O BAU KILA?

Era vakarautaka vakacava na yagonimate na Jiu ena imatai ni senitiuri ni bera ni bulu?

E dau totolo ga na nodra buluta na Jiu na nodra mate, ena caka qori ena siga ga e mate kina. E rua na vuna era cakava kina qori. Kena imatai, e dau totolo na vuca ni yagonimate ena draki katakata ena Tokalau e Loma. Kena ikarua, e nanumi ena gauna ya ke sega ni bulu na yagonimate ni oti ga e vica na siga, e vakaraitaka ni sega ni dokai o koya e mate kei na nona vuvale.

E volaitukutukutaki ena Kosipeli kei na ivola na Cakacaka e rauta e va na veibulu a caka ena siga ga eratou mate kina. (Maciu 27:57-60; Cakacaka 5:5-10; 7:60–8:2) Ena vica tale na senitiuri yani e liu, a mate o Rejeli na wati Jekope lomani ena gauna eratou toki tiko kina vakavuvale. A sega tale ni kau na yagona ena nodratou ibulubulu vakavuvale, a buluti koya ga o Jekope ena dua na ibulubulu “e na sala ki . . . Pecileema.”—Vakatekivu 35:19, 20, 27-29.

E laurai ena ivakarau ni veibulu ena gauna vakaivolatabu nira dau vakarautaka vinaka na Jiu na yagonimate ni bera ni lai bulu. Era na savata na yagonimate na lewenivuvale kei ira na itokani, ra lumuta ena isaluaki kei na waiwai boi vinaka, ra qai ologa ena isulu. (Joni 19:39, 40; Cakacaka 9:36-41) Era gole yani na tiko veitikivi kei na so tale mera duavata ena lolosi, ra qai vakacegui ira na lewenivuvale.—Marika 5:38, 39.

A vakayacori vei Jisu na ivakarau ni veibulu e dau caka vei ira na Jiu?

E levu na vuvale Jiu era dau buluta na nodra mate ena qaravatu kei na ibulubulu e keli ena devo, e laurai qori ena levu na vanua e Isireli. Era vakatotomuria na ka era cakava na peteriaki. O Eparama, Sera, Aisake, Jekope kei na so tale, era bulu ena qaravatu e Makipila volekati Epironi.—Vakatekivu 23:19; 25:8, 9; 49:29-31; 50:13.

A bulu o Jisu ena ibulubulu a ta ena babanivatu. (Marika 15:46) E qiqo na icurucuru ni ibulubulu va qori. E vakavata na kena lalaga me biu kina na yagodra na lewenivuvale era mate. Ni sa midra na yagonimate, e dau kumuni na sui qai biu ena dua na kato e buli mai na vatu cule, qori na ka e dau caka ena gauna i Jisu. Ena galala kina na ibulubulu me biu kina eso tale na yagonimate.

Era vakaroti na Jiu ena Lawa a soli vei Mosese mera kua ni somate ena Siga ni Vakacecegu. Ni mate gona o Jisu ena rauta e tolu na aua ni bera na Siga ni Vakacecegu, a sega ni vakarautaki vinaka na yagona ena gauna eratou buluti koya kina o Josefa na kai Arimacea kei na so tale. (Luke 23:50-56) Qori na vuna era nanuma kina eso na itokani i Jisu mera lako ina nona ibulubulu ni oti na Siga ni Vakacecegu, mera lai vakarautaka vakaoti na yagona.—Marika 16:1; Luke 24:1.