Ezayíi
21 Hwɛ e è ɖɔ dó gbětótló e cí xu ɖɔhun é* ɖíe:
Nǔɖé jawě, bo cí axásáxásá jɔhɔn e ɖo tofɔligbé za wɛ é ɖɔhun,
é jawě sín gbětótló mɛ, sín to e dó xɛsi é mɛ.
2 È xlɛ́ nǔ baɖabaɖa ɖé mì ɖo nǔmimɔ mɛ:
Gbejímanɔtɔ́ ɖo nǔ wa wɛ kpó gbejímanɔ kpó,
bɔ kúnsúdónúnǔtɔ́ ɖo kún sú dó nú nǔ wɛ.
Elámu è, yi tɔ́n ahwan ɛ! Mɛ̌di è, jǎn go dó è!
Un ná ɖó nǔ azɔnwinwɛn e é dɔn wá é bǐ nu.
3 Énɛ́ wú wɛ un ɖo wǔvɛ́ ɖaxó mɛ.*
Un ɖo kúsúkpɔ́ xo wɛ,
nyɔ̌nu e ɖo ajidonu é ɖɔhun.
Ado hu mì sɔmɔ̌, bɔ un sixú se nǔ ǎ;
ayi ce gba dó sɔmɔ̌, bɔ un sixú mɔ nǔ ǎ.
4 Ayi ce ba gǎn kpo; un nɔ sísɔ́ ɖó adohu adohu wú.
Zǎnbibɔ e un nɔ ba tawun ɖ’ayǐ é, nɔ zɔ́n bɔ un nɔ sísɔ́ din.
5 Mi tɛ́ távo ɔ, bo to azinkpo lɛ́!
Mi ɖu nǔ, bo nu vɛ̌ɛn!
Axɔ́ví lɛ́ mi, mi sí te, mi kɔn ami dó gǎglónú ɔ jí!
6 Ðó nǔ e Jexóva ɖɔ nú mì é ɖíe:
“Yi, sɔ́ mɛcɔ́tɔ́ ɖó fí e è nɔ cɔ́ nǔ ɖe é; é ní ɖɔ nǔ e mɔ wɛ é ɖe é.”
7 É mɔ ahwankɛkɛ́ ɖé kpó sɔ́ lɛ́ sín gbɛ̌ta ɖé kpó,
ahwankɛkɛ́ tócí lɛ́ tɔn ɖé,
ahwankɛkɛ́ lǎkúnmí lɛ́ tɔn ɖé.
É kpɔ́n céɖécéɖé, ɛɛn, kpó sɔxwixwe ɖaxó kpó.
8 Énɛ́ gúdo ɔ, é sú xó kinnikínní ɖɔhun, bo ɖɔ:
“Jexóva è, un nɔ ɖo te hwebǐnu ɖo atɔxwɛ ɔ jí ɖo kéze,
un nɔ ɖo te ɖo nǔcɔ́tɛn ce ɖo zǎn lɛ́ bǐ mɛ.
9 Kpɔ́n nǔ e jawě é:
Súnnu lɛ́ ɖo ahwankɛkɛ́ ɖé mɛ, bɔ sɔ́ lɛ́ sín gbɛ̌ta ɖé ɖo dindɔn wɛ!”
Énɛ́ gúdo ɔ, é ɖɔ kpó xósúsú kpó ɖɔ:
“É j’ayǐ! Babilɔ́nu j’ayǐ!
Nǔmɛsɛn tɔn lɛ́ sín bǒcyɔ kpikpa lɛ́ bǐ gba hánnyá gbɔn kɔ́mɛ kɔ́mɛ!”
10 Togun ce, hwi mɛ e è só jinukún ɖɔhun é,
hwi mɛ e nyí jinukún* e tɔ́n sín jinukúnsótɛn ce é,
un ko ɖɔ nǔ e un se sín Jexóva ahwankpá lɛ́ tɔn, Mawu Izlayɛ́li tɔn gɔ́n é nú we.
11 Hwɛ e è ɖɔ dó Duma* é ɖíe:
Mɛɖé ɖo xó sú ylɔ́ mì wɛ sín Seyíi ɖɔ:
“Mɛcɔ́tɔ́, nɛ̌ zǎn ɔ ka ɖe?
Mɛcɔ́tɔ́, nɛ̌ zǎn ɔ ka ɖe?”
12 Mɛcɔ́tɔ́ ɔ ɖɔ:
“Ayǐ ɖo hǐnhɔ́n wɛ, bɔ zǎn lɔ ɖo kúkú wɛ.
Ényí mi jló ná kan nǔ byɔ́ hǔn, mi kanbyɔ́.
Mi lɛ́ kɔ wá!”
13 Hwɛ e è ɖɔ dó gbětótló ɔ é ɖíe:
Tomɛyitɔ́gbɛ́ta Dedáni tɔn lɛ́ mi,
zungbó e ɖo gbětótló ɔ mɛ é mɛ wɛ mi ná dɔ́.
14 Mi mɛ e nɔ nɔ Tema yíkúngban jí lɛ́ é mi,
mi hɛn sin, bo yi kpé mɛ e kɔ xú é,
bo hɛn wɔ̌xúxú yi jó nú mɛ e ɖo hinhɔn wɛ é.
15 Ðó yě hɔn ɖo hwǐ nukɔn, ɖo hwǐ e è sún é nukɔn,
ɖo gǎ e ɖo dlɛ̌ndlɛ́n jí é nukɔn, ɖo lě do ahwan ɔ syɛ́n sɔ é nukɔn.
16 Ðó nǔ e Jexóva ɖɔ nú mì é ɖíe: “Ðo xwe ɖokpó vlamɛ ɔ, ɛɛn, jokóxotɔ́ e è yí é sín xwe lɛ́ ɖɔhun* ɔ, susu Kedáa tɔn bǐ ná bú. 17 Gǎdatɔ́ kpɛɖé wɛ ná kpo ɖo ahwanfuntɔ́ Kedáa tɔn lɛ́ mɛ, ɖó Jexóva Mawu Izlayɛ́li tɔn wɛ ɖɔ xó.”