Nǔ E Nɔ Jɛ Ðò Kúdónú Yiyi Hwenu lɛ É: Etɛ Ye Ma ka Nyí À?

Xósin e Biblu na é

Mɛ e yì kúdónú lɛ é gegě nɔ ɖɔ ɖɔ emi flín ɖɔ emi tɔ́n sín agbaza emitɔn mɛ alǒ mɔ weziza ɖaxó ɖé abǐ fí ɖaxó ɖɛkpɛ ɖɛkpɛ ɖé. Wema Souvenirs de la mort : une investigation médicale ɖɔ ɖɔ ‘mɛɖé lɛ mɔ ɖɔ è jɔwǔ emi bɔ emi mɔ gbɛ̀ alɔkpa ɖevo vlíwún sɛ́dó.’ Biblu ɖɔ xó dó nǔ e nɔ jɛ ɖò kúdónú yiyi hwenu lɛ é wǔ ǎ, amɔ̌, nǔgbo taji ɖé ɖ’emɛ bo xlɛ́ ɖɔ nǔ mɔhun lɛ kún nyí gbɛ̀ ninɔ ɖò kú gudo mimɔ sɛ́dó ó.

Mɛkúkú lɛ tuùn nǔtí ǎ.

Biblu ɖɔ ɖɔ mɛkúkú kún “sɔ́ tuùn nǔɖe” ó. (Nǔnywɛtɔ́xó 9:5) Nú mǐ kú ɔ, mǐ sɔ́ nɔ yì nɔ gbɛ̀ ɖò gbɛ̀ ɖevo mɛ alǒ ɖò nǔ lin kpɔ́n wɛ ǎ, loɔ, mǐ sɔ́ nɔ tíìn ǎ. Nǔkplɔnmɛ e ɖɔ ɖɔ mǐ ɖó lindɔ̌n jɔmakú b’ɛ nɔ nɔ gbɛ̀ ɖò kú mǐtɔn gudo é gosin Biblu mɛ ǎ. (Ezekiyɛli 18:4) Enɛ wu ɔ, nǔ e nɔ jɛ ɖò kúdónú yiyi hwenu é ɔ, jixwé, zomɛ alǒ gbɛ̀ ninɔ ɖò kú gudo mimɔ sɛ́dó vlíwún xó ɖebǔ sixu ɖ’emɛ ǎ.

Etɛ Lazáa ka ɖɔ dó gbɛ̀ ninɔ ɖò kú gudo wu?

Tan Biblu tɔn e ɖɔ xó dó Lazáa wu é tinmɛ ɖɔ kú wɛ é kú nǔgbo: Jezu fɔ́n ɛ sín kú ɖò azǎn ɛnɛgɔ́ ɔ gudo. (Jaan 11:38-44) Enyi Lazáa ko nɔ gbɛ̀ alɔkpa ɖé mɛ ɖò kú tɔn gudo wɛ ɔ, fɔ́n e Jezu fɔ́n ɛ wá gbɛ̀ dó ayikúngban jí é ɔ, acɛ wɛ é na ko nyí bɔ é gbà. Amɔ̌, Lazáa ɖɔ xó ɖebǔ dó gbɛ̀ ninɔ ɖò kú gudo wu nú Biblu ɖɔ ǎ. Enyi Lazáa ko nɔ gbɛ̀ ɖé mɛ ɖò kú tɔn gudo wɛ ɔ, é ɖò wɛn ɖɔ é na ko ɖɔ xó tɔn. Jezu jlɛ́ kú Lazáa tɔn dó amlɔ wu dó xlɛ́ ɖɔ hwenu e Lazáa kú é ɔ, é kún sɔ́ tuùn nǔ ɖě ó.—Jaan 11:11-14.