ULUTAGA LEVU | E KAUAITAKI IKO NA KALOU?
Ena Vakacegui Iko na Kalou
“Na Kalou e dau vakacegui ira na rarawa e vakacegui keitou.”—2 KORINICA 7:6.
“Na Luve ni Kalou, . . . e lomani au, e solia tale ga nona bula ena vukuqu.”—KALATIA 2:20
VUNA ERA VAKATITIQA KINA ESO: Era nanuma eso ni tawaveinanumi ke ra kerea na Kalou me vukei ira mera vosota na leqa era sotava tiko, dina ga nira vinakata tu mera vakacegui. E kaya e dua na marama o Raquel: “Noqu raica na levu ni ka era sotava na tamata qai raica vata kei na lailai ni ka au sotava, au sega kina ni via kerea na veivuke ni Kalou.”
KA E TUKUNA NA VOSA NI KALOU: Sa vukei keda oti na Kalou qai vakacegui keda ena dua na sala vakasakiti. Eda valavala ca kece, e sega kina ni rawa ni taucoko noda bulataka na ivakatagedegede ni Kalou. Ia e “lomani keda [na Kalou] qai tala mai na Luvena [Jisu Karisito] me isoro” ni noda ivalavala ca. (1 Joni 4:10) Na mate vakaisoro i Jisu e rawa kina ni vosoti na noda ivalavala ca, savasava na noda lewaeloma, nuitaka tale ga na bula tawamudu ena vuravura vou.a Ia e sega wale ga ni vakarautaki na isoro qori me baleti keda na kawatamata kece, e vakaraitaka sara ga na nona kauaitaki keda yadudua na Kalou.
Dikeva mada na ivakaraitaki ni yapositolo o Paula. A uqeti koya na nona mate vakaisoro o Jisu, lai vola kina: “Na noqu bula tiko qo e rawa ga ena noqu vakabauta na Luve ni Kalou, o koya e lomani au, e solia tale ga nona bula ena vukuqu.” (Kalatia 2:20) A mate o Jisu ni bera ni mai lotu vaKarisito o Paula. Ia e raica o koya na isoro qori me iloloma sara ga ni Kalou vua.
Na mate vakaisoro i Jisu e iloloma tale ga ni Kalou vei iko. Na iloloma qori e vakadinadinataka ni vakamareqeti iko o koya. Ena ‘vakacegui iko me tawamudu,’ ena ‘vakarautaka vei iko na inuinui,’ ena vakataudeitaki iko tale ga ena ‘cakacaka vinaka kece ga kei na vosa.’—2 Cesalonaika 2:16, 17.
Ia a mate o Jisu ena rauta na 2 na udolu na yabaki sa oti. E tiko beka e dua na ivakadinadina nikua ni Kalou e vinakata mo nona itokani?
a Me ikuri ni ivakamacala me baleta na isoro i Jisu, raica na wase 5 ni ivola Na Cava Sara Mada e Kaya na iVolatabu? tabaka na iVakadinadina i Jiova.