Toro Voleka Vua na Kalou

“Kerekere Meu Qaravi Kemuni Tale”

Vakacava o a qaravi Jiova tu ena dua na gauna? O vakasamataka tiko mo qaravi koya tale, ia o lomalomaruataka ena ciqomi iko tale se sega? Wilika na ulutaga qo kei na dua tale ena qai muri mai, ni vakarautaki sara ga me baleti iko.

“AU MASUTI Jiova meu qaravi koya tale, me vosota tale ga na noqu vakararawataki koya.” Qori na ka a tukuna e dua na marama sa sega tu ni qarava na Kalou, e biuta tale ga na ivakavuvuli vaKarisito a susugi kina. Vakacava e tarai iko na ka e tukuna? O dau taroga: ‘Na cava nona rai na Kalou me baleti ira era qaravi koya tu ena dua na gauna? E kauaitaki ira qai vinakata mera qaravi koya tale?’ Meda sauma na taro qori, e vinaka meda dikeva na vosa a cavuta o Jeremaia. Ena vakacegui keda sara ga.​—Wilika Jeremaia 31:18-20.

Dikeva mada na ka a yaco tiko ena gauna a cavuta kina o Jeremaia na vosa qori. Ena 740 B.S.K., rauta ni vicasagavulu na yabaki ni bera na gauna i Jeremaia, a vakalaiva o Jiova mera kauti ira vakavesu na tini na yavusa ni matanitu o Isireli na kai Asiria.a E cakava qori na Kalou mera vakavulici kina na nona tamata nira cakava e levu na cala bibi, ra qai vakalecalecava nodra dau veivakasalataki na parofita ni Kalou. (2 Tui 17:5-18) Vakacava e bau veisautaka na nodra ivalavala na veika dredre era sotava nira tu vakavesu ra qai yawa mai na nodra vanua kei na Kalou era qarava? E sa guilecavi ira vakadua o Jiova? Ena ciqomi ira ke ra via qaravi koya tale?

‘Au Veivutuni’

Era kilai yalodra tale na Isireli era tu vakavesu ra qai veivutuni. A raica o Jiova nira veivutuni dina. Raica mada na nona vakamacalataka o Jiova na nodra rai kei na ivakarau ni lomadra na Isireli era tu vakavesu, era okati vakailawalawa mera Ifereimi.

E tukuna o Jiova: “Au a rogoci Ifireimi vakaidina ni sa tagicaki koya.” (Tikina e 18) A rogoca o Jiova na nodra tagicaka na Isireli na ka era sotava ena nodra ivakarau ca. O ira na Isireli era vaka e dua na gonetagane e dau vakauyalona, e kuretakiulu ni vakasamataka na leqa sa sotava tu qai diva lesu na bula a marautaka tu mai vale. (Luke 15:11-17) Na cava era tukuna na Isireli?

‘Oni sa vakanakuitataki au me vaka na pulumokau e sega ni vakavulici.’ (Tikina e 18) Era vakadinata na Isireli ni dodonu ga mera vakanakuitataki nira vaka na luvenibulumakau e sega ni vakavulici. Ena ivakatautauvata qori, e tukuna e dua na ivola ni o ira na Isireli era vaka na luvenibulumakau “e usoraki ena matanimoto ni cata na ivua.”

“Ni saumaki au mai, ka’u na qai saumaki; ni sai kemuni Jiova na noqu Kalou.” (Tikina e 18) Era yalomalumalumu na Isireli ra qai vakamamasu vua na Kalou. Era lako sese tu ena nodra ivakarau ca, ia qo era sa kerea mera vukei me vakadonui ira tale na Kalou. E tukuna e dua na ivakadewa ni iVolatabu: “Oni neimami Kalou​—kerekere me keimami lesu yani.”​—Contemporary English Version.

“Ka’u sa qai veivutuni; . . . au sa madua, io ka’u sa taqaya.” (Tikina e 19) Era rarawataka na Isireli na nodra cala. Era sega ni cakitaka na ka era beitaki kina, era vakadinata nira cala dina. Era maduataka ra qai rarawataka na ka era cakava.​—Luke 15:18, 19, 21.

Era veivutuni na Isireli. Era rarawa, era tusanaka vua na Kalou na nodra cala ra qai vakanadakuya nodra ivakarau ca. Ena veisautaka beka na lomana o Jiova ena nodra veivutuni? Ena ciqomi ira ke ra via qaravi koya tale?

“Ka’u na Lomani Koya Sara”

E dau volekati ira na Isireli o Jiova. E tukuna: “Ni keirau sa veitamani kei Isireli, ia ko Ifireimi, sa noqu ulumatua.” (Jeremaia 31:9) E rawa vakacava vua na tama dauloloma me cata na luvena e veivutuni dina? Raica mada na sala e vakaraitaka kina o Jiova na nona loloma vakatama vei ira na nona tamata.

“Sa noqu gone ni toko ko Ifireimi, se segai? Ni’u a vosataki koya vakaca, ka’u sa daunanumi koya tikoga.” (Tikina e 20) E veivakacegui dina na vosa qori. Me vaka ga e dua na itubutubu e dei ena nona lewa qai dauloloma, a dau ‘vosataki’ ira tale ga na luvena na Kalou qai vakasalataki ira wasoma ena nodra ivakarau ca. Nira talaidredre vua, a vakatara na Kalou mera kau vakavesu—e vaka ga ni vakatalai ira mai vale. A totogitaki ira, ia a sega ni guilecavi ira. Ena sega vakadua ni cakava qori na Kalou ni sega ni dau guilecavi ira na luvena na tama dauloloma. Na cava a cakava o Jiova ni raica nira veivutuni dina na luvena?

“O koya oqo sa yavala kina na ketequ e na vukuna; ka’u na lomani koya sara.” (Tikina e 20) E lomani ira dina na nona tamata o Jiova. E tarai koya sara ga na nodra veivutuni dina, e vinakata mera lesu yani vua. Me vaka ga na tama ena vosa vakatautauvata i Jisu me baleta na gone cidroi, a ‘lomani ira sara ga’ na luvena o Jiova qai tu vakarau me ciqomi ira ke ra via qaravi koya tale.​—Luke 15:20.

“Jiova Meu Qaravi Iko Tale!”

Na ka e volai ena Jeremaia 31:18-20 e vakaraitaka ni dau yalololoma qai vosovoso o Jiova. Ena sega vakadua ni guilecavi ira era qaravi koya tu ena dua na gauna. Vakacava ke ra via lesu vua o ira qori? E ‘tu vakarau me veivosoti’ na Kalou. (Same 86:5) Ke ra torovi Jiova o ira era veivutuni dina, ena sega vakadua ni vakanadakui ira. (Same 51:17) Ena ciqomi ira ga ena marau ke ra via qaravi koya tale.​—Luke 15:22-24.

Na marama e vakamacalataki ena itekivu ni ulutaga qo a vakaliuliu me lesu vei Jiova qai gole ina nodra soqoni na iVakadinadina i Jiova. Ia me veisautaka mada na rai cala e tiko vua. E nanuma lesu: “Au nanuma ni tawayaga meu qaravi Jiova tale.” Ia era vakayaloqaqataki koya na qase ni ivavakoso ra qai vukei koya me kaukaua tale vakayalo. E tukuna ena levu ni nona marau: “Au vakavinavinaka ni ciqomi au o Jiova meu qaravi koya tale!”

Ke o qaravi Jiova tu ena dua na gauna o qai vakasamataka mo qaravi koya tale, o sureti mo gole ena nodra soqoni na iVakadinadina i Jiova ena nomu itikotiko. Nanuma tiko ni dau yalololoma o Jiova qai vosoti ira era veivutuni dina ra qai masuta: “Kerekere meu qaravi kemuni tale.”

Wili iVolatabu e vakatututaki ena Epereli:

◼ Jeremaia 17-31

[iVakamacala e ra]