3 | Hɔn Ðɔ Wǎngbɛ́númɛ Tɔn Sín Ayi Towe Mɛ

Tínmɛ tɔn:

Nǔ ɖěɖěe jí mǐ nɔ lin tamɛ dó lɛ́ é ɖo tají tawun nú Mawu. (Jelemíi 17:10) Mǐ ɖó ná nyi alɔ nú wǎngbɛ́númɛ sín xó lɛ́ ɖiɖɔ kpó wǎngbɛ́númɛ sín nǔ lɛ́ wiwa kpó; amɔ̌, mǐ ɖó ná lɛ́ wa nǔ hú mɔ̌. Nǔ e mǐ nɔ lin lɛ́ é kpó lěe nǔ nɔ cí nú mǐ é kpó wɛ nɔ zɔ́n bɔ mǐ nɔ ɖɔ wǎngbɛ́númɛxó lɛ́, lobo nɔ lɛ́ wa wǎngbɛ́númɛ sín nǔ lɛ́. Énɛ́ wú ɔ, ényí tamɛ linlin dó nǔɖé lɛ́ jí wɛ zɔ́n bɔ mǐ jɛ linlin wǎngbɛ́númɛ tɔn ɖó jí ɔ, mǐ ɖó ná yá wǔ ɖe ayi sín nǔ mɔ̌hun lɛ́ jí. Mɔ̌ jɛ́n mǐ sixú wa cóbó kpé wú bó “húzú,” lobo ɖó wǎngbɛ́númɛ te.

Nǔ e a sixú wa é:

Lin tamɛ kpó sɔxwixwe kpó dó linlin e a nɔ ɖó dó mɛ ɖěvo lɛ́ wú é, kpó lěe nǔ nɔ cí nú we dó yě wú é kpó jí, tají ɔ, mɛ ɖěvo e kpó hwi kpó ma nyí akɔ ɖokpó ɔ, alǒ to ɖokpó ɔ mɛ nu ǎ lɛ́ é. Nɔ kanbyɔ́ hwiɖée ɖɔ: ‘Linlin tɛ́ un ka nɔ ɖó dó yě wú? Nǔ e un tuun dó yě wú é jí wɛ linlin e un nɔ ɖó dó yě wú é ka jínjɔ́n a? Alǒ, ɖó un nɔ ɖe mɛ ɖó vo ɖo mɛ mɛ wú wɛ zɔ́n bɔ nǔ nɔ cí mɔ̌ nú mì dó yě wú a?’ Nɔ nyi alɔ nú nǔ ɖěɖěe nɔ tɔ́n ɖo tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é jí, fímu lɛ́, alǒ ayiɖeɖayǐ lɛ́ mɛ, bó nɔ sɔ́ wǎngbɛ́númɛ kpó dǎkaxixo kpó ɖ’ajo lɛ́ é.

É nɔ bɔ wǔ hwebǐnu bónú mǐ ná gbéjé linlin kpó lěe nǔ nɔ cí nú mǐ é kpó kpɔ́n ganjí, lobo ɖɔ xójɔxó nú mǐɖée ǎ. Amɔ̌, Xó Mawu tɔn sixú d’alɔ mǐ, bɔ mǐ ná “ɖe ɖɛ jlǒ kpódó linlin” kpó éé ɖo ayi mǐtɔn mɛ lɛ́ é. (Eblée lɛ́ 4:12) Énɛ́ wú ɔ, kpo ɖo Xó Mawu tɔn Biblu ɔ gbéjé kpɔ́n wɛ. Nɔ jlɛ́ nǔ e Biblu ɖɔ lɛ́ é dó nǔ e a nɔ lin lɛ́ é wú, bó wa nǔ e wú a kpé lɛ́ é bǐ, bónú linlin towe ní sɔgbe xá nǔ e Biblu kplɔ́n mɛ lɛ́ é. Xó Mawu tɔn sixú d’alɔ mǐ, bɔ mǐ ná ɖu ɖo wǎngbɛ́númɛ e ko dó ɖɔ do ɖo linlin mǐtɔn kpó ayi mǐtɔn kpó mɛ “ahohó” ɖɔhun é jí.—2 Kɔlɛ́ntinu lɛ́ 10:4, 5.