Sala ena Oti Kina na iValu kei na iTovo Kaukaua

NA KALOU ENA VAKARUSA NA MATANITU VAKATAMATA

Ena vakarusa na Kalou na matanitu vakatamata ena dua na ivalu e vakatoka na iVolatabu me Amaketoni.a (Vakatakila 16:16) Na gauna qori era na vakasoqoni na “tui kei vuravura . . . . ina ivalu ni siga levu ni Kalou Kaukaua Duadua.” (Vakatakila 16:14) Na Amaketoni e ivalu ni Kalou, ena vakaotia kece na ivalu.

Na Matanitu ni Kalou ena sosomitaka na matanitu vakatamata, ena veiliutaki mai lomalagi qai sega vakadua ni vakarusai. (Taniela 2:44) Na Kalou sa digitaki Luvena o Jisu Karisito me kena Tui. (Aisea 9:​6, 7; Maciu 28:18) E vakavulici ratou nona imuri o Jisu me ratou masuta na Matanitu ni Kalou.b (Maciu 6:​9, 10) Sa na dua ga na matanitu ena liutaki keda kece na kawatamata, qai kena iLiuliu o Jisu.

O Jisu e sega ni vakataki ira na iliuliu vakatamata, me vakayagataka nona lewa me cakava kina na ka ga e vinakata. Ena sega ni vakaduiduitaki keda ena vuku ni vanua eda cavutu mai kina, matatamata se isususu. (Aisea 11:​3, 4) Ena sega tale ga ni vinakati meda valataka na noda dodonu. Na vuna? O Jisu ena kauaitaka na veika eda dui gadreva. “Ni na vakabula o koya na dravudravua e tagi ni kere veivuke, o koya tale ga na vakaloloma kei koya e sega ni vukei . . . . Ena vakabulai ira mai na veivakasaurarataki kei na ivalavala kaukaua.”​—Same 72:​12-14.

Ena vakarusa na Matanitu ni Kalou na iyaragi kece ni ivalu. (Maika 4:3) Era na kau tani na tamata ca era veivala tiko qai vakaleqai ira eso tale. (Same 37:​9, 10) Eda na taqomaki ena vanua cava ga eda tu kina e vuravura.​—Isikeli 34:28.

Eda na marautaka na bula ena veiliutaki ni Matanitu ni Kalou. Ena vakaotia na leqa e vakavuna na ivalu me vaka na dravudravua, leqa ni kakana kei na veivakavaletaki. Ena levu na kakana bulabula da qai marautaka na vanua eda tiko kina.​—Same 72:16; Aisea 65:​21-23.

Ena kauta laivi na Matanitu ni Kalou na leqa e vu mai ena ivalu, me vaka na mavoa kei na rarawa e salavata mai. O ira mada ga na mate kina era na vakaturi mera bula e vuravura. (Aisea 25:8; 26:19; 35:​5, 6) Eda sa na sotavi ira tale noda lewenivuvale. Ena sega ni nanumi tale na veika ca e yaco ena ivalu ni “sa oti na veika e dau yaco e liu.”​—Vakatakila 21:4.

ENA VAKAOTIA NA KALOU NA IVALAVALA CA

Na Matanitu ni Kalou ena vakaduavatataki keda kece meda qarava na Kalou dina duadua ga o Jiova.c “Na Kalou dauloloma qai dauveivakacegui.” (2 Korinica 13:11) Eda na vulica na sala meda bula veiyaloni kina. (Aisea 2:​3, 4; 11:9) O ira kece na talairawarawa vua na Kalou, era sa na bula uasivi.​—Roma 8:​20, 21.

NA KALOU ENA VAKARUSAI SETANI KEI IRA NA TIMONI

Na Matanitu ni Kalou ena vakarusai Setani kei ira na timoni era vakavuna tiko na ivalu. (Vakatakila 20:​1-3, 10) “Ena vakilai na sautu” nira sa na sega tale ni veivakamuai.​—Same 72:7.

Mo nuidei ni na yaco na ka e yalataka na Kalou, ya me vakaotia na ivalu kei na itovo kaukaua. E vinakata sara ga me vakaotia, e tu tale ga vua na kaukaua me cakava qori.

• E tu vua na Kalou na vuku kei na kaukaua me vakaotia na ivalu kei na itovo kaukaua. (Jope 9:4) E sega ni dredre vua me cakava qori.​—Jope 42:2.

• E sega ni vinakata na Kalou meda rarawa. (Aisea 63:9) E cati ira tale ga na “taleitaka na itovo kaukaua.”​—Same 11:5.

• Na Kalou e dau dina ena nona vosa qai sega ni lasu.​—Aisea 55:​10, 11; Taito 1:2.