Ezayíi
37 Ée axɔ́sú Ezekiyási se mɔ̌ tlóló é ɔ, é vún awu dó kɔ nú éɖée, bo dó ati lobo yi xwé Jexóva tɔn gbe. 2 Énɛ́ gúdo ɔ, é sɛ́ Eliyakímu e nɔ kpé nukún dó xwé* tɔn wú é, Cebúna wěgbójínɔtɔ́ ɔ kpó mɛxó e ɖo vɔ̌sánúxwlémawutɔ́ lɛ́ nu lɛ́ é kpó dó, bɔ yě dó ati bo yi gbeyíɖɔ Ezayíi Amɔ́zi ví ɔ gɔ́n. 3 Yě ɖɔ n’i ɖɔ: “Nǔ e Ezekiyási ɖɔ é ɖíe: ‘Azǎn égbé tɔn ɔ, aluwɛ, nǔgbɛ́númɛ* kpó wi mɛtɔn kínkɔ́n kpó sín azǎn wɛ; ɖó vǐ lɛ́ ɖo gbesisɔmɛ bo ná zɛ hwɛ,* amɔ̌, hlɔ̌nhlɔ́n e ná ji yě é ɖe ǎ. 4 Bóyá Jexóva Mawu towe ná se xó e Hlabucakée ɔ ɖɔ lɛ́ é, éyɛ́ mɛ e aklúnɔ tɔn, Asilíi xɔ́sú ɔ sɛ́ dó bónú é ná ɖɔ slamɛ Mawu gbɛɖe ɔ wú é, bɔ Jexóva Mawu towe ná byɔ́ ɛ ɖɔ é ní ɖó xó e émí se lɛ́ é sín gbe. Énɛ́ wú ɔ, xo ɖɛ dó mɛ e kpo bo gán lɛ́ é tamɛ.’”
5 Énɛ́ ɔ, mɛ e axɔ́sú Ezekiyási sɛ́ dó lɛ́ é yi Ezayíi gɔ́n, 6 bɔ Ezayíi ɖɔ nú yě ɖɔ: “Nǔ e mi ɖó ná ɖɔ nú aklúnɔ mitɔn é ɖíe: ‘Xó e Jexóva ɖɔ é ɖíe: “Ma ɖi xɛsi ɖó xó e a se lɛ́ é wú ó, xó e mɛ e axɔ́sú Asilíi tɔn sɛ́ dó lɛ́ é ɖɔ dó nylá nu dó wǔ ce lɛ́ é wú ó. 7 Un ná sɔ́ linlin ɖé dó ayi mɛ n’i,* é ná se gbeɖíɖó ɖé bo ná lɛ́ kɔ yi to éɖésúnɔ tɔn mɛ; bɔ un ná bló bɔ é ná kú hwǐ kú ɖo to éɖésúnɔ tɔn mɛ.”’”
8 Ée Hlabucakée ɔ se ɖɔ Asilíi xɔ́sú ɔ bɛ́ ahwankpá tɔn lɛ́ sín Lakíci gúdo é ɔ, é lɛ́ kɔ yi gɔ̌n tɔn, bo mɔ ɛ bɔ é ɖo ahwan fun xá Libúna wɛ. 9 Din ɔ, axɔ́sú ɔ se bɔ è ɖɔ xó élɔ́ dó Etiopíi xɔ́sú Tiláka wú: “É tɔ́n bo ná dó fun ahwan xá we.” Ée é se mɔ̌ é ɔ, é lɛ́ sɛ́ wɛndótɔ́ lɛ́ dó Ezekiyási gɔ́n, bo ɖɔ nú yě ɖɔ: 10 “Nǔ e mi ɖó ná ɖɔ nú Judáa xɔ́sú Ezekiyási é ɖíe: ‘Ma lɔn nú Mawu towe e wú a nɔ ɖeji dó é ɖɔ xó élɔ́ lɛ́ dó flú we ó: “È ná jó Jeluzalɛ́mu dó nyi Asilíi xɔ́sú ɔ lɔ mɛ ǎ.” 11 Éɖíe! A se nǔ e Asilíi xɔ́sú lɛ́ wa nú to lɛ́ bǐ é; é sú kún yětɔn dó. Hwiɖokpónɔ wɛ ná gán ɖ’é mɛ a? 12 Akɔta e tɔ́gbó ce lɛ́ sú kún dó ná lɛ́ é sín nǔmɛsɛn lɛ́ hwlɛ́n yě a? Fítɛ́ Gozáni, Haláani, Hlɛsɛ́fu kpó togun Edɛ́ni tɔn e ɖo Tɛlasáa ɖ’ayǐ lɛ́ é kpó ka ɖe? 13 Fítɛ́ axɔ́sú Hamáti tɔn, axɔ́sú Aapádu tɔn, gɔ́ nú toxo Sefaawayímu tɔn, Hena tɔn kpó Iwa tɔn kpó sín axɔ́sú ka ɖe?’”
14 Ezekiyási yí wěmasɛ́dómɛ lɛ́ ɖo wɛndótɔ́ lɛ́ sín alɔ mɛ, bo xa. Énɛ́ gúdo ɔ, Ezekiyási fán kpó yi xwé Jexóva tɔn gbe, bo vlɔ́n yě* ɖo Jexóva nukɔn. 15 Bɔ Ezekiyási jɛ ɖɛ xo sɛ́ dó Jexóva jí ɖɔ: 16 “Jexóva ahwankpá lɛ́ tɔn è, Mawu Izlayɛ́li tɔn e ɖo ayǐjínjɔ́n ɖo Celubɛ́ɛn lɛ́ tanu* é, hwiɖokpónɔ wɛ nyí Mawu nǔgbó ɖo axɔ́súɖuto e ɖo ayǐkúngban ɔ jí lɛ́ é bǐ mɛ. A bló jǐnukúnsin kpó ayǐkúngban kpó. 17 Jexóva è, tɛ́ tó, bo se! Jexóva è, hun nukún towe lɛ́, bo kpɔ́n! Ðǒtó xó ɖěɖěe Senakelíbu ɖɔ bo dó ɖɔ slamɛ hwi Mawu gbɛɖe ɔ wú lɛ́ é bǐ. 18 Jexóva è, nǔgbó wɛ ɖɔ Asilíi xɔ́sú lɛ́ sú kún dó nú to lɛ́ bǐ, káká jɛ to yěɖésúnɔ tɔn jí. 19 Bɔ yě bɛ́ nǔmɛsɛn yětɔn lɛ́ nyi dó myɔ mɛ, ɖó yě nyí mawu jɔ mawu ǎ, loɔ, alɔ núwiwa gbɛtɔ́ tɔn wɛ, atín kpó awǐnnya kpó. Énɛ́ wɛ zɔ́n bɔ yě kpé wú bo sú kún dó nú yě. 20 Amɔ̌ din ɔ, Jexóva Mawu mǐtɔn è, hwlɛ̌n mǐ sín alɔ tɔn mɛ. Énɛ́ ɔ, axɔ́súɖuto e ɖo ayǐkúngban ɔ jí lɛ́ é bǐ ná tuun ɖɔ hwi Jexóva ɖokpónɔ wɛ nyí Mawu.”
21 Énɛ́ gúdo ɔ, Ezayíi Amɔ́zi ví ɔ sɛ́ wɛn élɔ́ dó Ezekiyási: “Nǔ e Jexóva, Mawu Izlayɛ́li tɔn ɖɔ é ɖíe: ‘Ðó a xo ɖɛ sɛ́ dó mì ɖó Asilíi xɔ́sú Senakelíbu wú wútu ɔ, 22 xó e Jexóva ɖɔ dó wǔ tɔn é ɖíe:
“Vǐ nyɔ̌nu ɖo alɔjí Sinyɔ́ɔ tɔn gbɛ́ wǎn nú we, é nɔ cá we ko.
Vǐ nyɔ̌nu Jeluzalɛ́mu tɔn nɔ kpɔ́n we bo nɔ húnhún ta.
23 Mɛ̌ wú a ɖɔ slamɛ? Mɛ̌ wú a ka nylá nu dó?
Mɛ̌ jí a ka sú xó dó?
Mɛ̌ jí a ka sɔ́ goyíyí nukún towe lɛ́ ɖó?
Mɛ mímɛ́ Izlayɛ́li tɔn ɔ jí wɛ!
24 A gbɔn mɛsɛntɔ́ towe lɛ́ jí bo ɖɔ slamɛ Jexóva wú, lobo ɖɔ:
‘Kpó ahwankɛkɛ́ví wɔ̌búwɔ́bú ce lɛ́ kpó ɔ,
un ná yi só lɛ́ sín ahɔn mɛ,
ɛɛn, fí e jɛ zɔ tawun ɖo Libáan lɛ́ é.
Un ná gbo sɛ́dlutín tɔn ɖaxó ɖaxó lɛ́, jenɛvliyéetín tɔn ɖagbe ɖagbe lɛ́.
Un ná byɔ́ bibɛtɛn tɔn e yi aga hú gǎn lɛ́ é mɛ, zungbó tɔn e dó hú gǎn lɛ́ é mɛ.
25 Un ná kun dotɔ lɛ́, bo ná nu sin;
un ná sɔ́ afɔkpákpá ce lɛ́ dó xú tɔsisa Ejípu tɔn* lɛ́.’
26 A ko se ǎ cé? Sín hwenu línlín ɖíe wɛ è ko wá gbeta tɔn kɔn.*
Un sɔ́ nǔ tɔn ɖ’ayǐ* din é ɔ, azǎn ko jɛ.
Din ɔ, un ná bló bɔ é ná jɛnu.
A ná bló bɔ toxo e è mɛ ahohó lɛ́ lɛ̌ dó lɛ́ é ná jɛ vɔ̌, bo húzú aglingbigba.
27 Mɛ e nɔ nɔ yě mɛ lɛ́ é ná ba gǎn kpo;
ado ná hu yě, è ná dó winnyá yě.
Yě ná cí gběhan gle mɛ tɔn kpó gběhan mǔ kpó ɖɔhun,
gběhan xɔ ta tɔn e jɔhɔn zǎnzǎnhwe jí tɔn bló bɔ é xú lɛ́ é ɖɔhun.
28 Amɔ̌, un tuun hwenu e a nɔ jínjɔ́n ayǐ é, hwenu e a nɔ tɔ́n é, hwenu e a nɔ lɛ́ kɔ é
kpó hwenu e a sin xomɛ dó mì syɛ́nsyɛ́n é kpó ganjí,
29 ɖó xomɛ e a sin dó mì syɛ́nsyɛ́n é kpó xósúsú towe kpó hun káká wá tó ce lɛ́ mɛ.
Énɛ́ wú ɔ, un ná sɔ́ klɔcée ce dó awɔntín towe mɛ, bo ná sɔ́ gan ce dó nufló towe lɛ́ tɛ́ntin,
bo ná kplá we lɛ́ kɔ gbɔn ali e a gbɔn wá é.”
30 “‘Nǔ e ná nyí wuntun nú we* é ɖíe: ɖo xwe élɔ́ mɛ ɔ, mi ná ɖu nǔkúnflá lɛ́; bɔ ɖo xwe wegɔ́ ɔ mɛ ɔ, mi ná ɖu nǔkún ɖěɖěe ná j’ayǐ sín énɛ́ lɛ́ jí lɛ́ é; amɔ̌, ɖo xwe atɔngɔ́ ɔ mɛ ɔ, mi ná dó nǔkún bo ná ya, mi ná tun vǐwuntín lɛ́ bo ná ɖu sínsɛ́n yětɔn. 31 Akɔta Judáa tɔn sín mɛ e gán lɛ́ é, ɛɛn, mɛ e è jó dó lɛ́ é ná dó ɖɔ do ganjí, bo ná ná sínsɛ́n gěgé. 32 Ðó mɛ e kpo lɛ́ é ná tɔ́n sín Jeluzalɛ́mu, bɔ mɛ e gán lɛ́ é ná gosín Sinyɔ́ɔ só ɔ jí. Jexóva ahwankpá lɛ́ tɔn ná wa mɔ̌ kpó akpakpa sɔ́ mɛ ɖaxó kpó.
33 “‘Énɛ́ wú ɔ, nǔ e Jexóva ɖɔ dó axɔ́sú Asilíi tɔn wú é ɖíe:
“É ná byɔ́ toxo énɛ́ mɛ,
alǒ da gǎ ɖě ɖo fínɛ́,
alǒ sɔ́ gǎglónú dó kpé hun xá ɛ,
alǒ sɔ́ nǔ nú nǔ e yě ná zán dó ján go dó è lɛ́ é ɖě ǎ.”’
34 ‘Ali e é gbɔn bo wá é wɛ é ná gbɔn bo lɛ́ kɔ;
é ná byɔ́ toxo énɛ́ mɛ ǎ,’ wɛ Jexóva ɖɔ.
35 ‘Un ná jɛ hun dó toxo énɛ́ jí bo ná hwlɛ́n ɛ, ɖó nyǐkɔ nyiɖésúnɔ tɔn
kpó nyǐkɔ mɛsɛntɔ́ ce Davídi tɔn kpó wú.’”
36 Bɔ wɛnsagun Jexóva tɔn tɔ́n, bo hu súnnu 185 000 ɖo ahwankpá Asilíinu lɛ́ tɔn mɛ. Hwenu e mɛ lɛ́ fɔ́n zǎnzǎn tɛɛn é ɔ, yě mɔ cyɔ lɛ́ bǐ. 37 Énɛ́ ɔ, Asilíi xɔ́sú Senakelíbu lɛ́ kɔ bo ɖidó Ninívu, bo cí fínɛ́. 38 Gbe ɖokpó ɔ, é ɖo kɔ́ ɖe wɛ ɖo nǔmɛsɛn tɔn Nislɔ́ki sín xwégbe,* bɔ vǐ éɖésúnɔ tɔn Adlamalɛ́ki kpó Salɛsɛ́ɛ kpó sɔ́ hwǐ dó hu i, bɔ énɛ́ gúdo ɔ, yě hɔn yi Alaláti to mɛ. Bɔ vǐ súnnu tɔn Asaaxadɔ́ɔn húzú axɔ́sú ɖo tɛn tɔn mɛ.