Ezayíi
22 Hwɛ e è ɖɔ dó Tɔdo nǔmimɔ tɔn* ɔ é ɖíe:
Étɛ́ ka ɖo wiwa we wɛ, bɔ mɛ towe lɛ́ bǐ xá xɔ ta?
2 Toxo e mɛ hunnyahunnya gɔ́ é wɛ a nyí ɖ’ayǐ,
toxo zǐngídinɔ, toxo e nɔ ɖú agbojlaka é.
Hwǐ wɛ è sɔ́ hu mɛ towe e kú lɛ́ é ná ǎ,
yě ka lɛ́ kú ɖo ahwangbénu ǎ.
3 Acɛgannagannakpanúmɛtɔ́ towe lɛ́ bǐ nɔ kpɔ́ bo hɔn.
È zán gǎ ɖě cóbó wlí ahwankannumɔ yětɔn ǎ.
Mɛ e è mɔ lɛ́ é bǐ sín ahwankannumɔ wɛ è wlí,
có fí línlín tawun wɛ yě hɔn yi.
4 Énɛ́ wú wɛ un ɖɔ: “Mi ɖe nukún sín jǐ ce,
mi nú má y’avǐ vívɛ́ vívɛ́.
Mi ma ɖɔ dandan ɖɔ émí ná dó gbɔ nú mì,
ɖó kún súsú dó nú togun ce sín vǐ nyɔ̌nu ɔ* wú ó.
5 Ðó azǎn e gbe è dán ɖěwagbɛn, cí ahwan bo lɛ́ ɖi xɛsi tawun é wɛ é nyí
sín Aklúnɔ Nǔbǐwúkpétɔ́, Jexóva ahwankpá lɛ́ tɔn gɔ́n,
ɖo Tɔdo nǔmimɔ tɔn ɔ mɛ.
È ɖo ahohó ɔ mu wɛ,
bo ɖo xó sú sɛ́dó só ɔ ta wɛ.
7 Ahwankɛkɛ́ lɛ́ ná gɔ́
tɔdo towe e nyɔ́ hú gǎn lɛ́ é mɛ,*
bɔ sɔ́* lɛ́ ná sɔ́ tɛnmɛ yětɔn lɛ́ ɖo hɔntogbó ɔ ta,
8 è ná ɖe nǔ e nɔ nya xɛ ɖo Judáa jí é síin.
“Ðo azǎn énɛ́ gbe ɔ, mi ná kpɔ́n fí e è nɔ sɛ ahwanfunnú lɛ́ xwe dó ɖo Zungbóxwé ɔ gbe é sɛ́dó, 9 bɔ mi ná mɔ fí tobutóbú e Davídi toxo ɔ sín dǒ zɛ ɖe lɛ́ é. Bɔ mi ná ɖó sin sín kpasin dó sindo e ɖo do é mɛ. 10 Mi ná xa xwé e ɖo Jeluzalɛ́mu lɛ́ é, bo ná gba ɖé lɛ́ ɖo yě mɛ dó ná hlɔ̌nhlɔ́n ahohó ɔ. 11 Mi ná bló nǔ e mɛ sin nɔ nɔ é ɖokpó ɖó ahohó we lɛ́ tɛ́ntin nú sin e ɖo sindo xóxó ɔ mɛ é, amɔ̌, mi ná kpɔ́n Mɛ ɖaxó e bló é ǎ, mi ka ná mɔ Mɛ e bló tuto tɔn sín hwenu línlín ɖíe é ǎ.
12 Ðo azǎn énɛ́ gbe ɔ, Aklúnɔ Nǔbǐwúkpétɔ́, Jexóva ahwankpá lɛ́ tɔn,
ná byɔ́ ɖɔ è ní ya avǐ bo nɔ aluwɛ mɛ,
è ní xwlɛ́ ta bo dó ati.
13 Amɔ̌, é nyɔ́ wa ɔ, agɔ̌ kpó awǎjijɛ kpó wɛ tíin,
è ɖo nyibú hu wɛ, bo ɖo lɛ̌ngbɔ́ hu wɛ,
è ɖo lan ɖu wɛ, bo ɖo vɛ̌ɛn nu wɛ.
‘Mi nú mǐ ní ɖu nǔ bo nu ahan, ɖó sɔ ɔ, mǐ ná kú.’”
14 Énɛ́ gúdo ɔ, Jexóva ɖe éɖée xlɛ́ mì ɖɔ: “‘È ná sɔ́ nǔwanyido énɛ́ kɛ mi káká cóbónú mi ná kú ǎ,’ wɛ Aklúnɔ Nǔbǐwúkpétɔ́, Jexóva ahwankpá lɛ́ tɔn ɖɔ.”
15 Nǔ e Aklúnɔ Nǔbǐwúkpétɔ́, Jexóva ahwankpá lɛ́ tɔn ɖɔ é ɖíe: “Yi nǔjíkpɔ́ntɔ́ Cebúna e ɖo nukún kpé dó xwé* ɔ wú wɛ é gɔ́n, bo ɖɔ n’i ɖɔ: 16 ‘Étɛ́ a ka ɖó ɖo fí? Hɛ̌nnumɔ tɛ́ a ka ɖó ɖo fí, bo kun yɔdo nú hwiɖée ɖó fí?’ É ɖo yɔdo tɔn kun wɛ ɖó fí e yi aga é ɖé; é ɖo gbɔjɛtɛn* kun nú éɖée dó só xomɛ wɛ. 17 ‘Éɖíe! Nya ɛ, Jexóva ná sɔ́ we nyi dó kɔ́mɛ kpó zǐngídi kpó, bo ná wlí we hɛn gǎnnugǎnnu. 18 É ɖo wɛn ɖɔ é ná blá we tánwúntánwún bo ná nyi we dó ayǐkúngban faɖaɖa jí bɔ̌lu ɖɔhun. Fínɛ́ wɛ a ná kú ɖe, bɔ fínɛ́ wɛ ahwankɛkɛ́ towe susunɔ lɛ́ ná nɔ, lobɔ é ná nyí winnyá nú gǎn towe sín xwé. 19 Un ná ɖe we sín tɛn e mɛ a ɖe é bo ná nya we sín azɔ̌watɛn towe.
20 “‘Ðo azǎn énɛ́ gbe ɔ, un ná ylɔ́ mɛsɛntɔ́ ce Eliyakímu, Ilukíya ví ɔ, 21 un ná dó awu towe gaga ɔ n’i, bo ná sin gǒjíblánú towe dó wǔ tɔn gbánwúngbánwún, lobo ná sɔ́ acɛkpikpa towe dó alɔ tɔn mɛ. É ná nyí tɔ́ nú mɛ e nɔ nɔ Jeluzalɛ́mu lɛ́ é kpó akɔta Judáa tɔn kpó. 22 Un ná sɔ́ Davídi xwé ɔ sín cávi ɖó abɔ̌ tɔn ta. É ná hun, bɔ mɛ ɖěbǔ ná sú ǎ; é ná sú, bɔ mɛ ɖěbǔ ná hun ǎ. 23 Un ná xwe è hǔnjɛ́n ɖɔhun dó fí syɛ́nsyɛ́n ɖé, bɔ é ná húzú axɔ́súzinkpo susunɔ ɖé nú tɔ́ tɔn sín xwé. 24 È ná sɔ́ tɔ́ tɔn xwé sín susu* bǐ kplá kɔ tɔn, vǐ lɛ́ kpó kúnkan ɔ* kpó, zɛ̌n kpɛví kpɛví lɛ́ bǐ, zɛ̌n e cí gannú ɖɔhun lɛ́ é, káká jɛ zɛ̌n ɖaxó lɛ́ bǐ jí.
25 “‘Ðo azǎn énɛ́ gbe ɔ,’ wɛ Jexóva ahwankpá lɛ́ tɔn ɖɔ, ‘è ná sún hǔnjɛ́n e è xwe dó fí syɛ́nsyɛ́n ɖé é, è ná sɛ́n síin bɔ é ná j’ayǐ, lobɔ agban e é hɛn ɖó te é ná j’ayǐ bɔ xó tɔn ná fó, ɖó Jexóva ɖésúnɔ wɛ ɖɔ xó.’”