya na Turaga ko Jiova, ena yaco na gauna, ka’u na vakayacora kina na dausiga ki na vanua, ena sega ni dausiga ni viakana, se na viagunu wai, ia ni ra mate ga e na via rogoca na vosa i Jiova.” (Emosi 8:​11) Me bau vakamamadataka na dausiga vakayalo oqo, era lesi kina na lewe 48 na gonevuli ni ika112 ni kalasi ni Watchtower Bible School of Gilead, e Patterson, mai Niu Yoka, ina 19 taucoko na veimatanitu e vuravura.

E sega ni ivakatawa ni nodra noke ina nodra ilesilesi na lewenimanumanu kei na sila, ia na kilaka, na maqosa kei na veika era vulica ena lima taucoko na vula ni nodra vuli. Era gumatua sara ena nodra vulica na iVolatabu ena loma ni gauna oya, qai caka na vuli ena sala me vakaukauataka na nodra vakabauta ena veivanua yawa era na lai veiqaravi kina vakadaukaulotu. Ena 9 Maji, 2002, era matalau na lewe 5,554 nira tiko ena soqo ni tuvaitutu.

A bulabula sara na nona dolava na soqo o Stephen Lett, e dua na lewe ni iLawalawa Dauvakatulewa ni iVakadinadina i Jiova. Taumada, a kidavaki ira ena marau na lewe vica vata era vulagi tiko mai na veiyasa i vuravura. Sa qai vakayagataka na vosa i Jisu, “Oi kemudou na rarama kei vuravura,” ina nodra cakacaka na vakarau kaulotu oqo. (Maciu 5:​14) E vakamacalataka: ‘Ena nomuni ilesilesi oni na vakacila na “rarama” ni veitaba ni cakacaka veivakurabuitaki i Jiova me rawa nira kila kina na tamata lomadina na nona totoka kei na nona inaki.’ E uqeti ira na kaulotu o Brother Lett mera na vakayagataka na rarama ni Vosa ni Kalou me vakavotuya na ivakavuvuli lasu e butobuto, ra qai dusimaki ira na qara na ka dina.

Era na Daukaulotu Vinaka ke Donu Nodra Rai

Ni sa doladola oti o jeameni, sa vunau sara o Baltasar Perla, e dua na lewe ni Komiti ni Tabana mai Mereke. A nona na imatai ni itavi, qai veitaravi mai e vica tale na vunau era yavutaki vakatabakidua me vukei ira na gonevuli oqo mera na yaco mera daukaulotu vinaka. E yavutaka na nona vunau ena usutu “Mo Kaukauwa ka Yalodoudou, ka Kitaka [se, “Mo Yavala,” NW].” (1 Veigauna 28:20) O Tui Solomoni e Isireli makawa a vakacolati ena dua na itavi dredre, oya me cakava e dua na ka e sega ni se bau cakava vakadua​—me tara na valenisoro mai Jerusalemi. Ia a yavala o Solomoni, mani vakacavara vinaka na tara ni valenisoro ena veivuke i Jiova. E ka ni vuli oya vei ira na gonevuli, a kaya o Brother Perla: ‘Oni sa vakacolati ena dua na itavi vou, oya mo ni daukaulotu, ena vinakati gona mo ni kaukaua ka yalodoudou.’ Era lomavakacegu na gonevuli ni vakadeitaki tale vei ira ni na sega vakadua ni biuti ira se vakanadakui ira o Jiova ke ra voleka tiko ga vua. Ni tini na vosa i Brother Perla, e tarai ira na vakarorogo na nona vakasavuya na ka sara ga a sotava na nona vuvale: ‘E levu na ka yaga oni rawa ni cakava ena nomuni na cakacaka vakaulotu. Keitou tauca na kena yaga vakavuvale, nira a wasea taumada na ka dina vei keitou na daukaulotu!’

E dua tale na lewe ni iLawalawa Dauvakatulewa o Samuel Herd, e nona usutu ni vunau, “Vakararavi Vei Jiova, me Rawa ni O na Daukaulotu Vinaka.” Era sa vakarau tu oqo na gonevuli ena ilakolako vakadaukaulotu, ia na nodra na lai toso vinaka ena vakatau ina nodra veiwekani kei Jiova. E vakadreti ira gona vaka oqo o Brother Herd: ‘Sa rabailevu sara na ka oni kila mai na iVolatabu ena nomuni vuli oqo e Kiliati. Oni ciqoma ena marau na kena wasei vei kemuni. Ia me taucoko na kena yaga, sa qai vo mo ni lai wasea na veika kece oni vulica.’ (Cakacaka 20:35) E sega ni vakabekataki ni na levu na gauna veiganiti mera na lai vakayacora kina oqo na daukaulotu, mera “sovaraki” ira ena vukudra na tani.​—Filipai 2:​17.

Na vosa ni veivakadreti cava beka era na tauca na qasenivuli vei ira na gonevuli? O Mark Noumair e taura mai na Ruci 3:​18 na nona usutu, “Mo Wawa, Mo Kila se na Vakaevei na iOtioti ni Ka Oqo.” A taurivaka na ivakaraitaki i Neomai kei Ruci ena nona uqeti ira na gonevuli mera nuidei ena ituvatuva sa kotora tu na isoqosoqo laurai ni Kalou e vuravura, ra doka tale ga na veiliutaki e lesi vakalou. E tara na lomadra na gonevuli ni tukuna o Brother Noumair: ‘De so beka na gauna o na sega ni kila na vakasama e tiko ena daku ni dua na vakatulewa e vauci iko, se o sega ni duavata kei na sala e caka kina e dua na ka. Na cava o na cakava? O na yalolekaleka beka mo sa na vakau yalomu ga, se o na “wawa,” mo nuitaka na veidusimaki ni Kalou, ni o kila ena qai yaco ga mai na gauna ena vakayacora kina o koya me na tini vinaka na ka kece?’ (Roma 8:​28) E sega ni vakabekataki ni ivakasala oqo ena lai yaga sara vei ira na daukaulotu ena vanua yawa era dui lesi kina, oya ‘mera vakabibitaka ga na nodra tosoya i liu na veika e vauca na Matanitu ni Kalou, ra kauai ena ka e cakava tiko na isoqosoqo i Jiova, kua nira kauaitaka vakasivia na nodra malumalumu o ira era na lai veimaliwai.’

O Wallace Liverance, a dua tale ga na daukaulotu ia sa dua vei ira na qasenivuli e Kiliati ena gauna oqo, a nona na iotioti ni vunau ena imatai ni iwasewase ni soqo. A nona usutu, “Toka Dei, Kua ni Biuta na Cakacaka ni Kalou.” A vakamacalataka ni nona raica na parofita o Taniela na vakamalumalumutaki nei Papiloni qai vakatauvatana kei na ka a sa kaya vakailiu tu o Jeremaia, e kila kina ni sa roro mai na gauna mera sereki na Isireli mai na veivakabobulataki. (Jeremaia 25:11; Taniela 9:2) A yadrava o Taniela na ituvatuva ni gauna i Jiova, oya na ka e vukei koya me toka dei ena nona raica na yaco ni inaki ni Kalou. Na kena veibasai o ira na Isireli ena gauna i Akeai na parofita, e laurai ena ka era kaya: “Sa sega ni yaco na gauna.” (Akeai 1:2) Era raica vakamamada na gauna era bula tu kina oya, ra sa kauai ga vakalevu ena nodra dui cakacaka kei na nodra tikovinaka, era sa lai lecava kina na vu dina ni nodra sereki mai Papiloni, oya mera lai tara tale na valenisoro. E tinia vaka oqo o Brother Liverance: “O koya gona, mo ni vakasamataka tiko ga ena veigauna kece na inaki i Jiova mo ni rawa ni dei kina.”

Tarava oya o Lawrence Bowen, e dua tale ga na qasenivuli e Kiliati, a liutaka na kena veivosakitaki na ulutaga e kena usutu, “Vakalougatataki Ira o Jiova na Vakayagataka na Vosa Bula.” (Iperiu 4:​12) A okati ena veivosaki oqo na nodra vakasavuya na lewenikalasi na veika era sotava ena cakacaka vakavunau, e vakaraitaka ni vakalougatataki ira o Jiova na vakayagataka na iVolatabu ena nodra vunau kei na veivakavulici. E kaya o Lawrence Bowen ni ivakaraitaki uasivi vei ira kece na italatala ni Kalou o Jisu Karisito: ‘E dina taucoko na nona kaya o Jisu ni sega ni nona na veika a vakavuvulitaka, a kaya ga na Vosa ni Kalou.’ Era siqema rawa na tamata lomadina ni oya na ka dina, ra qai ciqoma sara. (Joni 7:​16, 17) E vaka tale ga kina nikua.

Na Vuli e Kiliati e Veivakarautaki ina Cakacaka Vinaka Kece

Ni oti oya, e rua sa dede sara na nodrau tiko e Peceli, o Richard Abrahamson kei Patrick LaFranca, erau sa qai vakatarogi iratou e lewe ono eratou a vuli tale ga e Kiliati, ia ena gauna oqo e duidui na taba ni cakacaka vakaitalatala vakatabakidua eratou sa vakaitavi tiko kina. Era vakayaloqaqataki na ika112 ni kalasi ena nodra rogoca, ni dina sa oti e vicasagavulu na yabaki na nodratou a vuli mai Kiliati na lewe ono oya, qai duidui na taba ni cakacaka vakatabakidua eratou dui oga tiko kina, ia eratou se vakayagataka tiko ga na veika eratou a vulica mai Kiliati me baleta na nodratou vuli iVolatabu vakataki iratou, vakekeli, vaka kina na bula ni veiyaloni kei ira na tani.

Ia o Theodore Jaracz, e dua tale ga na lewe ni iLawalawa Dauvakatulewa, a nona na ulu ni vunau ena porokaramu. E kena ulutaga, “Na Ka ena Rawati ke Da Vosota Tiko ga na Nona Cati Keda o Setani.” Ena loma ni lima na vula era a tiko na gonevuli ena dua na itikotiko e kune kina na veilomani, qai cicivaki vakalou. Ia me vaka e dau vakadreti vei ira ena nodra vuli, na vuravura eda bula tu kina oqo e cati keda. Eda ravuti tiko na tamata i Jiova ena vuravura kece. (Maciu 24:9) E vakamacalataka o Brother Jaracz e vica na itukutuku vakaivolatabu me dusia ‘ni sagai keda vakatabakidua sara tiko ga na Tevoro. O koya gona, meda vakaukauataka na noda veiwekani kei Jiova meda tusaqata rawa kina na veivakatovolei oqo.’ (Jope 1:8; Taniela 6:4; Joni 15:20; Vakatakila 12:​12, 17) E tinia o Brother Jaracz ena nona kaya nida cati vakaukaua na tamata ni Kalou, ia ‘e kaya na Aisea 54:17 ni iyaragi kece ga e caka me keda ena sega ga ni yaco. Ni na vakadeitaka o Jiova na noda vakabulai ena nona gauna kei na nona sala.’

Nira sa ‘vakarautaki vinaka’ tu oqo na taura na nodra ivola ena ika112 ni kalasi e Kiliati, e sega ni vakabekataki nira na veivuke vakalevu ena kena vakamamadataki na dausiga vakayalo ena vanua era na lai veiqaravi kina. (2 Timoci 3:​16, 17) Eda namaka gona meda na bau rogoca na miramira ni irogo ni nodra na lai wasea na itukutuku ni bula ena veivanua oya.

[Kato ena tabana e 23]

VEIKA ME BALETA NA KALASI

Vanua era cavutu mai kina: 6

Vanua era lesi kina: 19

Levu ni gonevuli: 48

iVakatautauvata ni nodra yabaki: 33.2

iVakatautauvata ni yabaki ena dina: 15.7

iVakatautauvata ni yabaki ena cakacaka vakaitalatala vakatabakidua: 12.2

[iYaloyalo ena tabana e 24]

Nodra Tuvaitutu na Kalasi 112 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.