Ezayíi
23 Hwɛ e è ɖɔ dó Tíi é ɖíe:
Tɔjíhún Taasísi tɔn lɛ́ mi, mi dó gbɛvíhan!
Ðó è ko gba tɔjíhúnglíntɛn ɔ hánnyá; è sixú byɔ́ mɛ ǎ.
Sín Kitímu to mɛ wɛ è ɖe nǔ énɛ́ xlɛ́ yě ɖe.
2 Mi mɛ e nɔ nɔ to e ɖo xutó é mɛ lɛ́ é mi, mi cí xwíí.
Ajɔ̌tɔ́ Sidɔ́ɔn tɔn e nɔ d’asá xu lɛ́ é dó dɔkun nú we.
3 Sin gěgé jí wɛ jinukún* Cixɔ́ɔ* tɔn lɛ́
kpó nǔkún e è ya ɖo Nilu sín xá mɛ lɛ́ é kpó nɔ gbɔn, ɛɛn, nǔ e nɔ hɛn le wá nú we lɛ́ é;
yě wɛ nɔ dó dɔkun nú akɔta lɛ́.
4 Hwi Sidɔ́ɔn e nyí ahohó e è mɛ dó xutó é, winnyá ní hu we,
ɖó xu ɖɔ:
“Un se ajidonu sín wǔvɛ́ ǎ, un ka lɛ́ ji vǐ ǎ,
mɔ̌ jɛ́n un ma kpé nukún dó dɔ̌nkpɛvú lɛ́ wú bɔ yě su, alǒ kplɔ́n ɖyɔ̌vǐ* lɛ́ ǎ é nɛ́.”
5 Lěe é nyí gbɔn hwenu e mɛ lɛ́ se gbeɖíɖó ɔ dó Ejípu wú é ɔ,
yě ná nɔ aluwɛ mɛ hwenu e yě ná se gbeɖíɖó ɔ dó Tíi wú é.
6 Mi d’asá xu ɔ, bo yi káká Taasísi!
Mi mɛ e nɔ nɔ to e ɖo xutó é mɛ lɛ́ é mi, mi dó gbɛvíhan!
7 Toxo mitɔn e mɛ è nɔ ɖú agbojlaka ɖe sín hwenu línlín ɖíe, sín bǐbɛ́mɛ é ɖíe a?
Afɔ tɔn lɛ́ nɔ kplá ɛ yi to línlín lɛ́ mɛ ɖ’ayǐ bónú é ná nɔ dɔ̌n.
8 Mɛ̌ ka wá gbeta énɛ́ kɔn dó Tíi wú,
éyɛ́ mɛ e nɔ má axɔ́súgbákún lɛ́,
bɔ ajɔ̌tɔ́ tɔn lɛ́ nyí axɔ́ví,
lobɔ è nɔ wlí yɛ̌yi nú ajɔ̌tɔ́ tɔn lɛ́ ɖo ayǐkúngban ɔ bǐ jí é?
9 Jexóva ahwankpá lɛ́ tɔn ɖésúnɔ wɛ wá gbeta énɛ́ kɔn,
bo ná dó ɖó nǔ go e yí wɛ é nɔ ɖe, ɖó ɖɛkpɛ tɔn wú é nu,
lobo ná dó winnyá mɛ ɖěɖěe è nɔ wlí yɛ̌yi ná gbɔn ayǐkúngban ɔ jí lɛ́ é bǐ.
10 Vǐ nyɔ̌nu Taasísi tɔn è, d’asá to towe, tɔsisa Nilu tɔn ɔ ɖɔhun.
Tɛnmɛ ɖě sɔ́ ɖe nú tɔjíhún lɛ́ ǎ.*
11 É dlɛ́n alɔ tɔn dó xu jí;
é húnhún axɔ́súɖuto lɛ́.
Jexóva ɖe gbe ɖɔ è ní gba ahohó Fenisíi tɔn lɛ́ hánnyá bǐ mlɛ́mlɛ́.
12 Bɔ é ɖɔ: “Ðyɔ̌vǐ ɖo alɔjí Sidɔ́ɔn tɔn, hwi mɛ e è gbídí kɔ ná é,
a sɔ́ ná ɖú agbojlaka ɖě ǎ.
Sí te, d’asá xu ɔ, bo yi káká Kitímu.
É ná bo tlɛ nyí ɖo dɔ̌n ɔ, a ná mɔ gbɔjɛ ɖě ǎ.”
13 Mi kpɔ́n Kaludéenu lɛ́ sín to!
Togun énɛ́ (é nyí Asilíi ǎ),
wɛ bló bɔ é húzú fí e kanlin gbětótló mɛ tɔn lɛ́ nɔ nɔ é.
Yě ko mɛ atɔxwɛ e yě ná zán dó ján go dó è lɛ́ é;
yě gba atɔxwɛ tɔn syɛ́nsyɛ́n lɛ́,
bɔ mɔ̌ mɛ ɔ, é húzú aglingbigba.
14 Tɔjíhún Taasísi tɔn lɛ́ mi, mi dó gbɛvíhan,
ɖó è ko gba ahohó mitɔn hánnyá.
15 Ðo azǎn énɛ́ gbe ɔ, è ná wɔn Tíi nú xwe 70, énɛ́ wɛ nyí xwe nabí e axɔ́sú ɖokpó nɔ nɔ gbɛ xɔ é.* Ðo xwe 70 lɛ́ sín vivɔnu ɔ, nǔ e xá tonyatɔ́ e xó è ɖɔ ɖo han élɔ́ mɛ é wɛ ná xá Tíi:
16 “Hwi tonyatɔ́ e è wɔn é, sɔ́ agǐdigbo ɖokpó bo lɛ́ lɛ̌ dó toxo ɔ.
Xo agǐdigbo towe kpó azɔ̌tuuntuun kpó;
ji han gěgé,
bónú yě ná flín we.”
17 Ðo xwe 70 lɛ́ sín vivɔnu ɔ, Jexóva ná sɔ́ ayi ɖó Tíi jí, bɔ é ná lɛ́ kɔ yi ajɔ̌ tɔn kɔn, bo ná lɛ aga xá axɔ́súɖuto gbɛ ɔ tɔn e ɖo ayǐkúngban ɔ nukúnmɛ lɛ́ é bǐ. 18 Amɔ̌, le tɔn kpó ajɔ̌ tɔn kpó ná húzú nǔ mímɛ́ nú Jexóva. È ná sɛ xwe alǒ bɛ́ dó fí ɖěvo ǎ, ɖó mɛ e nɔ nɔ Jexóva nukɔn lɛ́ é tɔn wɛ ajɔ̌ tɔn ná nyí, bónú yě ní dó ɖu nǔ gɔ́ xo, lobo dó awu ɖagbe ɖagbe lɛ́.