O se Nanuma Tiko?
O sa wilika na itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:
A vu ni kaukaua i Samisoni na drauniuluna?
A sega ni vu ni kaukaua i Samisoni na drauniuluna. E Nasaraiti o Samisoni, na drauniuluna e vakatayaloyalotaka na nona veiwekani voleka kei na Kalou. A vakaleqai na veiwekani qori ena gauna a kotiva kina o Tilaila na drauniulu i Samisoni.—15/4, tabana e 9.
Na cava e tolu na ka e rawa ni vakavinakataka na lomada?
(1) Kakana. E yaga vakalevu ena utoda na kakana bulabula, e bibi tale ga meda vakatawana vakavinaka na lomada ena kakana bulabula vakayalo. (2) Vakaukaua yago. Ena bulabula na lomada ke da gumatua tiko ga ena cakacaka vakaitalatala. (3) iVakarau ni bula. E rawa ni vakalailaitaka na noda nuiqawaqawa na noda veimaliwai kei ira na tacida vakayalo era dau kauaitaki keda.—15/4, tabana e 16.
Ni tawayalodina e dua na isa ni vakawati, erau rawa ni veinuitaki tale vakacava na veiwatini?
E dodonu me rau (1) veivosaki vakadodonu; (2) cakacaka vata; (3) biuta laivi na itovo makawa; (4) kua ni vakatulewa totolo.—1/5, tabana e 12-15.
Na cava me kua ni vakaibalebaletaka kina o koya e vunau ena veibulu na Same 116:15 vua sa takali?
E tukuna na tikinivolatabu qori: “A ka talei e na mata i Jiova na nodra mate na nona tamata yalosavasava.” Kena ibalebale e sega ni raica vakamamada na Kalou na nodra mate o ira kece era yalodina vua. Ena sega ni vakatara mera vakawabokotaki vakailawalawa na nona tamata.—15/5, tabana e 22.
O cei o ira na dauvolitaki ivola?
Ni bera na 1931, na vosa “dauvolitaki ivola” e dau vakaibalebaletaki vei ira era sa kilai nikua mera painia.—15/5, tabana e 31.
E kilai vakacava ni iVolatabu e sega ni dua wale ga na ivola e vola na tamata?
E volai ena iVolatabu e levu na parofisai era vakayacori dina. E donu na kena itukutuku makawa, e sega ni itukuni ga. E duavata kei na ivakamacala vakasaenisi, qai veisemati na veika e volai ena iVolatabu. E se yaga tiko ga nikua.—1/6, tabana e 4-8.
O cei na “veimatanitu oqori” e tukuni ena Taniela 2:44?
Qori e vakaibalebaletaki vei ira na veimatanitu e vakatayaloyalotaki ena veitiki ni matakau a vakamacalataka o Taniela.—15/6, tabana e 17.
Gauna cava e mai kavitu ni Matanitu Qaqa kina e vuravura o Peritania kei Merika, me vaka e parofisaitaki ena iVolatabu?
A basika na matanitu qaqa qori ena gauna erau cakacaka vata kina o Peritania kei Merika ena dua na inaki donuya na iMatai ni iValu Levu.—15/6, tabana e 19.
Ni veivosoti na Kalou, ena guilecava?
E tukuna o Jiova me baleti ira e vakadonuya: “Na nodrai valavala ca ka’u na sega ni nanuma tale.” (Jere. 31:34) E rawa ni vosota na ivalavala ca na Kalou ena vuku ni isoro ni veivoli. Ni sa veivosoti, ena guilecava tale ga na cala. Kena ibalebale ena sega ni nanuma tale na ivalavala ca qori me veitotogitaki tale kina.—1/7, tabana e 18.
Na cava meda vakabauta kina na cakamana e volai ena iVolatabu?
Na cakamana a dau caka e matanalevu, sega ni caka vakavuni. A rawarawa ga na ka e dau caka, kei na veika e vakayagataki ena gauna ni cakamana. Na inaki ni cakamana me lagiti kina na Kalou, sega ni tamata. E duidui na cakamana ra qai sega ni bau lomatarotarotaka na dauveitusaqati na kena yaco. Qori na vuna meda vakabauta kina na cakamana e volai ena iVolatabu.—1/8, tabana e 7-8.